Yaddaşlarda iz salan yaradıcılıq gecəsi

NEFTÇALADA ŞAİR SOLTAN ABBASIN 85 İLLİYİ QEYD EDİLDİ

Soltan müəllimin adını tez-tez eşidərdik ədəbiyyat dərslərində. Müəllimimiz böyük qürur və fəxrlə danışırdı şairin yaradıcılığı haqqında.

Elə Soltan müəllimin şeirlərini oxuyaraq böyüdük, böyüdük və yaxından tanıdıq şairi. Tanrı onun xarici görünüşünü də şeirə bənzətmişdi. Hündür boyu və məğrur görkəmi vüqarlı dağı, gur saçları şəlaləni xatırladırdı. Təbiətin rəngi gözlərinə, sözün sehri qələminə köçmüşdü. Şeirlərindəki cazibə bütün neftçalalıları onu əsl ağsaqqal, əsl şair kimi sevməyə vadar edir. Elə bu sevgi idi bir neçə gün öncə əzəmətli Heydər Əliyev Mərkəzində şairin yubiley tədbirinə söz və sənətsevərləri yaxından, uzaqdan axın-axın gəlməyə vadar edən. Azərbaycan Yazıçılar Birliyinin üzvü, Məmməd Araz Mükafatı laureatı, qabaqcıl maarifçi Soltan Abbasın 85 illik yubileyi münasibəti ilə keçirilən yaradıcılıq gecəsində zalda boş oturacaq qalmamışdı. Yaddaşlarda iz buraxan tədbiri giriş sözü ilə mərkəzin direktoru Könül Məmmədova açdı. Tədbiri idarə etmək Nəcəfqulu Hacıyevə həvalə olundu. Aparıcının Soltan Abbas yaradıcılığı haqqındakı geniş məlumatı iştirakçıları yenidən şairin şeirlərinin sehrinə bürüdü.

Neftçalanın ədəbi mühitini daim diqqətdə saxlayan rayon İcra Hakimiyyətinin başçısı İsmayıl Vəliyevin təbrikini başçının ictimai-siyasi və humanitar məsələlər üzrə müavini xanım Gültəkin Sadıqova çatdırdı, şairin adına yazılmış Fəxri Fərmanı təqdim etdi.

Uzun illər rəhbərlik etdiyi "Xəzər nəğmələri" ədəbi birliyində çoxları onun süzgəcindən keçib şair olublar. Soltan Abbas yaradıcılığının işığına toplaşanların ilkləri onun qələm dostları idi. Zabil Pərviz, Zərxanım Ülvi, Müzəffər Məzahim, Cəmaləddin Əjdəroğlu, Teyyub İmanlı, Zaur Ərmuğan, İmamverdi Zeynalov və digər qələm sahiblərinin şairə arzuları gözlərindən oxunurdu. Neftçalalı yazarların adından söz verilən Zabil Pərvizin çıxışı hamının ürəyincə oldu.

Neftçalalıların hər zaman adını böyük ehtiramla yad etdiyi İmamverdi Əbilov məktəbinin yetirməsi, "Ədəbiyyat qəzeti"nin baş redaktoru Azər Turan şairin qohumu olduğunu diqqətə çatdıraraq onun haqqında xatirələrini bölüşdü. Şairlərdən AYB Qarabağ bölməsinin rəhbəri Ənvər Əhməd, Oqtay Rza, Sərvaz Hüseynoğlu, Tahir Taisoğlu, "Ana Kür" qəzetinin baş redaktoru Rüstəm Məlikov da şairə arzularını bildirdilər. Əli Rza Xələfli, Avdı Qoşqar, AYB Muğan bölməsinin rəhbəri Nəbi İbrahimli, Seyran Allahverdiyev və başqaları da sənətkarla bağlı mərasimdə iştirak edirdilər.

Əməkdar artistlər Yusif Mustafayev, Baloğlan Əşrəfov, müğənnilər Ağabəy Manafov, Razi Məhərrəmovun ifaları, qiraətçilər Fərman Hüseynov və Rəhman Rəhmanovun sazın müşayiətilə söylədikləri lirik şeirlər tədbiri daha da canlandırdı. Azyaşlı olmasına baxmayaraq, artıq Neftçala ictimaiyyətinin qiraətçi kimi tanıdığı Şahnaz Əsgərzadə də səhnəyə çıxdı, şairin milli Qəhrəman mayor Samid İmanova həsr etdiyi şeiri səsləndirdi.

Neftçalanı Milli Məclisdə təmsil edən Millət vəkili Arif Rəhimzadə və Bakı Dövlət Universitetinin professoru Xanlar Abdullayev ürək sözlərini və səmimi təbriklərini teleqramlar vasitəsilə çatdırmışdılar.

İki saat davam edən tədbirdə kimsənin yorulduğu hiss edilmirdi. Bu da tədbirin təşkilatçıları - ASKEF-in Neftçala təmsilçisi Ələkbər Zahidov, şairin şagirdi olmuş Nəcəfqulu Hacıyev və sənətkarın oğlu Nəsib Abbasovun tərtibat, quruluş və ssenarisinin sayəsində idi.

Mədəniyyət kanalında şair Avdı Qoşqarın rəhbərliyi, rejissor Aydın Vəliyevin quruluş verdiyi, operator Cavid Şərifovun lentə köçürdüyü "Yurd yeri" verilişində efirə gedəcək tədbir, eyni zamanda, şəkillərin yaddaşında əbədiləşdi.

Əziz oxucu, sözün qüdrətini, Vətən sevgisini, el-obaya bağlılığı, şəhidliyin müqəddəsliyini "Damcı", "Mənə çox öyrəşmə", "Tut ağacı", "Yollar ömür yolum", "Həqiqətin ağzı daş saxlamaz", "Rübailər", "Qəzəllər", "Ömrün şəhidlik zirvəsi", "Dörd kitab", "Torpağın sahibi", "Səyyah etdi söz məni", "Ömür töhfəsi", "Torpağın oğlu", "Ömrü yaşadan sözlər", "Dünya duyumları", "Neftçala Əfqanıstan şəhidləri", "Arxaya baxanda" kitablarında vəsf edən şairin yubiley gecəsinin qısa xronikasını təqdim etdim. İki əsrin şairi Soltan Abbasın ömür yolu, əmək fəaliyyəti, şeirə vurğunluğu ilə tanış olmaq üçün ən yaxşı vasitə isə onun yaradıcılığıdır.

Gülqədəm MİRZƏZADƏ

Neftçalada Qadınların Sosial İnkişafına Dəstək İctimai Birliyinin sədri

525-ci qəzet 2018.- 8 noyabr.- S.7.