Şabranda Xaqani Poeziya Günləri

İyunun 8-də Şabran şəhərində ənənəvi Xaqani Poeziya Günləri təşkil olunub.

Tədbirdə Şabran rayon İcra Hakimiyyətinin başçısı, yazıçı-publisist Novruz Nəcəfoğlu, Azərbaycan Yazıçılar Birliyinin katibi Rəşad Məcid, Xaqani Poeziya günləri təşkilat komitəsinin rəhbəri, yazıçı Elçin Hüseynbəyli, AYB Şabran bölməsinin rəhbəri, yazıçı Aydın Tağıyev, Türkiyənin İLESAM təşkilatının rəhbəri, şair Məhmət Nuri Barmaqsız, yazıçı Seyran Səxavət, AYB mətbuat xidmətinin rəhbəri, şair Xəyal Rza, Şabran ziyalıları, şairləri iştirak ediblər.

2012-ci ildən keçirilən Xaqani Poeziya Günləri artıq iki ildir ki, daha geniş çevrədə Şairlər günü çərçivəsində baş tutur. Ötən il Türkiyədən gələn şair və yazıçıların iştirakı ilə keçirilən tədbir bu il də VIII Şairlər günü tədbirlərinin yekunu olaraq yadda qaldı.

Tədbiri giriş sözü ilə açan Şabran rayon İcra Hakimiyyətinin başçısı, yazıçı-publisist Novruz Nəcəfoğlu ölkəmizdə ədəbiyyata, mədəniyyətə, klassik irsə, bu mənəvi dəyərlərin yaradıcılarına, söz və sənət adamlarına hörmət və ehtiramdan söz açıb, qonaqları qədim Şabran torpağında salamlamaqdan məmnunluğunu bildirib: "Artıq yeddinci dəfədir ki, biz Xaqani Poeziya Günlərini burda, şairin adını daşıyan poeziya evində keçiririk. Amma ötən ildən Azərbaycan Yazıçılar Birliyinin təşkil etdiyi Şairlər günü ilə bir araya gəlməyimiz bizim tədbirləri bir az da genişləndirdi. Şabranda həmişə sözə, sənətə dəyər verilib, buranın tarixə, ənənələrə söykənən dəyərləri var, Xaqani burda məhbəsdə olub, amma biz bu tədbirləri keçirməklə onun xatirəsinə ehtiramımızı bildiririk. Xaqani Şirvani təkcə Şərqdə yox, bütün dünyada məşhurdur. Ədəbiyyatşünasların Xaqaniyə başqa münasibəti var, oxucuların fərqli yanaşması var onun əsərlərinə. Mən Xaqaniyə bir oxucu kimi baxıram, onu şair kimi sevirəm. Xaqanini biz bu yurdla bağlamışıq. Şübhə yoxdur ki, insan əziyyət çəkdiyi məkanı, gününün xoş keçmədiyi ünvanı özü üçün xoş qarşılamaz. Ona görə biz bilmirik ki, Xaqani bizə necə baxır? Amma bizlər onu sevirik və bütün bu tədbirlərin kökündə şabranlıların Xaqaniyə sevgisi, sayğısı dayanır. Əgər Şabranda, bu coğrafi məkanda yaşayan mərd insanlar, sözü dəyərləndirən insanlar olmasaydı, Xaqani elə bəlkə də, "Həbsiyyə”si ilə birgə Şabran qalasında illərlə qalacaqdı. Görün şabranlılar necə mərd, cəsarətli, igid adamlar olublar ki, o qalabəyi necə böyük ürək sahibi olub ki, Xaqani Şirvaninin Rum Qeysərinə yazdığı məktubun ünvanına çatdırılmasına şərait yaradıb. Ona görə elə bilirəm ki, Xaqaninin ruhu bütün bu işlərimizə sevgiylə baxmalıdır".

Daha sonra Xaqani Poeziya Günlərinin təşkilat komitəsinin rəhbəri, yazıçı Elçin Hüseynbəyli bu cür tədbirlərin keçirilməsinin əhəmiyyətindən danışıb: "Baxın, tarixin ədaləti necə özünü göstərir. Xaqani Şabranda məhbəsə atılıb, amma indi Novruz müəllim burda ona heykəl ucaltmaqla, adına poeziya evi tikməklə, hər il bu tədbirləri keçirməklə tarixi ədaləti bərpa etmiş olur, şairin azadlığını ona qaytarır. Həmçinin, belə görüşlərin, söz məclislərinin keçirilməsi yaradıcı adamlar üçün son dərəcə vacibdir. Çünki yalnız söz, sənət mühiti bizlərə ruh, enerji, qol-qanad verə bilər. Ona görə mən İcra başçısı Novruz Nəcəfoğlu başda olmaqla tədbirin təşkilatçılarına, Şabran camaatına, ziyalılarına öz minnətdarlığımı bildirirəm".

