Yaddaşımızda həmişə varsınız

 

Mustafa ÇƏMƏNLİ

 

Əziz və unudulmaz Anar müəllim!

 

Siz çox xoşbəxt sənətkarsınız ki, ədəbiyyatımızın, mədəniyyətimizin, incəsənətimizin hansı səmtinə baxsaq, Sizin danılmaz, artıq əbədiləşmiş xidmətlərinizi görürük. Uzun illərdir ki, sizin adınızın anılmadığı, yad edilmədiyi gün yoxdur. Siz bu ümumxalq məhəbbətini öz parlaq istedadınızla, ədəbi-bədii yaradıcılığınızla, böyük şəxsiyyətinizlə qazanmısınız. Sizin roman və povestləriniz, hekayələriniz, esseləriniz, səhnə əsərləriniz, ssenariləriniz əsasında çəkilmiş neçə-neçə filmlər Azərbaycan oxucularının, tamaşaçılarının yaddaşında yaşamaqdadır. Ölkəmizin hüdudlarından çox-çox uzaqlarda da sevilən, oxunan böyük yazıçısınız.

 

Danılmaz faktdır ki, xalqımızın bir çox tarixi şəxsiyyətlərini məhz sizin ssenariniz, yaxud özünüzün rejissorluğunuzla çəkilmiş filmlər əsasında daha yaxından tanıyıblar. Bunlara "Dədə Qorqud", "Üzeyir ömrü", "Cavid ömrü", "Sübhün səfiri" filmləri parlaq sübutdur. Sizin fədakarlığınız sayəsində Üzeyir bəy Hacıbəylinin ömür yolundan bəhs edən ikiseriyalı rəngli televiziya filmində milli mədəniyyətimizdə xidməti olan onlarca şəxsiyyətin, müasirimiz olan bir çox dəyərli sənət adamının surəti, görüntüsü əbədiləşib.

 

Bu gün çox məmnunluq hissi keçirirəm ki, 90-cı illərin əvvəllərində Sizin "Gənclik" nəşriyyatında işıq üzü görən "Şəhidlər dağı" və "Otel otağı" kitablarınızın nəşrində nəşriyyatın baş redaktoru kimi mənim də, cüzi də olsa, xidmətim olub.

 

Hörmətli Anar müəllim!

 

80 yaşınız mübarək!

 

Allah Sizi xalqımıza çox görməsin!

 

525-ci qəzet  2018.- 14 mart.- S.6.