Xalq yazıçısı Anarın müsahibəsi Türkiyə mətbuatında

Bugünlərdə Türkiyənin "Yeni Şəfəq" qəzetinin mədəniyyət müxbirlərinin Azərbaycanın Xalq yazıçısı Anarla müsahibəsi yayımlanıb.

Yazıçının 80 illik yubileyi ərəfəsində baş tutan müsahibədə atası Rəsul Rzanın görkəmli türkiyəli şair Nazim Hikmətlə dostluğundan, özünün ədəbiyyata gəlişindən, "altmışıncılar" nəslindən, valideynləri - Azərbaycanın tanınmış şairləri Rəsul Rza və Nigar Rəfibəylinin onun yaradıcılığına təsirindən, ədəbi görüşlərindən, ssenarist kimi fəaliyyətindən, Türkiyədə müəllim olduğu illərdən danışılıb. Yazıçı fəaliyyətinin çoxşaxəliliyini belə xarakterizə edir: "Teatr və kinoyla da yaxından maraqlandım, rejissorluq təhsili alıb filmlər çəkdim, özümü tək sahəylə məhdudlaşdırmaq istəmədim".

Nazim Hikmətin Rusiyaya qaçdığı zamanlarda ən yaxın dostlarından birinin atası Rəsul Rza olduğunu deyən Anar, həmin illəri müsahibəsində belə xatırlayıb: "Nazim Hikmət Bakıya gələndə ilk gəldiyi ev bizim ev idi. Atamla dərdləşərdilər. Gənclik illərimdə Nazim Hikmətlə tanış olub, söhbət etmək imkanı tapdım".

Müsahibin valideynləri ilə bağlı xatirələri də maraq doğurur. O, "atanız və ananız da böyük şairlərdir. Sizə yazmağınız üçün təsir etdilərmi?" sualına belə cavab verib:

"Yox, elə olmadı, amma mən ilk yazımı 14 yaşımda yazıb ata və anama oxuyanda atam "sən də yazıçı oldun" - dedi. Amma 21 yaşıma qədər yazdığım yazıların heç birinin çap olunmağına icazə vermədi. "Ötən ilin son gecəsi" adlı hekayəmi yazanda oxudu və "bunu çap etdirə bilərsən" dedi və ilk yazım jurnalda belə çıxdı".

Xalq yazıçısı Türkiyədə yaşadığı və işlədiyi zamanları isə bu cür xatırlayıb və özünün həmin illərdə qələmə aldığı "Otel otağı" əsəriylə bağlı maraqlı əhvalatı oxucularla bölüşüb: "1993-cü ildə Memar Sinan Universitetində müəllim işlədim. Türkiyə ilə bağlı müşahidələrimi "Otel otağı" kitabımda yazdım. Bu kitabım Everest Yayınları arasında "Sırasəlvilərdə bir otel odası" adıyla çap olundu. İstanbuldaykən kitabda adı çəkilən Sırasəlvilərdəki "Vardar otel"ə getdik, şəkil çəkilməliydi. Otel əməkdaşları ilə çəkiliş vaxtı söhbət edərkən mənim kitabın müəllifi olduğumu öyrəndilər və dedilər ki, insanlar otelə gəlib cinayətin hansı otaqda olduğunu soruşurlar. Bizim mənfi reklamımızı etdiniz, insanlar bunu həqiqət hesab edirlər".

Şahanə MÜŞFİQ

525-ci qəzet 2018.- 10 aprel.- S.5.