Gənc rəssamların işləri sərgiləndi

Fevralın 23-də "Ağ Şəhər" qalereyasının açılış mərasimi keçirilib. Mərasimdə həmçinin, gənc rəssamların əl işlərindən ibarət "Nüans" adlı sərgi də nümayiş olunub.

Tədbirdə ziyalılar, mədəniyyət xadimləri, sənətsevərlər və media nümayəndələri iştirak ediblər.

Tədbirin təşkilatçısı İnarə Əliyeva, akademik, YUNESKO Rəssamlar Birliyinin üzvü Sakit Məmmədov, gənc rəssam Leyla Şirəli çıxış edərək sərgi haqqında məlumat verib, bu cür sərgilərin istedadlı gənclərin tanıdılmasında, kəşfindəki böyük əhəmiyyətindən söz açıblar. Bildirilib ki, sərginin əsas məqsədi gənc rəssamların əl işlərinin, yaradıcılıq nümunələrinin daha böyük auditoriyaya təqdimatıdır.

Sərgidə Bakı Musiqi Akademiyasının ikinci kurs tələbəsi, gənc vokalist İslama Abdullayeva caz üslubunda beş dildə mahnılar ifa edib. Azərbaycan, ispan, italyan, ingilis və fransız dillərində dünya şöhrətli mahnıları səsləndirən gənc müğənnini pianinoda Lalə Hüseynzadə müşayiət edib.

İslama Abdullayeva həm də sərgiyə özünün çəkdiyi rəsmlə qatılıb: "Mənim üçün çox sevindirici və həyəcanverici haldır ki, bu gün həyatımda ilk dəfə olaraq mənim çəkdiyim rəsmlərdən biri sərgilənir. Həmin rəsmdə mən çox nadir musiqi alətlərindən olan paqoru çəkmişəm. Həmin musiqi aləti bizdə demək olar ki, tanınmır. Ancaq mən onu burada da tanıtmağa qərarlıyam. Çünki onun həddindən artıq gözəl səsi var. O, ifa olunanda sanki insan danışır".

Şahanə MÜŞFİQ

525-ci qəzet 2018.- 27 fevral. - S.7.