Azərbaycanla Türkiyənin "Qardaş məktəb"i açıldı

Dünən Azərbaycan Milli Konservatoriyası nəzdində İncəsənət Gimnaziyasında Gimnaziya ilə Türkiyənin Bursa Zeki Müren İncəsənət Liseyi arasında "Qardaş məktəb" layihəsinin açılış mərasimi keçirilib.

Azərbaycan və Türkiyənin təhsil nazirliklərinin dəstəyi ilə həyata keçirilən layihə çərçivəsində İncəsənət Gimnaziyasının dəvəti ilə Bursa İncəsənət Liseyindən 15 nəfərlik nümayəndə heyəti Bakıya gəlib. Azərbaycan Milli Konservatoriyasının rektoru, Xalq artisti Siyavuş Kəriminin rəhbərliyi ilə baş tutan tədbirdə iki ölkədən rəsmi şəxslər, məktəb direktorları, görkəmli mədəniyyət xadimləri və media nümayəndələri iştirak ediblər.

Tədbiri giriş sözü ilə açan gimnaziyanın direktoru Aytən Əhmədova qonaqları salamlayaraq, layihə haqqında geniş məlumat verib, çox qədim köklərə malik Azərbaycan-Türkiyə qardaşlığının bu layihə sayəsində daha da möhkəmlənəcəyinə inandığını vurğulayıb.

Təhsil Nazirliyinin şöbə müdiri Emin Əmirullayev bildirib ki, İncəsənət Gimnaziyasının nazirlik üçün xüsusiləşmiş təhsil mərkəzidir: "Burada bizim müstəqilliyimizin gənc ulduzları yetişir. Demək olar ki, hər il burada təhsil alan şagirdlərimiz müxtəlif mükafatlara layiq görülür, beynəlxalq tədbirlərdə ölkəmizi layiqincə təmsil edirlər. İnanıram ki, bu gün təməli qoyulan bu layihə vasitəsilə onların özlərini tanıdacaqları üfüqlər daha da genişlənəcək. İki ölkənin qabaqcıl təhsil ocaqları arasında yaradıcılan bu əlaqə xüsusilə təqdirəlayiqdir".

Türkiyənin Azərbaycandakı səfirliyinin Mədəniyyət və Tanıtma müşaviri İrfan Çiftçi çıxışında layihənin ən önəmli tərəfinin iki təhsil ocağının fəaliyyətinin, şagirdlərinin dəyişimi olduğunu deyib: "Biz Türkiyə Cümhuriyyəti olaraq, hazırda çıx ciddi sıxıntılar yaşayır, ağır savaşlardan keçirik. Demək olar ki, hər gün şəhidlər veririk. Eləcə də Azərbaycanın uzun illərdir məruz qaldığı Qarabağ problemi hələ də davam etməkdədir. Ancaq həyat davam edir. Bizim bu savaşlara, sıxıntılara qalib gəlməyimizin bir yolu da sənəti, mədəniyyəti inkişaf etdirməkdir. Sənət özü necə mürəkkəbdirsə, onun tədrisi, təhsili də çox çətin prosesdir. Bu məktəblərin rəhbərlikləri bu çətinin öhdəsindən layiqincə gəlirlər. Mən bu münasibətlə onları təbrik edirəm. Sənətin olduğu yerdə hər zaman zəriflik, incəlik, estetika, mədəniyyət olacaq. Dünyanı, insanlığı siyasət, texnologiya deyil, ancaq sənət qurtaracaq. Mən buna həm də bir şair kimi çox inanıram. Bu iki təhsil ocağının şagirdləri bir-birinin ölkəsinə gedərək həmin ölkənin mədəniyyətini, incəsənətini öyrənəcək, öz yaradıcılıqlarında təbliğ edəcəklər. Biz də səfirlik və müşavirlik olaraq, hər zaman sizin yanınızdayıq".

Türkiyəli qonaq Rəmzi Ayaz Azərbaycan və Türkiyənin tarix boyunca ən çətin, ağır məqamlarında bir-birinin yanında olduqlarını, bir-birinə kömək əllərini uzatdıqlarını xüsusi xatırladaraq qeyd edib ki, uzaq keçmişdən gələn bu mənəvi birliyi layiqincə davam etdirib gələcək nəsillərə ötürmək indi hər kəsin ən ümdə vəzifəsi olmalıdır.

"Bu gün Ümumilli lider Heydər Əliyevin "bir millət, iki dövlət" fikrinə layiqincə əməl etdik"- deyən layihənin rəhbərləri Günay Mehdizadə və Seyfəddin Yıldırım sevinclərini dilə gətirib, təməlini qoyduqları bu ənənənin gələcəkdə də davam edəcəyinə inandıqlarını dilə gətiriblər.

Azərbaycan Milli Konservatoriyasının rektoru, Xalq artisti Siyavuş Kərimi iki ölkə arasında mədəni əlaqələrin möhkəmlənməsi istiqamətində belə layihələrin böyük önəm daşıdığını qeyd edib.

Daha sonra tədbir azərbaycanlı və türkiyəli məktəblilərin ifasında konsert proqramı ilə davam edib. Konsertdə M.Maqomayevin "Azərbaycan", "Cəngi", F.Əmirovun "Vals", "Elegiya", Aqşin Əlizadənin "Rəqs", Muammer Sunun "Göçekçe", Niyazinin "Xoreoqrafik vals" və s. əsərlər, "Qoy, gülüm gəlsin" xalq mahnısı, "Qarabağ şikəstəsi" və bu il 120 illik yubileyi qeyd olunan dahi sənətkar Bülbülün yaradıcılığına həsr olunmuş kiçik səhnə təqdim olunub.

Daha sonra İrfan Çiftçi, Emin Əmirullayev, Rəmzi Ayaz, Seyfəddin Yıldırım, Aytən Əhmədova, Günay Mehdizadə, Siyavuş Kərimiyə hər iki təhsil ocağının hazırladığı xüsusi mükafatlar təqdim olunub.

Konsert proqramının sonunda gimnaziyada təşkil olunmuş Türkiyə-Azərbaycan qardaşlığını əks etdirən sərginin də açılışı olub.

Şahanə MÜŞFİQ

525-ci qəzet.- 2018.- 16 fevral.- S.8.