"Bir edam məhkumunun
son günü" Bakıda
İyun 18-də Qazax Dövlət Dram Teatrının
kollektivi paytaxt Bakıya qastrol səfərinə gəlib.
Kollektiv səfərdə Viktor Hüqonun "Bir edam məhkumunun
son günü" əsərinin motivləri əsasında
hazırlanan eyniadlı tamaşa ilə çıxış
edib. Səhnə əsəri Gənc
Tamaşaçılar Teatrının səhnəsində
nümayiş olunub.
Bu dəfə paytaxt sakinlərinin görüşünə
gələn tamaşa Mədəniyyət Nazirliyinin dəstəyi
ilə teatrın rejissoru Allahverdi Musayev tərəfindən
hazırlanıb. Əsas obrazı teatra dəvət olunan
aktyor, teleaparıcı Mehman Dilqəmoğlu (Piriyev)
canlandırıb. Digər rolları Əməkdar artist
Hacı Hacıyev, aktyorlar İlqar Hacəliyev, Yusif Qoca, Arif
Almədədov, Aydın Orucov, Nəsimi Aşpazov ifa edibər.
Tamaşanın quruluşçu rəssamı Səyyat
Məmmədovdur. Əsəri dilimizə gənc
şair Hikmət Orhun uyğunlaşdırıb.
Tamaşadan öncə çıxış edən
teatrın direktoru Saqif İskəndərov Bakı sakinlərini
salamlayıb, uzun müddətdən sonra onların
görüşünə gəlməkdən duyduqları məmnunluq
hissini dilə gətirib.
Direktor qəzetimizə
açıqlamasında bu il 80
yaşını qeyd edən teatrın tarixinə qısa nəzər
salıb: "Qazax Dövlət Dram Teatrı 1939-1940-cı illərdən
fəaliyyətə başlayıb və 1949-cu ilə qədər
fəaliyyətini davam etdirib. Yenicə
böyük bir müharibədən çıxmış
ölkədə maliyyə çətinliyi
yaşandığından bir neçə teatr, o cümlədən,
Qazax teatrı da özünü maliyyələşdirmə
sisteminə keçdi və daha artıq davam gətirməyib
digər teatrlar kimi fəaliyyətini dayandırmalı oldu.
Üstündən təxminən 40 il
keçəndən sonra bizim teatr yenidən bərpa olundu. 1988-ci ildə Nazirlər Sovetinin qərarı ilə
öz işinə başlayan teatrın
açılışı 1989-cu ilin iyunun 1-də Bəxtiyar
Vahabzadənin "Dar ağacı" tarixi faciəsi ilə
oldu. Mən də həmin tamaşada aktyor
kimi rol almışdım və həmin dövrdən bu
günə kimi orada işləyirəm. Aktyor,
rejissor, truppa müdiri, direktor müavini işləmişəm
və nəhayət, uzun illərdir ki, direktor vəzifəsini
icra edirəm. Demək olar ki,
teatrımızda təxminən ildə dörd əsər
hazırlanır. Bu zamana kimi 80-dən
çox tamaşa hazırlamışıq. Hazırkı repertuarımızda 10-dan çox
tamaşa oynanılır. Burada müxtəlif janrlarda tamaşalar
var: klassik, faciə, dram, uşaq, komediya və s. Həm
klassik, həm müasir yazarlarımıza, həm də
dünya dramaturgiyasından əsərlərə müraciə
edirik. Ancaq doğrusunu deyim ki, son illərdə
xarici əsərlər səhnələşdirmirdik. Və
nəhayət, bu il teatrımızın gənc
rejissoru Allahverdi Musayevin təklifi ilə məşhur
fransız yazıçısı Viktor Hüqonun "Bir edam
məhkumunun son günü" əsərini tamaşaya
hazırladıq. Teatr sənətçisindən
əlavə bir tamaşaçı kimi tamaşanın
uğurlu alındığını deyə bilərəm.
Mayın 6-da Qazaxda premyerası keçirildi.
Tamaşaçılar tərəfindən
böyük maraq və coşğuyla qarşılandı.
