“Göz həkimi”nin nisgilli şöhrəti - Cavid
Qədir yazır
YAXUD VƏFA
FƏTULLAYEVANIN İMTİNALARI VƏ İTKİLƏRİ
Cavid QƏDİR
Bu gün unudulmaz
aktrisa Vəfa Fətullayevanın doğum
günüdür. Hamımızın
sevimli “Göz həkimi”... Hətta baxmayanların da dillər əzbəri olan televiziya tamaşasında əsas rollardan birini oynayan sevimli sənətkarımız... Azərbaycan milli
səhnəsində misilsiz
dramatik rollar ifaçısı. Tükənməz
coşğu, səngiməz
temperament, emosiyalar daşıyıcısı...
Romantik aktyor məktəbinin görkəmli nümayəndəsi
olmaqla bərabər,
realist üslubda da möhtəşəm sənət
nailiyyətləri qazanan
Vəfa Fətullayeva
1945-ci ilin avqustun 25-də,
görkəmli aktrisa Hökümə Qurbanova və rəssam Nüsrət Fətullayevin
ailəsində doğulub...
Anası, o illərdə Rəsul Rzanın eyniadlı pyesində oynadığı
obrazın şərəfinə
qızının adını
Vəfa qoyub. İlk dəfə 8-9 yaşı
olanda böyük səhnəylə tanış olur gələcək aktrisa. Şekspirin “Qış nağılı” tamaşasında
elə anasının
övladı rolunda, həm də oğlan kimi... Kralın oğlu rolunu oynayan balaca Vəfa öz səhnə həyatının
konturlarını cızmışdı
ilk roluyla. Həmişə
ucada, birinci olmaq üçün çıxacaqdı səhnəyə...
Bütün ailəsi, qohumları incəsənət fədailərindən
ibarət olub qəhrəmanımızın. Atası Azərbaycan
teatr sənətinin
ilk tərtibatçı-rəssamı, anası sevilən aktrisa, əmisi aktyor Fateh Fətullayev,
əmisi oğlu musiqişünas Hafiz Fətullayevdir.
***
Gənc yaşında ailə quran Vəfa xanımın evlilik həyatı səhnədəki
kimi uğurlu alınmır.
Zaur Nağıyev
adlı idmançıyla
bir-birlərini sevərək
qısa zamanda ailə həyatı qururlar. Zaur onun sənətə,
səhnəyə olan
sevgisini anlamaq, tamaşaçılarla paylaşmaq
istəmir. Həyat yoldaşını
yalnız evinin xanımı, uşaqlarının
anası görmək
arzusuyla işindən
uzaqlaşdırmağa çalışır.
Amma Vəfa üçün hər şeydən öncə sənətdi,
səhnəsiz yaşaya
bilməzdi. Ona görə
də ayrılmağa
qərar verir, atası evində dönür.
Hökümə xanım qızını öz davamçısı
kimi görmək, yetişdirmək arzusunda olduğu üçün
Vəfanın qərarını
normal qarşılayır.
Vəfa Fətullayeva anasının
təkidilə Teatr İnstitutunun (indiki Mədəniyyət və
İncəsənət Universiteti)
Rejissorluq fakültəsinə
daxil olur. Rejissor Məhərrəm
Haşımovun kursuna
düşən gələcək
aktrisa xarici görkəminə fikir vermədiyindən sürətlə
kökəlir. Bu, kurs rəhbərinin də diqqətindən yayınmır. Dərslərin birində “Qız, sən yaman kökəlirsən, bunun axırı hara gedəcək?” - deyir. Yarızarafat-yarıciddi deyilmiş sözlər
Vəfanın qərar
verməsində təkan
olur. Bir müddət dərsə
gəlməyən gənc
qız bu dəfə heç kimlə məsləhətləşmədən
Teatrşünaslıq fakültəsinə
keçir.
1970-ci ildən etibarən
Akademik Milli Dram Teatrında işləməyə
başlayır. Qısa zamanda tamaşaçıların
rəğbətini qazanır.
Vəfa xanımın teatr səhnəsində ilk rolu
“Məhv olmuş gündəliklər” tamaşasındakı
Fəridə olur. Ardınca
“Mahnı dağlarda qaldı” tamaşasında
Gülgəz, “Məhəbbət
əfsanəsi”ndə Şirin,
“Müsyö Jordan və
Dərviş Məstəli
şah”da Şərəfnisə,
“Heç nədən
hay-küy”də Beatriç
kimi fərqli obrazları ustalıqla canlandırır.
“Göz həkimi”
televiziya tamaşası
isə Vəfa Fətullayevanın özünü
peşəkar aktrisa kimi təsdiqləməsində
önəmli rol oynayır. Geniş tamaşaçı auditoriyasına çıxışını
təmin edir.
Bu roldan sonra şöhrət Vəfa Fətullayevaya gülümsəməyə
başlayır. Müxtəlif səpkili ekran
əsərlərinə çəkilir,
televiziya tamaşalarında,
səhnə əsərlərində
yer alır, tamaşaçıların sevimlisinə
çevrilir. 1982-ci ildə, 37 yaşında respublikanın Əməkdar
artisti adını alır. O vaxt bu yaşda fəxri
ad almaq nadir aktyorlara, aktrisalara nəsib olurdu.
***
Ailə həyatının uğursuz alınması aktrisanı uzunmüddətli depressiyaya salır. Vəfa Fətullayeva günlərlə teatra gəlmir, ünsiyyətdən qaçır. Belə çətin, ağrılı məqamda aktrisanın həmkarı Fuad Poladovla münasibətləri başlayır. Ancaq bu dəfə Hökümə Qurbanova qızının Poladovla ailə həyatı qurmasına qarşı çıxır. Yayılan söz-söhbətlərdə deyilir ki, anası Vəfanın ikinci dəfə “ya səhnə, ya ailə” dilemması qarşısında qalmaması üçün belə edir. Bütün bunlara rəğmən, Fuad Poladovla Vəfa Fətullayeva uzun illər bir-birlərinə sevgi bəsləyiblər. Maraqlıdır ki, hər iki sənətkar, neçə illər arayla, eyni ayda, eyni xəstəlikdən dünyasını dəyişib. Ölüm günləri arasında cəmi 16 gün fərq var. 1987-ci ilin mayın 21-də səhnəmizin unudulmaz “Göz həkimi” gözlərini əbədi yumdu.
Vəfa xanımdan iki ay sonra atası Nüsrət Fətullayev, bir il sonra anası Hökumə Qurbanova dünyasını dəyişib.
Deyilənə görə, Hökümə xanım şəxsi həyatını məşhurluğa, şan-şöhrətə qurban verdiyi qızının taleyinin belə acınacaqlı nəticələnməsində özünü günahkar bilirmiş, elə bu günah duyğusu da onu tezliklə məzara aparıb.
***
Vəfa Fətullayeva həyatla səhnə arasındakı pərdəni götürməyin tərəfdarıydı. Səhnədə də həyatda olduğu kimi sadə, təbii olmağa üstünlük verirdi. Sənətə şöhrət üçün yox, yaşamaq, yaratmaq, tamaşaçını səhnənin reallığına inandırmaq üçün gəlmişdi. Elə sona qədər də belə qaldı: həmişə məlum-müşkül baxan, gülüşündən də kədər tökülən gözəl aktrisa kimi.
525-ci qəzeti 2018.- 25 avqust.- S.16.