"Külək - Yel kürəsinin şahzadəsi" təqdim olundu

İyulun 6-da Daş Salnamə muzeyində gənc yazıçı Xülya Cəfərovanın yeni çapdan çıxan "Külək - Yel kürəsinin şahzadəsi" kitabının təqdimatı keçirilib.

"ASAN xidmət", Mədəniyyət, Gənclər və İdman nazirlikləri, BMT-nin İnkişaf Proqramı və digər dövlət və özəl qurumlarının dəstəyi ilə təşkil olunan tədbirdə millət vəkilləri, ziyalılar, yazarlar, QHT və KİV nümayəndələri və ASAN könüllülər iştirak ediblər.

Cəlalə Nəzəroğlunun moderatorluğu ilə baş tutan mərasimdə əvvəlcə iştirakçılara kitab haqqında video sorğu, superqəhrəmanlar haqqında video sorğu və "Külək" Yek kürəsinin şahzadəsi" kitabı haqqında fikirlərin əks olunduğu üç videoçarx nümayiş edilib.

Bildirilib ki, fantezi janrında olan bu əsər Azərbaycan ədəbiyyatında ilk milli superqəhrəmanların macəralarından bəhs edən romandır. Bu günlə mistik keçmişi birləşdirən hekayənin əsas qəhrəmanı sehrli qüvvəyə sahib olan Külək adlı balaca qızdır. Yel kürəsinin sakini və şahzadəsi olan Külək təsadüfən Yer kürəsinə səyahət edir və beləliklə, öz planetini şər qüvvələrdən necə xilas edəcəyini öyrənir. Bu işdə ona xeyirxah dostları - özü kimi balaca əkiz bacılar kömək edirlər. Külək və dostlarının başına gələn həm qəribə, həm də oxucunu daim həyəcanda saxlayan hadisələrin çoxu Bakıda, Yanardağda, Atəşgahda, Qız Qalasında cərəyan edir. Əsərdə "Yel Kürəsi"nin fövqəlgüclərə malik olan superqəhrəmanlarının timsalında xeyirlə şərin əbədi mübarizəsinə fərqli bir prizmadan yanaşılıb. Külək, Alov, İşıq, Umaqy, əjdaha Evrən, Simurq quşu, yenilməz bozqurd kimi personajların yer aldığı romanda alternativ reallıqlar ortaya qoyulub və Bakının Qız Qalası, Atəşgah, Yanardağ, İçərişəhər, Bayıl qəsri, Alov qüllələri və s. kimi məkanları mistik bir formada oxucuya təqdim olunub. Həmçinin, romanda qədim türk və Azərbaycan, habelə dünya mifologiyasında da müraciət edilib.

Tədbirdə "ASAN Könüllülük" məktəbinin rəhbəri Cahangir Hacıyev təmsil etdiyi qurumun fəaliyyəti haqqında məlumat verib. Bildirib ki, bu gün təqdimatı keçirilən kitabın müəllifinin "ASAN Könüllülük" məktəbinin 15 min məzunundan biri olması sevindirici haldır.

Gənclər və idman nazirinin müavini İntiqam Babayev çıxışında son dövrlər cəmiyyətin bütün sahələrində gənclərin aktiv iştirakına diqqət çəkib və bildirib ki, bu, dövlətimizin gənclər siyasəti ilə bilavasitə bağlıdır. O, "ASAN Könüllülük" layihəsinin əhəmiyyətini vurğulayıb, buradakı gənclərin gələcəkdə müxtəlif sahələrdə mütəxəssislər kimi çalışacaqlarına əminliyini vurğulayıb.

Çıxışında uşaqlıq xatirələrini yada salan Milli Məclisin deputatı Qənirə Paşayeva bir uşağın tərbiyəsində, cəmiyyətə yararlı fərd kimi yetişməyində nağılların, uşaq ədəbiyyatının önəmini vurğulayıb. O deyib ki, artıq uzun illərdir uşaqlarımız xarici superqəhrəmanları görür, onlara oxşamağa çalışırlar: "Ancaq biz heç zaman milliliyimizi, türklüyümüzü unutmamalıyıq. Biz onlar üçün yeni ədəbiyyat hazırlamalı, cizgi filmləri istehsal etməliyik. Uşaqlar bunlar vasitəsilə həm əylənsinlər, həm də öyrənsinlər. Onlara gözəl örnəklər hazırlamaqla onların tərbiyəsinə, inkişafına bilavasitə təsir etmiş olarıq. Xülya xanımın bu gün təqdim olunan kitabı bizə bu yolda bir işıqdır. Artıq bizim də ədəbiyyatımızda uşaqlarımızın tanış olacağı, özünü bənzətməyə çalışacağı superqəhrəmanlar var. Biz bunun davamlı olmasını diləyir və Xülya xanımın timsalında bütün gənclərimizə uğurlar arzu edirik". Millət vəkili həmçinin qeyd edib ki, hər bir insanın superqəhrəmanı onun öz içərisindədir. Müəllif də bir növ bu roman vasitəsilə oxucuları öz daxillərində olan "fövqəlgücü" kəşf etməyə çağırır.

Müəllifi yeni kitabı münasibətilə təbrik edən Xalq yazıçısı Çingiz Abdullayev gənclərimizin fantastik ədəbiyyata marağının sevindirici hal olduğunu vurğulayıb. O deyib ki, bu cür əsərlər müəllifdən güclü fantastik təxəyyül tələb edir. Bu cür ədəbiyyat həmçinin, uşaqlarımızın təxəyyülünün, xəyaletmə qabiliyyətinin artırılmasında misilsiz rola malikdir.

BMT-nin İnkişaf Proqramının təmsilçisi Məzahir Əfəndiyev, Azərbaycan Respublikasının Prezidenti yanında Dövlət İdarəçilik Akademiyasının professoru, kulturoloq Fuad Məmmədov, Əməkdar artist Tünzalə Ağayeva, uşaq yazıçısı, "İrs" mərkəzinin rəhbəri Solmaz Amanova və başqaları çıxış edərək kitab barədə fikirlərini bölüşüblər və gənc yazıçıya uğurlar arzulayıblar.

Tədbirdə "Külək - Yel kürəsinin şahzadəsi" kitabının ilk balaca oxucuları- Gülcan və Gülnur bacıları da çıxış ediblər. Onlar bu kitabın onların uşaq təfəkkürünə təsirindən, onlarda yaratdığı gözəl düşüncələrdən bəhs edib, kitabın həmyaşıdları üçün gözəl bir ədəbiyyat nümunəsi olduğunu söyləyiblər.

Sonda çıxış edən müəllif Xülya Cəfərova tədbirin təşkilatçılarına və iştirakçılarına təşəkkürünü bildirib. O, gələcəkdə də uşaqlar üçün fantastik hekayələr yazmaq fikrində olduğunu bildirib və qonaqlar üçün kitablarını imzalayıb.

Qeyd edək ki, "Külək - Yel kürəsinin şahzadəsi" kitabı ASAN Könüllülük Məktəbinin dəstəyi ilə "TEAS Press" Nəşriyyat Evi tərəfindən "3 alma" əmtəə nişanı ilə nəşr edilib.

ŞAHANƏ

525-ci qəzet.-2018.- 10 iyul.- S.7.