Ondan sonra bir dəfə də orada
nümayiş olundu və nəhayət, bakılı
tamaşaçılarımızın görüşünə
gəldik. Artıq 10 ilə yaxındır
ki, Bakıya qastrola gəlmirdik. Bu il
teatrımızın 80 illik yubleyi ilə əlaqədar
Bakıda televiziyalardan dəvətlər vardı, biz də
düşündük ki, bu tamaşaya bu cür maraq varkən
burada da nümayiş etdirməyimiz yerinə düşər".
"Bir edam məhkumunun son günü" adından da
göründüyü kimi, edama məhkum olunmuş bir
insanın ölümünə günlər, saatlar
qalmış keçirdiyi mənəvi sarsıntıları,
psixoloji durumunu əks etdirir. Əsərdə o dövr
Fransasının ağır despot rejimi, insanların çətin
həyatı, ölümlə üz-üzə,
göz-gözə dayanan bir oğulun, bir ərin, bir atanın
və nəhayət, bir insanın addım-addım qorxduğu
ölümə yaxınlaşması, başının
gilyotinlə kəsilməsindən öncə ruhunun qorxu və
peşmanlıqdan ölməsi göstərilir.
Səhnə
əsərinin quruluşçu rejissoru Allahverdi Musayev
tamaşanın yaranmasından danışıb, paytaxt sakinlərinin
xoş münasibətindən məmnunluğunu dilə gətirib:
"Bu əsəri hardasa iki ildir ki, nəzərimdə
saxlamışdım. İnternetdə
axtarış verdim ki, görüm bizdən öncə
haradasa oynanılıbmı, bircə Türkiyədə
hazırlanmış radio versiya ilə
qarşılaşdım. Dostumuz,
tamaşada da rol almış aktyor Yusif Qocayla uzun müzakirələrdən,
məsləhətlərdən sonra qərara gəldik ki, əsəri
ssenariləşdirək. Əsəri
dilimizə uyğunlaşdırmaqda şair Hikmət Orhun
kömək etdi. Mən, Yusif Qoca, Hikmət Orhun və
baş rol ifaçımız Mehman Piriyev təxminən iki il ərzində az-az da olsa bu əsərin
üzərində işlədik. Əslində, keçən
il bu əsər Mədəniyyət
nazirliyinə tərəfimizdən təklif olunmuşdu, amma həmin
il başqa bir xarici əsər olduğundan təsdiqi bu ilə
qaldı. Tamaşa oynanılandan sonra
tamaşaçıların marağı bizi çox sevindirdi
və məmnun etdi. Qazaxda olduğu kimi,
burada da tamaşaçıların böyük marağı
və sevgisi ilə qarşılaşdıq".
Aktyor
Mehman Piriyevin tamaşaya dəvət olunduğunu deyən
rejissor teatrdakı kadr çatışmazlığı məsələsinə
də toxunub: "Mehman Piriyevi bir aktyor kimi artıq uzun illərdir
tanıyıram. Onun potensialına və
istedadına bələdəm. Bu əsər
hazırlananda da baş rol üçün onu məsləhət
bildik və təklif elədik. Çox sağ
olsun ki, təklifimizi qəbul etdi. Və elə
ilk premyera bizim seçimimizdə
yanılmadığımızı göstərdi. Ümumiyyətlə, təəssüf ki, teatrda kadr
çatışmazlığı var. Xüsusən gənc
aktyor və aktirsalara çox ehtiyac yaranır və biz də
kənardan mütəmadi olmasa da, bəzən dəvət etməli
oluruq".
Sonda
rejissor əyalət teatrına maraqdan da danışıb:
"Ümumiyyətlə, elə zamanda yaşayırıq ki,
teatra maraq heç Bakıda da kütləvi şəkildə
deyil. Teatrı sevən və mütəmadi izləyən
müəyyən təbəqə var. Bizdə də elədir.
Kütləvi olmasa da,
tamaşaçılarımız var. Təbii ki, əyalətdə
teatr işini davam etdirmək, insanları tamaşalara cəlb
etmək çox çətindir. Fikrimcə,
aktyorlar, rejissorlar buna görə fədakar insanlardır.
