Neftçalada şair Adilə Nəzərlə görüş oldu

 

Neftçala rayon mərkəzləşdirilmiş kitabxana sistemində tez-tez bir-birindən maraqlı tədbirlər keçirir, yaradıcı ziyalılarla, görkəmli şəxsiyyətlərlə, tanınmış şair və yazıçılarla görüşlər təşkil edirik. Oxucularımız bu tədbirlərdə, görüşlərdə həmişə böyük həvəslə iştirak edirlər.

 

Bu günlərdə, tanınmış şair, filologiya üzrə fəlsəfə doktoru, Azərbaycan və İraq Yazıçılar Birliyinin üzvü, Təhsil İnstitutunun aparıcı elmi işçisi Adilə Nəzərlə oxucularımızın görüşünü keçirdik və bu görüş xüsusilə yaddaqalan oldu.

 

Görüşün bünövrəsi bir neçə ay əvvəl kitabxanamızda rayonumuzun sayılıb-seçilən ziyalılarından olan Ələkbər Zahidovun alim Təvəkkül Zahidova həsr etdiyi "Ömür şərəflə yaşananda" kitabının təqdimat mərasimi keçiriləndə qoyulmuşdu. Tədbirdə respublikamızın bir qrup tanınmış alimi, şair və yazıçıları ilə birlikdə Adilə Nəzər də çıxış etmiş və bir şeirini oxumüşdu. Həmin şeirlə də oxucularımızın diqqətini cəlb etmiş, dərin maraq doğurmuşdu. Ələkbər müəllim söz vermişdi ki, bu kitabxanada onun görüşünü təşkil edəcək və verdiyi sözün üstündə möhkəm dayandı. Təşkilati işlərdə Neftçalada Qadınların Sosial İnkişafına Dəstək İctimai Birliyinin sədri Gülqədəm Mirzəzadə, rayonun Xolqaraqaşlı kənd tam orta məktəbinin direktoru, Azərbaycan Yazıçılar Birliyinin üzvü, yazıçı-publisist Ruhəngiz Nəcəfova da iştirak etdilər.

 

Beləcə bu görüş baş tutdu. Şairlə görüşə elə güclü maraq göstərilmişdi ki, zalda əyləşməyə yer tapmayaraq ayaq üstə dayananlar da var idi.

 

Adıçəkilən İctimai Birliyin sədri Gülqədəm Mirzəzadə tədbiri açaraq, aparıcılıq üçün sözü Ruhəngiz Nəcəfovaya verdi. R.Nəcəfova Adilə Nəzərin həyatı və yaradıcılığı barədə qısa məlumat verərək, poeziyasının xüsusiyyətlərindən danışdı, dedi ki, o, sözün tam mənasında ürək, qəlb, ruh şairidir.

 

Adilə Nəzər poeziyası barədə fikir bildirmək üçün ilk söz tanınmış qiraət ustası Fərman Hüseynova verildi. O, şairin yaradıcılığına yaxından bələd olduğunu, şeirlərini müxtəlif məclislərdə, el şənliklərində sevə-sevə söylədiyini bildirdi. Dedi ki, Adilə Nəzər öz səsi, öz nəfəsi olan istedadlı şairədir və bu kimi bu misraları onun yaradıcılığı haqqında dolğun təəssürat yaradır: 

 

İlahi qəbul et, "varlıyam" Səndən,

Baxma ki, sinəmdə min bir ahım var.

Sənin mənim kimi günahkar bəndən,

Mənim Sənin kimi bir Allahım var.

 

Rayonun ziyalılarından Ramiz Hüseynovun da çıxışı maraqla qarşılandı: "Şeir eşidiləndə yaşayır, şeiri yaşadanlardan biri biz qiraətçilərik. Məclislərdə, el şənliklərində Adilə Nəzərin şeirlərini söyləyəndə həmişə maraqla qarşılanır. Ona görə ki, onlar qəlbdən süzülüb, yaşanaraq yaranıblar.

 

İstedadlı şairlə görüşə Bakıdan, qonşu Salyan rayonundan gələn qonaqlar da az deyildi. "Ulduz" jurnalının poeziya şöbəsinin rəhbəri Fərqanə Mehdiyeva, "Araz" Ziyalılar İctimai Birliyinin sədri, filologiya elmləri doktoru Nizami Muradoğlu, Azərbaycan Yazıçılar Birliyi Muğan regional şöbəsinin sədri Nəbi İbrahimov başqaları Adilə Nəzərin yaradıcılıq xüsusiyyətlərindən danışdılar, onun şeirlərinin müasir poeziyamızda tutduğu mövqedən söhbət açdılar.

 

Şairlərdən Zabil Pərviz, Zərxanım Ülvi A.Nəzər poeziyasının xüsusiyyətlərindən söz açaraq yaddaqalan fikirlər bölüşdülər.

 

Sonra söz Adilə Nəzərə verildi. Şair öz şeirlərindən nümunələr söylədi, iştirakçıların çoxsaylı suallarını cavablandırdı, görüşü təşkil edənlərə səmimi minnətdarlığını bildirdi, Kitabxananın müdiri Gülnarə Qasımova görüşü yekunlaşdıraraq Adilə Nəzərə yeni yaradıcılıq uğurları arzuladı.

 

Bədirə HƏSƏNQIZI

Neftçala rayon mərkəzləşdirilmiş kitabxana sisteminin əməkdaşı

 

525-ci qəzet  2018.- 14 mart.- S.6.