Azərbaycan Yazıçılar Birliyinin katibi, "525-ci qəzet"in baş redaktoru Rəşad Məcid Şabrandakı ədəbi mühitdən söz açıb: "Hər il Şabranda ən müxtəlif ədəbi görüşlər, tədbirlər, imza günləri keçirilir. Azərbaycan Yazıçılar Birliyinin şimal bölməsinin rəhbəri, yazıçı dostumuz Aydın Tağıyevin təşkilatçılığı ilə burda əsl sənət ab-havası yaradılıb. Bizim üçün də bu tədbirlərə qatılmaq, burdakı oxucularla görüşmək çox xoşdur. Bu il Şairlər günü Tbilisi, Şamaxı, Şəmkir, Beyləqan, Bakıda keçirildi və Şabranda yekunlaşmasında da bir məntiq var, əlbəttə".

Sonra Şairlər gününün təşkilatçısı Xəyal Rza çıxış edib: "Ötən il Türkiyədən gələn böyük heyətlə, həmçinin, Azərbaycan şair və ziyalıları ilə birgə bu tədbiri keçirmişdik. Elə o zaman Novruz müəllimin həssaslığını, diqqətini müşahidə etmişdik. Bu il də yenə İLESAM üzvləri ilə birgə Tbilisidən başlayan tədbirlərimiz bir neçə rayonda keçirildi, ənənəvi olaraq Bakıda Müşfiqin xatirəsini andıq, adına tədbirlər keçirdik. İndi də Şabrdan VIII Şairlər Gününə yekun vurulur. Bir neçə gün ərzində ədəbi mühitin bu tədbirlərlə məşğul olması, bölgələrdə canlanmanı görmək, sözə, şeirə sevgini görmək bizə böyük sevinc gətirdi. Bu gün Şabranda da bu ovqatı hiss edir və hər kəsə sözə, şeirə olan sevgi üçün təşəkkür edirik".

Yazıçı Pərvin Şabranda keçirilən ilk imza günündən söz açıb: "Şabranda keçirilən tədbirlərdən, Poeziya günlərinin əhəmiyyətindən danışıldı artıq. Ona görə mən sadəcə öz minnətdarlığımı dilə gətirmək istəyirəm. Çünki mənim ilk kitabımın ilk imza günü məhz Şabranda keçirilib. Bunu heç unutmuram, çünki həmin gün mənim oxucu ilə ilk görüşdüyüm, ilk dəfə kitab imzaladığım gün idi. Məncə, şabranlıların klassik ədəbiyyatın nümayəndəsi Xaqani Şirvaniyə də, gənc qələm sahiblərinə də, çağdaş ədəbiyyatın tanınmış simalarına da bu sevgisi, sayğısı xüsusi məqamdır. Həm tarixi ənənələrdən, həm də bugünkü mühitdən, rayondakı ab-havadan irəli gəlir. Bu mənada Şabranın İcra başçısı Novruz Nəcəfoğlunun son dərəcə maraqlı bir yazıçı olması qələm adamları üçün xeyli faydalıdır deyə bilərik".

İLESAM rəhbəri, şair Məhmət Nuri Barmaqsız Azərbaycanda özünü evindəki kimi hiss etdiyini və burdakı tədbirlərdən məmnun qaldığını dilə gətirib: "Artıq Azərbaycanla ədəbi əlaqələrimiz elə bir səviyyə alıb ki, bura tez-tez gəlirəm. Dostlarım zarafatla hərdən Ankaraya da gəl deyirlər. Ötən ildən Şabranla bağlı təəssüratlarım unudulmazdır. Bu il də Tbilisidə, Şamaxıda, Şəmkirdə, Beyləqanda, Bakıda unudulmaz günlər yaşadıq, görüşlər keçirdik. Yenə Şabranda sizinlə bir aradayıq və bütün tədbirlərin məhz burda yekunlaşmasında bir məna görürəm. Yenə klassik irsimizə qayıtmaq, Xaqanini yada salmağımız son dərəcə gözəldir". Sonra Məhmət Nuri Barmaqsız "Kəpənək ömrü" şeirini səsləndirib.

AYB-nin Şabran rayon bölməsinin sədri Aydın Tağıyev çıxış edərək həm AYB rəhbərliyinə, həm də icra başçısı Novruz Novruzova təşəkkürlərini bildirib: "Dostlarımız çıxış edib Şabranda keçirilən söz-sənət görüşlərindən danışırlar. Mən tam səmimiyyətimlə demək istəyirəm ki, Novruz müəllim başda olmaqla hər kəs ədəbiyyata, ədəbiyyat insanlarına böyük sevgi ilə yanaşır burda. Şairlər gününün Şabran ədəbi mühiti üçün əhəmiyyəti böyükdür. Hər kəs sözün, ədəbiyyatın bayramı hesab edir bu günü..."

Tədbirin davamında şair-qəzəlxan Namiq Məna şeirlər oxuyub, Şabran aşıqları, xanəndələri musiqi parçaları ilə tədbirə rəngarənglik gətiriblər. Sonda Xaqaninin abidəsi önündə xatirə şəkli çəkilib.

NƏZRİN

525-ci qəzet.- 2018.- 12 iyun.- S.7.