Ümummilli lider Heydər Əliyev mədəniyyət ocaqlarında anıldı

Dekabrın 11-də Müslüm Maqomayev adına Azərbaycan Dövlət Akademik Filarmoniyasında xalqımızın Ümummilli lideri Heydər Əliyevin xatirəsinə həsr edilmiş "Sönməzdir, əbədidir Heydər Əliyev!" adlı anım gecəsi təşkil olunub.

Xalq artisti Rauf Abdullayevin bədii rəhbəri və baş dirijoru olduğu Üzeyir Hacıbəyli adına Dövlət Simfonik Orkestrinin ifasında Qara Qarayevin "Matəm odası" səslənib. Orkestrin ifası zamanı monitorda ümummilli liderin həyat və fəaliyyətinə həsr olunmuş videofraqmentlər nümayiş etdirilib.

Tədbirdə qeyd olunub ki, Heydər Əliyev xalqımızın yaddaşına əbədi həkk olmuş dahi şəxsiyyətdir. Əsası ulu öndər Heydər Əliyev tərəfindən qoyulmuş bu siyasəti hazırda Prezident İlham Əliyev uğurla davam etdirir.

Sonra Qara Qarayevin "Leyli və Məcnun" simfonik poeması, Frans Şubertin "8-ci Simfoniya"sı səsləndirilib.

Soltan Hacıbəyovun "Karvan" simfonik lövhəsi ilə davam edən anım gecəsi Fikrət Əmirovun "Azərbaycan kapriççiosu"nun ifası ilə başa çatıb.

Dünən Heydər Əliyev Sarayında da Ulu Öndərin anım mərasimi keçirilib.

Ümummilli lider Heydər Əliyevin vəfatının 15-ci ildönümü münasibətilə təşkil edilən tədbirdə sarayın direktoru, Əməkdar mədəniyyət işçisi Fərhad Babayev çıxış edərək Ulu Öndərin şərəfli həyat yolundan, xalqı qarşısında misilsiz xidmətlərindən və mədəniyyət və incəsənətimizin inkişafı istiqamətində həyata keçirdiyi tədbirlərdən bəhs edib.

Vurğulanıb ki, görkəmli dövlət xadimi, dünya miqyaslı siyasətçi, Azərbaycan milli dövlətçiliyini bütün təhlükələrdən xilas edib qoruyan və inkişaf etdirən qüdrətli şəxsiyyət kimi Heydər Əliyevin həyat və fəaliyyəti müasir tariximizin ən mühüm və şərəfli mərhələsini təşkil edir.

Sonda mərasim iştirakçıları müasir Azərbaycan dövlətinin qurucusu və memarını dərin hörmət və ehtiramla yad ediblər. Çıxış edənlər ulu öndərin həyatı, fəaliyyəti, respublikamızın mədəni həyatında etdiyi yeniliklərdən, uğurlu layihələrdən, ölkəmizin inkişaf və tərəqqisi naminə gərgin əməyindən danışıblar.

Sonra Heydər Əliyev Sarayının rəhbərliyi və kollektivi xalqımızın umummilli liderinin Fəxri xiyabandakı məzarını ziyarət edib, məzarı üzərinə tər çiçəklər düzüblər.

Bakı Xoreoqrafiya Akademiyası Təhsil Kompleksi də Heydər Əliyevin anım günü münasibəti ilə "Əbədiyaşar Lider" adlı tədbir keçirib.

Mərasimdə rektor Timuçin Əfəndiyev, professor-müəllim heyəti, tələbələr və qonaqlar iştirak ediblər.

Tədbir iştirakçıları öncə ulu öndərin akademiyanın foyesindəki büstü önünə gül dəstəsi qoyub, xatirəsini bir dəqiqəlik sükutla yad ediblər.

Tədbiri giriş sözü ilə professor T.Əfəndiyev açaraq Heydər Əliyevin həyat və fəaliyyətinə nəzər salıb. Professor çıxışında qeyd edib ki, müstəqil Azərbaycan dövlətinin memarı və qurucusu Heydər Əliyev özünün bütün həyat və fəaliyyətini Azərbaycan xalqının və respublikamızın hərtərəfli inkişafına və çiçəklənməsinə, azərbaycançılıq ideyasının milli şüurda qərarlaşmasına, dövlət quruculuğuna, müstəqil dövlətçiliyin möhkəmlənməsi və yüksəlməsinə, Azərbaycan mədəniyyətinin və incəsənətinin bütün dünyada tanınmasına həsr edib, bu sahədə misilsiz xidmətlər göstərib.

Anım mərasiminin "Ulu öndər əbədi xatirələrdə" adlı bədii hissəsində isə Heydər Əliyeva həsr olunmuş şeir və mahnılar BXA-nın tələbələri tərəfindən ifa olunub

Tədbir ulu öndərin həyat və fəaliyyətini əks etdirən video süjetin nümayişi ilə başa çatıb.

Şahanə MÜŞFİQ

525-ci qəzet 2018.- 13 dekabr.- S.7.