Ünsiyyət

Məmməd Oruca

Yaxşı ki, sən varsan bu gen dünyada

Doğmadan doğmasan, həyansan yada.

Sənin mərhəmətin elindən böyük

Özündən ağırdır daşıdığın yük...

Burdan Amerikaya əl uzadardın,

Yazıçı Eminlə məktublaşardın.

Yaxşı yadımdadır o yazışmalar:

Çiçəyin üstünə qar yağırdı, qar...

Mən Emin qardaşı indi anıram,

Qürbətdə yanana mən də yanıram.

Ovutmaq istədin onun dərdini,

Necə ovudasan yurd həsrətini?

İndi də sən bizə gəlib-gedirsən

Yollarda nə qədər vaxt itirirsən...

Bu gün yenə gəldin, şahmat oynadıq,

Emini, Əhədi, Rövşəni andıq...

Yenə çay dəmlədin öz evin kimi,

Qovdun qəlbimdəki nisgili, qəmi.

Mənimçün havadır, sudur ünsiyyət,

Ünsiyyətdən doğur dosta məhəbbət...

10 Dekabr, 2018.

Səyavuş MƏMMƏDZADƏ

525-ci qəzet.- 2018.- 22 dekabr.- S.17.