İsa Həbibbəyli VII Beynəlxalq Altay topluluqları konfransında

MONQOLUSTANA SƏFƏR ÇƏRÇİVƏSİNDƏ AMEA-nın VİTSE-PREZİDENTİ BİR SIRA GÖRÜŞLƏR KEÇİRİB

Azərbaycan Milli Elmlər Akademiyası (AMEA) Monqolustanın paytaxtı Ulan-Batorda keçirilən VII Beynəlxalq Altay topluluqları konfransında təmsil olunub.

Türkiyə Altay Topluluqları Qurumunun Monqolustan Elmlər Akademiyası və Monqolustan Texnologiya İnstitutu ilə birgə təşkil etdikləri beynəlxalq elmi konfransda görkəmli alimlər elmi məruzələrlə çıxış ediblər.

AMEA-nın vitse-prezidenti, akademik İsa Həbibbəylinin "Gəmiqaya-Qobustan qayaüstü rəsmlərindən Orxon yazılarınadək" mövzusunda elmi məruzəsi dinlənilib. Məruzədə Gəmiqaya-Qobustan qayaüstü rəsmlərindəki piktoqraflar və damğaların ümumtürk yazı mədəniyyətinin formalaşmasındakı rolundan və Orxon abidələrində Azərbaycan ədəbiyyatı və mədəniyyəti ilə səsləşən motivlərdən bəhs olunub.

Daha sonra Monqolustan Elmlər Akademiyasında keçirilmiş görüşdə AMEA ilə əlaqələrə dair məsələlər müzakirə edilib.

Monqolustan Elmlər Akademiyasının prezidenti, akademik Duqer Reqdelin iştirakı ilə aparılan müzakirələrdə qarşılıqlı elmi əlaqələrin daha da genişləndirilməsi məsələləri nəzərdən keçirilib. Qarşıdakı dövrdə Azərbaycan və Monqolustan alimlərinin iştirakı ilə Bakıda və Ulan-Batorda Orxon yazılı abidələrinə və ortaq tarixi problemlərə həsr olunmuş birgə elmi tədbirlərin keçirilməsi barədə razılıq əldə olunub.

Akademik İ.Həbibbəyli Beynəlxalq Monqolşünaslar Assosiasiyasının üzvü seçilib.

Monqolustanda keçirilmiş tədbirlər çərçivəsində Azərbaycan Milli Elmlər Akademiyası Nizami Gəncəvi adına Ədəbiyyat İnstitutu ilə Monqolustan Elmlər Akademiyasının Dil və Ədəbiyyat İnstitutu arasında qarşılıqlı əlaqələrə dair müqavilə imzalanıb. Müqaviləni Azərbaycan tərəfdən Nizami Gəncəvi adına Ədəbiyyat İnstitutunun direktoru, akademik İ.Həbibbəyli, Monqolustan tərəfdən isə Dil və Ədəbiyyat İnstitutunun direktoru, professor Gaaadamba Bilquudei imzalayıb.

Professor G.Bilquudei Nizami Gəncəvi adına Ədəbiyyat İnstitutunun 85 illik yubileyi tədbirlərinə dəvət olunub.

Bundan əlavə, AMEA-nın vitse-prezidenti, akademik İ.Həbibbəyli tanınmış monqol şairi və ədəbiyyatşünası, professor Dojooqiyn Sedevlə görüşüb. Monqolustan Yazıçılar İttifaqının sədri kimi 1973-cü ildə böyük Azərbaycan şairi İmadəddin Nəsiminin 500 illik yubileyi tədbirlərində iştirak və çıxış etmiş D.Sedev ölkəmiz haqqında, Neft Daşlarına və Qobustana səfərləri, xalq şairi Səməd Vurğunun ev muzeyində olması, xalq yazıçısı Mirzə İbrahimovla görüşləri barədə xoş təəssüratlarını bildirib.

Görüşdə görkəmli monqol şairinin xatirələrinin Azərbaycan mətbuatında çap olunmasının təmin ediləcəyi bildirilib.

AMEA-nın vitse-prezidenti Beynəlxalq Altay Topuluqlarının VII konfransında iştirak edən Türkiyənin İstanbul Maltəpə Universitetinin dekanı, professor Ramazan Qorxmaz və Monqolustan Elmlər Akademiyasının Tarix, Arxeologiya və Etnoqrafiya İnstitutunun direktoru, professor Çuluun Sampildondovla birlikdə Monqolustandakı məşhur Bilgə Kağan, Gültegin və Tonyukuq məzarüstü Orxon yazılı abidələrilərini ziyarət ediblər.

Qeyd edək ki, konfransda Azərbaycan, Türkiyə və Monqolustanla yanaşı, Rusiya, Çin, Hindistan, Yaponiya, Cənubi Koreya, Qazaxıstan, Vyetnam, Qırğızıstanın elmi qurumları və ali məktəblərinin təmsilçiləri də olublar.

C.ABASOV

525-ci qəzet 2018.- 15 avqust.- S.5.