"Jara" festivalı kimləri narahat edir?

Azərbaycanda növbəti beynəlxalq "Jara" festivalı başlayıb. Paytaxtımızın evsahibliyi etdiyi bu festivala ildən ilə maraq artır.

Eyni zamanda, hər il festival daha maraqlı hazırlanır, tanınmış ulduzların iştirakı ilə konsert proqramları təqdim edilir. Başqa sözlə, "Jara" artıq bütün dünyada Azərbaycan brendinə çevrilməkdədir. Heç şübhəsiz, yaxın gələcəkdə "Jara" nüfuzlu beynəlxalq musiqi festivalları arasında öz yerini tutacaq və daha çox sevilən dünya ulduzlarını bu musiqi bayramında paytaxtımızda görə biləcəyik. Bu il festivalda Monatik, Qriqori Leps, Ani Lorak, Loboda, Emin, A`Studio, Dima Bilan, Sergey Lazarev, Qlyuk'oza, Qradusı kimi məşhur musiqiçilər iştirak edəcək. Amma təəssüf ki, bu tədbirin əhəmiyyətinə, ölkəmizin təbliği baxımından önəminə deyil, onu gözdən salmağa çalışanlar sosial şəbəkələrdə əks kampaniyaya başlayıblar. "Jara" festivalının mahiyyətindən xəbəri olmayanlar daha çox siyasi yanaşma sərgiləməyə çalışırlar. Buna səbəb isə isə rusiyalı müğənni Zara Mqoyanın da festivala dəvət edilməsi və gözlənilən çıxışıdır. Əsas iddia kimi isə guya milliyyətcə erməni olan bu sənətçinin Azərbaycana gəlməsi və festivalda çıxışının yolverilməzliyi fikri irəli sürülür.

Məlumat üçün bildirək ki, bununla bağlı artıq "Jara"nın Təşkilat Komitəsi açıqlama yayıb. Açıqlamada deyilir ki, Azərbaycan dövlətinin yürütdüyü siyasətin əsasını mədəniyyətlərarası və sivilizasiyalararası dialoq təşkil edir. Bunlarla bağlı hər zaman ən yüksək səviyyədə danışılıb. Ölkəmiz hər zaman dialoq və əməkdaşlıq, müxtəlif millətlərdən olan insanlar və mədəniyyətlər üçün meydan olub.

"Hər kəsə məlumdur ki, incəsənət və idman - siyasətdənkənar sahə olaraq, insanları birləşdirir. Bununla bağlı ölkəmizdə "Eurovision" mahnı müsabiqəsi, "Bakı-2015" Birinci Avropa Oyunları, İslam həmrəyliyi oyunları və digər tədbirləri nümunə gətirmək olar. "Jara" festivalı da bu qəbildən olan tədbirlər sırasında öz layiqli yerini tutaraq, artıq üçüncü ildir ki, paytaxtımıza rus şou-biznesinin nümayəndələrini toplayır. Onalrın arasında müxtəlif milliyyətlərin nümayəndələri də var.

Milliyətcə kürd olan müğənni Zara ölkəmizə gələrək, Azərbaycanın qədim mədəniyyəti, zəngin tarixi və əsrarəngiz ənənələri ilə tanış olmaq istəyib. Buna görə də biz, ölkəmizin tolerantlıq və qonaqpərvərliyini təmsil edərək ona "Jara-2018" beynəlxalq festivalında iştirak etməyə imkan yaratdıq", - deyə rəsmi açıqlamada qeyd olunub.

Azərbaycan tarixən bütün dünyada müxtəlif xalqların sülh və qarşılıqlı anlaşma şəraitində yaşadığı, tolerant, bütün dini və milli azadlıqların təmin edildiyi ölkə imicinə malikdir. Müxtəlif millətlər, milli azlıqlar ölkəmizdə sülh, əmin-amanlıq şəraitində yaşayır. Ermənistanda bir azərbaycanlı belə yaşamadığı halda, Dağlıq Qarabağı nəzərə almasaq belə, ölkəmizdə 30 min erməni əsilli vətəndaş yaşayır. Azərbaycanın torpaqlarının işğalında iştirakçı olmayan, Azərbaycan xalqına qarşı cinayət törətməyən, dinc həyat tərzi sürən hər hansı erməni əsilli şəxsin ölkəmizə gəlməsi niyə yolverilməz hesab olunmalıdır?

Əgər biz bir erməni əsilli şəxsə görə bu qədər sərt mövqe ortaya qoyuruqsa, dünya necə inana bilər ki, sabah Dağlıq Qarabağ Azərbaycana qaytarılarsa, biz ermənilərlə birgə yaşaya, onların təhlükəsizliyini təmin edə bilərik. Erməni şovinistləri azərbaycanlılara qarşı soyqırımı törətdiyi, Ermənistana rəhbərlik etmiş şəxslərin azərbaycanlılarla ermənilər arasında irqi uyğunsuzluq barədə iddialar irəli sürdüyü halda, biz nəyə görə dünyaya özümüzü layiq olmadığımız şəkildə təqdim etməliyik?

