Pedaqoji Universitetin tələbələri Xalq yazıçısı Anarın pyesini səhnələşdiriblər

Azərbaycan Dövlət Pedaqoji Universitetinin tələbələri Anarın “Keçən ilin son gecəsi” əsəri əsasında eyniadlı tamaşa hazırlayıblar.

Tamaşanın quruluşçu rejissoru Xalq artisti Ramiz Həsənoğlu, quruluşçu rəssamı Mustafa Mustafayev, prodüseri Pərvin Nurəliyevadır.

Gənc Tamaşaçılar Teatrının dəstəyi ilə ərsəyə gələn səhnə əsərində universitetin tələbələri - Samir Canızadə, Eltun Süleymanov, Həmid Yolçiyev, Qərib Əliyev, Əkbər Novruzov, Süleyman Süleymanov, Asiman Quliyeva, Günay Veysəlova, Lamiyə Rzayeva, Miradə Axundova, Aişə Bayramlı, İlahə Rüstəmova, Günel Mahmudova, Gülnar Şərifli rol alıblar. Tamaşanın premyerası 27 dekabr, saat 14:00-da Gənc Tamaşaçılar Teatrında baş tutacaq.

Qeyd edək ki, Anarın ilk mətbu hekayəsi “Keçən ilin son gecəsi” əsəri əsasında yazmış olduğu pyesə ilk dəfə Gənc Tamaşaçılar Teatrında 1968-ci ildə rejissor Ulduz Əliyeva-Rəfili quruluş verib. Həmidə xala rolunu Firəngiz Şərifova canlandırıb.

Moskvanın Mərkəzi televiziyası həmin hekayəni səhnələşdirərək iki dəfə iki müxtəlif quruluşda Birinci proqramla nümayiş etdirib. Birinci quruluşda (8 yanvar 1967-də efirə getmişdir, rejissor B.Talmazov) Həmidə xala rolunda SSRİ xalq artisti L.Dobrjanskaya, ikinci quruluşda (5 yanvar 1968-də efirə getmişdir, rejissor Rıjov) həmin rolda RSFSR Xalq artisti Fadeyeva çıxış edib. Həmçinin əsərə Azəbaycan televiziyasında Ramiz Həsənoğlu quruluş verib. Həmidə xala rolunu Zərnigar Ağakişiyeva ifa edib. "Azərbaycanfilm" kinostudiyasında isə Anarın ssenarisi əsasında "Ötən ilin son gecəsi" filmi çəkilib. Quruluşçu rejissorlar Gülbəniz Əzimzadə və Şahmar Ələkbərov, Həmidə xala rolunu isə Elmira Şabanova ifa edib.

Beləliklə, son dərəcə uğurlu səhnə və ekran həyatı yaşayan əsərə bu dəfə tələbələrin yazıçının 80 illik yubileyi münasibətiylə müraciət etməsinin, həm də Ramiz Həsənoğlunun bu tamaşaya quruluş verməsinin xüsusi əhəmiyyəti var. Tamaşada əsərin dərin fəlsəfi mənası ilə yanaşı, həm də müasir dövrümüzlə səsləşəcək ideyalar irəli sürülüb.

525-ci qəzet.- 2018.- 27 dekabr.- S.8.