Fikrət QOCA

Yolüstü mənzil

Bu dünya bir qəfəsdi,

Burda bizi yaşadan

Məhəbbətdir, həvəsdi.

Bu dünya bir qəfəsdi,

Ruhumuz nurdu, səsdi,

Getmək, qalmaq sərbəsdi.

Bu dünya bir qəfəsdi.

Özü gələndə tərsdi,

Özü gedəndə tərsdi.

Fikrət bu qədər bəsdi.

Qəfəs yolüstü mənzil...

Gələn, gedən nəfəsdi.

23.11.2018

Şükür elə, mən varam...

(Azərbaycan xalq deyimlərindən)

Baxımsız kənd yoludu

Bir köhlənin belində

Ata ilə oğludu...

Soyuq, yağışlı gündə

Ata yumşaq yəhərdə,

Oğul atın tərkində...

Hava yağış, yer palçıq

Bir oğlanı gördülər

Əsə-əsə qaçırdı

Ayaqyalın, başaçıq.

Ata bir köks ötürdü...

Dedi: - Görürsən oğul

Bu dünya gör-götürdü.

Belədi dünya, insan,

Ay oğul, mən olmasam

Sən də o oğlan kimi

Həmin yerdə olardın.

- Ay ata, sən olmasan,

Mən yəhərdə olardım!

25.11.2018

525-ci qəzet 2018.- 27 noyabr .- S.7.