Bakıda türkiyəli xanım rəssamların sərgisi açıldı

Aprelin 19-da Müasir İncəsənət Mərkəzində Azərbaycan Rəssamlar İttifaqı və Türkiyənin ölkəmizdəki səfirliyinin mədəniyyət və tanıtma müşavirliyinin təşkilatçılığı ilə türkiyəli xanım rəssamların əsərlərindən ibarət sərgi açılıb.

Açılış mərasimində hər iki ölkənin tanınmış mədəniyyət xadimləri, rəssamlar, sənətsevərlər və media nümayəndələri iştirak ediblər.

Tədbiri giriş sözü ilə açan Azərbaycan Rəssamlar İttifaqının sədri, Xalq rəssamı Fərhad Xəlilov hər iki ölkə arasındakı dostluq-qardaşlıq münasibətlərindən və bu doğmalığın sənətdə, mədəniyyətimizdəki əksindən danışıb. Deyib ki, Azərbaycanla Türkiyə arasındakı milli və mədəni yaxınlıq hər iki xalqın dünyagörüşünə də bilavasitə təsir edir. Buna görə də sənət adamları bu yaxınlığı daha da sıxlaşdırmaq üçün çalışmalıdırlar.

Sərginin Müasir İncəsənət Mərkəzində keçirilməsinin heç də təsadüf olmadığını vurğulayan F.Xəlilov bu ocağın hər zaman əsl sənətə, mədəniyyətə açıq olduğunu deyib. Onun sözlərinə görə, sərgidə yer alan əl işlərinin müəlliflərinin xanımlar olması da rəsm əsərlərindəki incəlik və zərifliklə özünü göstərir.

Türkiyənin Azərbaycandakı səfirliyinin mədəniyyət və tanıtma müşaviri İrfan Çiftçi çıxışında deyib ki, Azərbaycan rəsm və tətbiqi sənətinə görə, Türkiyədən daha çox inkişaf etmiş ölkədir: “Türkiyənin bütün sahələrdəki inkişafı göz önündədir. Lakin əl işi sənətlərində, xüsusən, rəssamlıq, heykəltəraşlıq kimi incəsənət növlərində Azərbaycandan bəhrələnə biləcəyi çox cəhətlər var. Biz bu sənətlərdəki fəaliyyətimizi mümkün olduqca sistemləşdirməliyik. Məsələn, keçmişdəki bir ustad rəssamla müasir rəssamın yaradıcılığındakı oxşarlıqları mövzu alaraq sərgilər təşkil edə, bununla müəllim-şagird münasibətlərini ön plana çıxara bilərik. Bizim iki xalq olaraq bu cür mədəni münasibətlərimizi daha da dərinləşdirməyimiz lazımdır. Bizim bir-birimizdən öyrənəcəyimiz çox şey var. Mən də başda Azərbaycan Rəssamlar İttifaqı və sədri Fərhad müəllim olmaqla, bu sərgidə əməyi keçən hər kəsə təşəkkür edir, rəssamlarımıza uğurlar arzulayıram”.

Azərbaycana gəlməyindən böyük məmnunluq duyduğunu ifadə edən türkiyəli rəssamlardan Funda Daraqçıoğlu Türkiyədəki fəaliyyətləri, sərginin yaranma ideyası və bu sərgidə nümayiş olunan əsərlər barədə məlumat verib: “Mənim İstanbulda öz emalatxanam var. Biz orada yeni rəssamlar yetişdiririk. Artıq bir çox tələbələr tələbə olaraq deyil də, iş yoldaşı kimi bizimlə çalışırlar. Hamısı təcrübəli sənətçilərdir. Bizim tez-tez xarici ölkələrə səfərlərimiz olur. Azərbaycanda sərgi açmaq istəməyimizin əsas səbəbi də buranın mədəniyyət, incənət sahəsində olduqca üst səviyyədə qərar tutmasıdır. Biz azərbaycanlı rəssam dostlarımızla daha öncədən tanış idik, bir festivalda birgə çalışmışdıq. İşlərimiz adətən fiqurativdir. Tarixdən, Anadoludan, mifologiyadan, Orta Asiya dəyərlərindən və iki ölkənin mədəni köklərindən təsirlənərək çalışırıq. Tarixi motivlər bizim üçün çox önəmlidir. İşlərimizdə simvollardan istifadə edirik. Yaşadığımız coğrafiyadan, yetişdiyimiz ölkədən, əlaqələrimizin olduğu ölkələrdən aldığımız ortaq dəyərləri öz əsərlərimizdə əks etdirməyə çalışırıq”.

Daha sonra qonaqlar sərgidə nümayiş etdirilən rəsm əsərləri ilə tanış olublar.

Şahanə MÜŞFİQ

525-ci qəzet 2018.- 21 aprel.- S. 23.