Təşkilat Komitəsinin açıqlamsında da deyildiyi kimi, Zara erməni deyil, Ermənistanda anadan olub, Rusiya vətəndaşıdır və milliyyətcə yezidi kürdüdür. Hər hansı bir şəxsin, o cümlədən də Zaranın özünün doğulduğu ölkəyə hörmətlə yanaşması normal haldır. Başqa tərəfdən, əgər Zara Ermənistana səfərlər edib, həmin ölkəni tərifləyir və təbliğ edirsə, nəyə görə onun Azərbaycana gəlib bizim ölkəmiz haqqında xoş fikirlər səsləndirməsinə şərait yaradılmamalıdır.

Nəzərə alınmalıdır ki, Azərbaycan dövləti və xalqı heç bir ölkəni və ya xalqı, o cümlədən də erməniləri özünə düşmən hesab etmir. Həm ermənilər, həm də azərbaycanlılar eyni coğrafiyanı bölüşürlər və gələcəkdə də dinc yaşamağa məhkumdurlar. Azərbaycanın düşməni erməni xalqı deyil, erməni milliyyətçiliyinin və şovinizminin ideoloqları, Ermənistanın xunta və terrorçu rejimidir. Erməni xalqı da bu dairələrin girovudur və bundan əziyyət çəkir.

Azərbaycan xalqı ermənilərlə dinc yaşamağa hazırdır. Yetər ki, Azərbaycan torpaqları geri qaytarılsın və ölkəmizin ərazi bütövlüyü bərpa edilsin.

Mövzu ilə bağlı danışan millət vəkili Azər Badamov isə vurğulayıb ki, "Jara" musiqi festivalının keçirilməsi artıq ənənə halını alıb: "Hər il xeyli sayda Rusiya dövlətindən olan müğənnilər Azərbaycanda bu festivala qatılırlar və burada böyük bir bayram ab-havası yaşanır". Onun sözlərinə görə, "Jara" musiqi festivalının keçirilməsinin siyasi baxımdan da ölkəmiz üçün böyük əhəmiyyəti var: "Çünki ölkəmizə gələn rusiyalı müğənnilər Azərbaycanın inkişafını, gözəl bir məkan olduğunu görürlər. Bu festival həm də Rusiya televiziya kanalları vasitəsilə yayımlanacaq. Təbii ki, bu da bir daha Azərbaycanın tanıdılmasına imkan yaradır. Festivalda həm də rusiyalı Zara Mqoyan iştirak edəcək. Sosial mediada buna qarşı kampaniya aparılır. Mən tamamilə bununla razı deyiləm. Onun da Azərbaycanı görməsi vacibdir. Çünki biz tolerant ölkəyik. Onlar görsünlər ki, bizdə hər bir millətin nümayəndəsinə, xalqına qarşı bərabər münasibət var. İkincisi isə bizim problemimiz Dağlıq Qarabağla bağlıdır. Biz bu istiqamətdə heç zaman ermənilərlə barışmarıq. Amma erməni əsilli müğənninin Azərbaycana gəlişi və onun da ölkəmizi görməsi, buradakı inkişafla tanış olması onların özləri üçün də bir mesaj olacaq. Azərbaycan işğala məruz qalmış ölkədir. Amma buna baxmayaraq, böyük inkişaf yolu keçib. Festivalın keçirilməsi Azərbaycan üçün vacibdir".

"Bakı Xəbər" qəzetinin baş redaktoru Aydın Quliyev vurğulayıb ki, Azərbaycanın indiyədək keçirdiyi bütün beynəlxalq miqyaslı tədbirlər ölkəmizin böyük təşkilatçılıq işi ilə bərabər, həm də ona görə uğur qazanıb ki, irqi, milli, dini fərqlərlə yanaşmalara qəti şəkildə yol verilməyib və humanitar, bəşəri prinsiplərə birmənalı şəkildə üstünlük verilib. A.Quliyev bildirib ki, Azərbaycanın sahiblik etdiyi bütün beynəlxalq tədbirlər ölkəmizin nail olduğu tolerant dəyərlərdən çıxan köklü fenomen kimi nümayiş etdirilib: "Jara" beynəlxalq mahnı festivalına da bu kontekstdə baxmaq lazımdır. Belə tədbirlər ölkəmizin mənəvi, iqtisadi, siyasi, demoqrafik gücünün nümayiş etdirilməsi üçün əla imkandır". Onun sözlərinə görə, Azərbaycanın bir sıra beynəlxalq tədbirlərə ev sahibliyi etməsi tək bir iddia ilə bağlıdır: "Bu iddia dostlarımızı özümüzə daha çox yaxınlaşdırmaq, bədxah və düşmən kimi baxanların təsəvvürlərini dəyişmək, bununla da ölkəmizin dünyada manevr meydanını genişləndirməkdir. Ortada bu qədər aydın və uzaq hədəflərə işləyən məqsəd varsa, ölkəmizə hər bir əcnəbinin qanuni şəkildə edilən səfərinə belə baxmalıyıq. Həqiqətən də Azərbaycanın tolerant və inkluziv cəmiyyətində xarici ölkələrdən gələnlərin istər idmançı, müğənni və ya diplomat olsun, fərq etməz, davranış və baxışları təkmilləşirsə və ya müsbətə doğru dəyişilirsə, biz buna böyük nailiyyətimiz kimi baxmalıyıq. Pis hesab etdiyin qonağın üzünə qapı bağlamaq ən bəsit, ən emosional, ən düşüncəsiz və ən ziyanlı davranışdır. Azərbaycan heç vaxt belə zəif mövqe göstərməyib və yəqin göstərməyəcək də".

AZAD

525-ci qəzet.-2018.- 27 iyul.- S.1-5.