Xocalı qurbanları Xoreoqrafiya Akademiyasında anıldı

Bakı Xoreoqrafiya Akademiyası Təhsil Kompleksində (BXA) Xocalı soyqırımının 26-cı il dönümünə həsr olunmuş tədbir keçirilib.

Anım tədbiri dövlət himninin səslənməsi və soyqırım qurbanlarının xatirəsinin bir dəqiqəlik sükutla yad edilməsi ilə başlayıb.

Tədbiri giriş sözü ilə açan akademiyanın rektoru, professor Timuçin Əfəndiyev Xocalı faciəsi haqqında danışaraq erməni silahlı dəstələri tərəfindən xalqımıza qarşı törədilən bu cinayət hadisəsi zamanı dinc əhalinin xüsusi qəddarlıqla qətlə yetirildiyini, əsir götürülən insanların isə dəhşətli işgəncələrə, zülm və təhqirlərə məruz qaldıqlarını bildirib. “Xocalı qətliamı Azərbaycan xalqına qarşı Ermənistan-Azərbaycan müharibəsi dövründə vurulmuş ən ağır zərbədir” - deyə, professor qeyd edib.

Daha sonra akademiyanın tam orta məktəbinin şagirdləri, orta ixtisas (kollec), bakalavr və magistr pillələrinin tələbələri tərəfindən Xocalı faciəsinə həsr olunmuş şeirlər səsləndirilib, “Ağla, Şuşam, ağla”, “Qərənfil” milli rəqsləri, “İki qəlbin dastanı” baleti ifa edilib.

Tədbirdə Xocalı qətliamının ilk şahidi, jurnalistləri bu vəhşiliyin törədildiyi yerə helikopterlə aparan ukraynalı pilot Leonid Markoviç Kraveçin iştirakı ilə Ukraynada yaşayan azərbaycanlıların birləşmiş diaspor təşkilatının Xocalı Faciəsindən bəhs edən sənədli filmi nümayiş olunub.

Sonda akademiya tələbələrinin, Xocalı qətliamından bəhs edən rəsm əsərlərinin sərgisi keçirilib.

Şahanə MÜŞFİQ

525-ci qəzet.-2018.-24 fevral.-S.6.