Xatirəsi əbədi yaşayacaq alim - Həmid Hüseynov

Həyatının böyük bir hissəsini Bakı Dövlət Universiteti ilə bağlamış Hüseynov Həmid Musa oğlu 11 sentyabr 1946-cı ildə Bakı şəhərində ziyalı ailəsində anadan olmuşdu.

Orta məktəbi bitirdikdən sonra 1963-cü ildə Azərbaycan Dövlət Universitetinin Geologiya-coğrafiya fakültəsinin geologiya şöbəsinə daxil olmuş, 1968-ci ildə universiteti bitirərək mühəndis-geoloq ixtisasına yiyələnmişdi. 1968-1971-ci illərdə Paleontologiya və tarixi geologiya kafedrasında "Paleontologiya və stratiqrafiya" ixtisası üzrə aspirantı olmuş Həmid müəllim AMEA-nın müxbir üzvü, professor Qədir Sultanovun və dosent Vahid Ağayevin rəhbərliyi altında "Böyük Qafqazın cənub yamacının Azərbaycan hissəsinin üst yura çöküntülərinin stratiqrafıyası" adlı dissertasiya işi üzərində tədqiqatlar aparmış və 1974-cü ildə dissertasiya işini müvəffəqiyyətlə müdafiə edərək geologiya-mineralogiya elmləri namizədi alimlik dərəcəsi almışdı. Böyük Qafqazın cənub yamacında Balakəndən İsmayıllıyadək ərazidə yayılmış üst yura yaşlı çöküntülərin tərkibində nadir hallarda rast gələn ammonit qalıqları taparaq bir neçə lay dəstəsinin yaşını dəqiqləşdirmək məhz ona nəsib olmuşdu.

Həmid müəllim 1971-1972-ci illərdə Paleontologiya və tarixi geologiya kafedrasının nəzdində yaradılmış və və SSRİ məkanında analoqu olmayan "Paleobiogeokimya" Elmi-Tədqiqat Laboratoriyasında Ümumdünya Paleontologiya Cəmiyyətinin vitse-prezidenti, AMEA-nın müxbir üzvü, professor Qədir Sultanovun rəhbərliyı altında elmi işçi vəzifəsində çalışmışdı.

1972-ci ildən Həmid müəllim pedaqoji fəaliyyətə başlayır və 1975-ci ilədək Paleontologiya və tarixi geologiya kafedrasındamüəllim və dosent vəzifələrində işləyir.

1975-ci ildə SSRİ Ali və Orta İxtisas Təhsili Nazirliyinin tövsiyəsi ilə milli geoloq kadrların hazırlanması üçün Əlcəzair Respublikasına ezam olunan Həmid müəllim 1975-1979-cu illərdə Bumerdes şəhərində pedaqoq kimi çalışır, Milli Neft və Qaz İnstiutunda "Paleontologiya" və "Tarixi geologiya" fənlərindən mühazirələr oxuyur. Həmin illərdə pedaqoji fəaliyyət ilə yanaşı, elmi-tədqiqat işlərini də davam etdirən, Həmid müəllim Əlcəzairdə keçirilən Beynəlxalq seminar, simpozium və konfranslarda iştirak edir, 1 monoqrafiya və 1 dərs vəsaiti nəşr etdirir.

1980-ci ildə Azərbaycana qayıdan Həmid Hüseynov Bakı Dövlət Universitetində Paleontologiya və tarixi geologiya kafedrasında dosent kimi pedaqoji fəaliyyətini davam etdirir. 1990-1992-ci illərdə Bakı Dövlət Universitetinin prorektoru vəzifəsində çalışır.

2012-ci ildənömrünün sonuna kimi "Ümumi və tarixi geologiya" kafedrasına rəhbərlik edən Həmid müəllim fakültənin və Universitetin ictimai həyatında da yaxından iştirak edirdi. Belə ki, o, Fakültə Tədris-Metodik və Elmi Şuralarının üzvü kimi elmin və təhsilininkişafı üçün daim səy göstərirdi.

Təsadüfi deyildi ki, Həmid Musa oğlu Hüseynov pedaqoji fəaliyyətinə görə Bakı Dövlət Universitetinin 95 illik yubileyi münasibətilə Azərbaycan Respublikası Təhsil Nazirliyinin Döş nişanı ilə təltif olunmuşdu.

Həmid müəllim 100-ə yaxın elmi məqalə və tezislərin, monoqrafiya, dərslik və dərs vəsaitlərinin müəllifi idi. Azərbaycanın geologiya elmində özünəməxsus yeri olan Həmid müəllimin Dağneft İstehsalan Birliyinin, Ümumittifaq Elmi-Tədqiqat Geofizika İnstitutunun, Azərbaycan Dövlət Neft Şirkətəinin, "Türkməngeologiya" İstehsalat Birliyinin fondunda saxlanılan 9 elmi hesabatın, müəlliflərindən biri olması da təqdirəlayiqdir.

Həmid müəllim Geologiya fakültəsində rus bölməsi üzrə "Paleontologiya və tarixi geologiya", "Regional geologiya və geotektonika", "Ümumi stratiqrafiya" fənlərindən mühazirə və məşğələ dərsləri aparırdı. O, qayğıkeşliyi və eyni zamanda, tələbkarlığı ilə seçilirdi. Bu cəhətə görə o, tələbələrin sevimlisinə çevrilmişdi. Hətta illər öncə universiteti bitirmiş tələbələri fakültəyə gələrkən ilk növbədə Həmid müəllimi axtarıb-tapır, onunla görüşürdülər.

Fakültə və universitet əməkdaşları ilə olan xoş münasibəti nəticəsində bütün kollektivin dərin hörmətini qazanmışdı. Cismən aramızda olmasa da, o təvazökar və təmkinli insanı doğmaları kimi gözümüz daim axtarır. Onun işıqlı obrazı daim xatirələrdə yaşayacaq.

Şakir BALAMMƏDOV

BDU Geologiya fakültəsinin dekan müavini, "Ümumi və tarixi geologiya" kafedrasının baş müəllimi

525-ci qəzet 2018.- 1 iyun.- S.8.