Elçin Əzizov beynəlxalq opera festivalında uğurla çıxış etdi

Fransanın Lion şəhərində italiyalı bəstəkar Cüzeppe Verdinin şərəfinə Opera Festivalı keçirilir.

Festivalda Verdinin "Atilla", "Makbet" və "Don Karlos" kimi ən məşhur operalarının müasir versiyaları təqdim edilib.

Azərbaycan baritonu, Əməkdar artist, Rusiya Dövlət Akademik Böyük Teatrının ilk azərbaycanlı solisti Elçin Əzizov həmişə olduğu kimi, operasevərlərin, eləcə də avropalı jurnalistlərin diqqətini cəlb edib. Avropanın bir çox mətbuatında Elçin Əzizovun nadir səs tembri xüsusi vurğulanıb.

Hər üç operanın səhnə dekorasiyaları, musiqiləri, ifaçıları haqqında müfəssəl məlumat verilən və onların məziyyətlərinə toxunulan yazılarda avropalı jurnalistlər həmişəki kimi sonda "amma..."nı unutmayıblar. Yeganə azərbaycanlı baritonun əsrarəngiz ifası və nadir səs tembrinin yaratdığı möcüzədən yazanda "amma..." tapmayıblar.

"Makbet" operasında Verdi baş rolu tenora deyil, baritona verməklə mənfi xarakterləri əsərin qəhrəmanı edib, əsərdə təkcə eşq əhvalatını deyil, ehtiras, vicdan narahatlığı kimi mövzuları önə çəkib. Festival çərçivəsində bariton Elçin Əzizov məhz çox çətin hesab edilən Makbet rolunu oynayıb.

Avropanın portalları Elçin Əzizovun zəngin, təmiz və isti tembri ilə Makbetə lirizm xüsusiyyəti verməsindən yazıblar.

Dünyanın müxtəlif ölkələrindən gələn operasevərlər bariton üçün ən çətin rollardan biri hesab edilən "Makbet" tamaşasını bariton Elçin Əzizovun ifasında yüksək qiymətləndiriblər.

"Lion Operasından məni çox dəvət edirdilər, ancaq Moskvada iş cədvəlim sıx olduğu üçün qəbul edə bilmirdim. Bu dəfə Verdinin "Makbet" operasının olacağını eşidən kimi qəbul etdim. Cüzeppe Verdi yüksək dəyərləndirdiyim bəstəkarlardandır və xüsusilə də "Makbet" operasını çox sevirəm. Verdi festivalına hazırlıqla bağlı fevral ayının əvvəlindən Liondayam. Dünyanın tanınmış müxtəlif opera ifaçıları dəvət olunub. Bu müddət ərzində məşqlər edirdik. Məşqlər çətin idi, çünki Makbet rolu ağırdı, üstəlik, vokal üzərində işləmək və italyan dilində ifa etmək lazım idi. Bu baxımdan gərgin işləmək lazım olduğunu bilirdim. Bununla belə, qəbul etdim. Festival müddətində "Makbet" 7 dəfə təqdim olunacaq. Son tamaşamız aprelin 16-da olacaq. Mənim üçün əsl mükafat tamaşaçıların alqışları və məni sevmələridir", - deyə Elçin Əzizov bildirib.

XƏDİCƏ

525-ci qəzet 2018.- 5 aprel.- S.8.