Xatirələr dünyasında ucalan Ülvim

Kitab rəfimdə Ülvi ilə bağlı bir neçə qovluğum var:

1. Ülvinin şeirləri və poema (əlyazması)

2. Ülvinin hekayələri və povesti (əlyazması)

3. Ülvinin pyesləri (əlyazması)

4. Ülvinin tərcümələri (əlyazması)

5. Ülvinin ədəbi -tənqidi və ictimai-siyasi məzmunlu məqalələri (əlyazması)

6. Ülvinin məktubları (əlyazması)

7. Ülvinin fotoları

8. Ülvinin haqqında şeirlər və poemalar

9. Ülvinin haqqında xatirələr (məktublar və məqalələr - tələbə dostları)

10. Ülvinin ədəbi şəxsiyyətinə və irsinə haqqında yazılmış məqalələr və sair.

Qanlı 20 Yanvarın 40-cı günü Ülvinin “Ülvi duyğularım” kitabı “Gənclik” nəşriyyatında çox-çox dəyərli ziyalımız, gözəl şair, dramaturq, publisist Hidayətin qayğısı və diqqəti ilə nəşr olundu. Əl içi boyda olan bu kitabına təxminən 60-a qədər şeiri və bir poeması (“Ömür yolu”) daxil edilmişdi. Ülvinin ilk və üzünü görmədiyi şeirlər kitabı. Bu kitab Azərbaycanın dörd bir yanına gedib çatdı, məktəblərdə, hərbi hissələrdə, evlərdə əl-əl gəzdi. Bütün mətbuat orqanlarında bu kitab haqqında Azərbaycanımızın bütün şair və yazıçıları həzin, hıçqıraq dolu rəy və məqalələr yazdı. 1990-cı ilin 20 Yanvarında 20 yaşında şəhid olmuş tələbə Ülvi 21 yanvara şair Ülvi kimi doğuldu. “And”ı dillər əzbəri oldu. Mənim Ülvim hər kəsin yaddaşında şəhid adı ilə, şeir və “And”ı ilə heykəlləşdi.

Ülvinin “Ülvi duyğularım” kitabına Anar “Şəhidlər dağı”, Qasım Qasımzadə “Gözümün nuru, elimin işığı Ülvi”, Rafiq Səməndər. “Mən qorxmuram uzaq yola çıxmaqdan”, Zülfüqar Şahsevənli “Daş altında bitən çiçək”, Tofiq Mütəllibov “20 yaşın ölməzlik nəğməsi”, Fikrət Sadıq “Ülvilik”, Fərhad Qənbəroğlu “Şəhid babanın şəhid nəvəsi”, Taleh Həmid “Bir qumru pıçıltısı”, Cavanşir Eloğlu “Sevgimlə taleyim qoşa yazıldı”, Aslan Quluoğlu “Ülvi adı ülviləşdi”, Şurəddin Məmmədli və İslam Əliyev “Ülvinin ülvi duyğulları”, Söhbət Səfərli “Uzaq yolun yolçusu”, Qismət Alışoğlu “Azərbaycanı da sənə çox gördülər”, Yüksəl Rəhimov “Ülvi yollarım”, Mübariz Musaoğlu “Ülvi duyğularım”, Zöhrə Əsgərova “Nişan üzüyü”, Xanəmir “Ülvi Bünyadzadəyə cavab”, Flora Xəlilzadə “Tale pərvanəsi”, “Bir ölümün acığına” və “Şəhidim Ülvi”, Məmməd Aslan “Ülvinin üzüntü dolu hekayəsi”, Zaman Həsənov (Ülvinin ədəbiyyat müəllimi). “Ülvilərin Ülvisi”, Namazalı Paşayev (“Qoşqar” ədəbi birliyinin sədri) “Ülvi”, Məhəmməd Nəbisoy “İgid ölər, adı qalar”, Əsgər Zeynalov “Ülvinin poetik duyumu” və “Ulduzların işığı”, Saleh Hacıyev “Fəxrim, müqəddəsim, ümidim Ülvi” adlı rəy və düşüncələrini, eləcə də Nizami Cəfərov, Davud Nəsib, Camal Yusifzadə, Rüstəm Behrudi, Nizaməddin Mustafa, Xəlil Rza Ulutürk, Sadıq Elcanlı, Rüstəm Kamaloğlu, Yusif Savalan və onlarla digər ustad qələm sahibləri məqalələr yazdılar. Hüseyn Arif “Ülvi” poemasını, Nəriman Həsənzadə “Almaz”, Hidayət “Qələmini qanına batıran şair”, Musa Ələkbərli “Şəhidlər Xiyabanında”, Məmməd Namaz “Torpağa yazılan şeir”, Sabir Mustafa “Ülvim” adlı və adı bildiyimiz-bilmədiyimiz onlarla hörmətli şairlər Ülvinin xatirəsinə şeir ithaf edərək, müxtəlif qəzet və dərgilərdə nəşr etdirdilər.

Bugünlərdə yuxarıda sıraladığım Ülvi ünvanlı həmin qovluqların bəzilərini yenidən vərəqləmək ehtiyacında oldum. Onların içərisindən bir yazı - ilıq duyğulu xatirələrlə dolu bir məqalə məni xeyli əvvəlki illərə aparıb çıxardı. Məqalə poçtla mənim ünvanıma Naxçıvandan göndərilmişdi, imza yerində müəllif belə təqdim olunmuşdu: Elman Həbib, şair, Naxçıvan Televiziya və Radio Şirkətinin sədri (çox acı ki, həmin yazının müəllifi - istedadlı şair, gözəl ziyalımız bir neçə il bundan əvvəl dünyasını dəyişdi).

Bu yazıların içərisində məni xatirələr dənizində “boğub öldürən” bir yazını - 27 il bundan əvvəl Naxçıvandan şair Elman Həbibin göndərdiyi “Kövrək duyğular” adlı məqaləsini yenidən Sizinlə birgə oxumaq istədim. Buyurun.

Almaz Ülvi

525-ci qəzet.- 2017.- 20 yanvar.- S.8.