Onların və daimi
tamaşaçıların sayəsindədir ki, bu gün əyalət
teatrlarımız da öz işini davam etdirir".
"Bir
edam məhkumunun son günü" əsərinin baş rol
ifaçısı, teatra dəvət olunmuş peşəkar
aktyor Mehman Piriyev hələ Bakıya gəlməzdən
öncə bu cür böyük auditoriya və anşlaq
gözlədiyini deyib: "İstər əyalətdə, istərsə
də paytaxtda oynayaq, mənim üçün heç bir fərq
eləmir, səhnə səhnədir. Bütün hallarda o səhnənin
məsuliyyətini üzərimdə hiss edirəm. Bu tamaşaya dəvət olunacağımı
gözləmirdim. Sağ olsunlar ki, dəvət etdilər
və mən də əsərlə tanış
olduqdan sonra bəyəndim, razılıq verdim. Əsər
özü özlüyündə olduqca ağır və faciəvi
sujetə malikdir. Bu
ağırlığı hansı dərəcədə
tamaşaçıya ötürə bildimsə onu artıq
onlar deyə bilər. Özüm isə hər
iki səhnədəki nümayişdən yüksək təəssüratlarla
ayrılıram. Hələ ilk premyeradan
ictimaiyyətin, mətbuatın marağını hiss etdik.
Tamaşa haqqında resenziyalar yazıldı.
Təbii ki, bütün bunlar bizə əlavə
stimul və ruh verir. Paytaxtda teatrı kifayət
qədər sevən, dəyərləndirən insanlar var.
Onların bu tamaşaya da bu cür yüksək maraq göstərəcəklərinə
əmin idim. Səhnəyə Viktor
Hüqo yaradıcılığının məhsulu ilə
qayıtmaq çox çətin və məsuliyyətli idi.
Bu mövsümdən teatrların birində
yenidən aktyor kimi fəaliyyətimi davam etdirməyi
düşünürəm. Bu şəraiti
yaratdıqlarına görə Qazax Dövlət Dram
Teatrının rəhbərliyinə, kollektivə və bu
cür enerjiyə, sevgiyə görə izləyicilərə
təşəkkürümü bildirirəm. Bundan sonra da onları daha böyük işlərlə,
tamaşalarla sevindirəcəyimizə ümid edirik".
Tamaşada
məhkəmə icraçısı rolunu canlandıran Qazax
Dövlət Dram Teatrının aktyoru Yusif Qoca bu tamaşaya
sonradan daxil olduğunu deyib: "Obraz olaraq deyil, amma aktyor
olaraq mən bu tamaşaya sonradan əlavə olunmuşam. Sözün düzü, belə böyük maraq və
sevgi gözləmirdim. Hətta əsər
səhnələşdirilərkən, hələ məşq
zamanlarında tərəddüd içərisində idim.
Amma Mehman Piriyev kimi peşəkar və
istedadı aktyorla bir səhnəni bölüşmək
çox qürurvericidir. Arzu edirəm ki, gələcəkdə
daha böyük bir rolum olsun ki, onunla eyni səhnədə
daha çox ünsiyyət şansı qazanım.
Hələ Qazaxdakı iki nümayişimizdə
tamaşaçı sevgisi, marağı, məmnunluğu var
idi. Bu gün Bakıda da bunun iki, bəlkə də
üç qatını hiss etdik. Hələ səhnədə
olarkən onların enerjisini ordanca hiss edə, duya bilirdik. Tamaşa sonrası da bu sevgilərini bizimlə
bölüşüb bizi daha çox xoşbəxt etdilər.
Ümid edirəm ki, bu tamaşanın qastrol səfəri
Bakıyla yekunlaşmayacaq, başqa regionlarımıza, hətta
ölkə xaricinə də məhz bu əsərlə səfərlərimiz
olacaq".
Şahanə
MÜŞFİQ
Foto: Valeh
ARİFOĞLU
525-ci qəzet.-2018.-21 iyun.-S.7.