Qəmər Almaszadə adına müsabiqənın qalibləri mükafatlandırıldılar

İyunun 26-da Azərbaycan Dövlət Akademik Opera və Balet Teatrında Qəmər Almaszadə adına II Beynəlxalq rəqs müsabiqəsi qaliblərinin mükafatlandırılması mərasimi və qala-konserti keçirilib.

Mədəniyyət Nazirliyi və Bakı Xoreoqrafiya Akademiyasının birgə təşkilatçılığı ilə keçirilən müsabiqədə ölkəmizlə yanaşı, Türkiyə, ABŞ, Bolqarıstan, İspaniya, İsrail, Qazaxıstan, Rusiya, Ukrayna və Yaponiyadan olan balet ustaları iştirak ediblər.

“Klassik rəqs" (solo və duet kateqoriyalarında), "Milli rəqs" (solo, duet və ansambl kateqoriyalarında), "Müasir rəqs" (solo, duet və kollektiv kateqoriyalarında) nominasiyaları üzrə keçirilən müsabiqəyə 16-26 yaşda oğlan və qızlar qatılıblar.

Onların rəqs məharətini və səhnə cazibəsini Rusiyanın Xalq artisti Vyaçeslav Qordeyev, Azərbaycanın xalq artistləri Rəfiqə Axundova, Roza Cəlilova, Afaq Məlikova, Ukraynanın Xalq artisti Boris Kolnoquzenko, Bolqarıstan Balet Assosiasiyasının rəhbəri, UNESCO-nun rəqs sənəti milli komitəsinin Bolqarıstan üzrə sədri Silviya Tomova, Estoniyanın əməkdar artisti, UNESCO-nun beynəlxalq rəqs şurasının üzvü Vasili Medvedyev, İsrail Dövlət Baletinin prima balerinası və bədii rəhbəri, Beynəlxalq Xoreoqraflar İttifaqının İsraildən olan daimi üzvü Nina Gerşman, Azərbaycanın və Rusiyanın Əməkdar artisti Vitali Axundovdan ibarət münsiflər heyəti qiymətləndirib.

Qaliblərə diplom və hədiyyələr təqdim edilib. Münsiflər heyətinin qərarı ilə birinci yeri Qumar Sultanbek (Qazaxıstan), İrina Matsepa (İspaniya), "Bakının ulduzları" rəqs ansamblı (Azərbaycan), ikinci yeri Metis Lov (ABŞ), Ayan Eyvazova və Makar Ferştdant (Azərbaycan), Andriyenko Vladislav və Polevayeva Yelena dueti (Ukrayna), üçüncü yeri isə Lean Reyzer və Elinor Ostrovki dueti (İsrail), Jasmin Seizova (Bolqarıstan), Mehdiyeva Dilarə (Azərbaycan) və Yuşenko Roman və Qnizdilova Olqa (Ukrayna) qazanıblar. Beynəlxalq müsabiqənin Qran-pri mükafatını qalibi isə Rusiya təmsilçiləri Arefyev Mistislav və Fukuda Siori olub. İştirakçılar sırasında Azərbaycanı təmsil edən Lalə Aslanova TÜRKSOY-un xüsusi mükafatına layiq görülüb. Müsabiqənin Qran-Pri mükafatına Rusiya təmsilçisi layiq görülüb.

Mükafatı qalibə Bakı Xoreoqrafiya Akademiyasının rektoru, Əməkdar Elm Xadimi, professor Timuçin Əfəndiyev təqdim edib.

Tədbir müsabiqə qaliblərinin qala-konserti ilə başa çatıb.

Şahanə MÜŞFİQ

525-ci qəzet 2018.- 29 iyun- S.7.