Dəyərli alim, alicənab insan

TEXNİKA ELMLƏRİ DOKTORU ELÇİN QƏNBƏROVUN XATİRƏSİNƏ

Doğma Azərbaycanımızın füsunkar bir parçası olan Qarabağda dünyaya göz açmışdı. Orta məktəbi əla qiymətlərlə bitirdikdən sonra 1978-ci ildə Azərbaycan İnşaat Mühəndisləri İnstitutuna daxil olmuşdu.

Hələ tələbəlik illərində yüksək təfəkkür, istedad sahibi kimi tanınırdı. Texniki fənlərə olan böyük marağı, tələbə elmi tədbirlərdəki çıxışları onun texniki elmlər sahəsində əvəzsiz bir mütəxəssis, gələcəyin istedadlı bir alimi kimi yetişəcəyindən xəbər verirdi.

1983-cü ildə Aərbaycan İnşaat Mühəndisləri İnstitutunu fərqlənmə diplomu ilə bitirən Lenin təqaüdçüsü Elçin Qənbərov təyinatla Azərbaycan Elmi-Tədqiqat Su Problemləri İnstitutuna göndərilir. Burada kiçik elmi işçi vəzifəsində çalışır. Az bir zamanda çalışdığı kollektivin hörmətini qazanmaqla, həm də ciddi elmi araşdırmaları ilə elm ictimaiyyətinin diqqətini cəlb edir.

1984-cü ildə hərbi xidmətə çağırılan Elçin Qənbərov hərbi xidmətini başa vurduqdan sonra yenidən Elmi-Tədqiqat Su Problemləri İnstitutuna qayıdır. Elmi axtarışlarını davam etdirir. Aspiranturaya daxil olur. O, 1990-cı ildə Moskvada Su-Geo İnstitutundada müfəvvəqiyyətlə namizədlik dissertasiyası müdafiə edərək texnika elmləri namizədi elmi dərəcəsi alır. Bununla o, həm də Azərbaycanın ən gənc alimlərindən biri kimi tarixə düşür.

1994-cü ildə gənc alimə böyük etimad göstərərək onu institutun direktor müavini kimi məsul vəzifəyə təyin edirlər. Gərgin elmi axtarışlar, insan həyatının, iqtisadiyyatın, bir sıra həyati sahələrin əsasini su təşkil edir.

2006-cı ildə Moskvada "Su Geo" Institutunda "Tərkibində texnogen qarışıqlar olan yüksək bulanıqlı suların reagentsiz üsulla təmizlənməsi texnologiyası" mövzusunda doktorluq dissertasiyası müdafiə edir. Rusiyanın görkəli alimləri bu Azərbaycan aliminin elmi yaradıcılığını yüksək qiymətləndirirlər.

2007-ci ildə Elçin Qənbərovun rəhbərliyi altında Tərkibində texnogen qarışıqlar yüksək bulanıqlı suların reogentsiz üsulla təmizlənməsi üzrə bir sıra yeni qurğu və texnologiyalar işlənib hazırlanır. Dünya elminə öz töhfələrini verən bu istedadlı alimin elmi kəşfləri və ixtiraları dünyanın bir çox ölkələrində su təchizatı sistemlərində tətbiq olunur. O, Yaponiya, Meksika, Almaniya, Avstriya, Italiya, Argentina, Cənubi Koreya, Rusiya Federasiyası, Ukrayna və digər ölkələrdə su problemləri ilə bağlı keçirilən beynəlxalq mötəbər forum və konfranslarda elmi məruzələrlə çıxış edir, Azərbaycan elminin nailiyyətlərini dünyaya tanıtdırırdı.

Onun elmi məqalələri dünyanın bir çox nüfuzlu elmi nəşrlərində çap olunurdu. Alimin "Üzən filiz" qurğusunda təbii və çirkab sularının təmizlənmə texnologiyası və tərkibində texnogen qarışıqlar olan yüksək bulanıqlı suların reogentsiz üsulla təmizlənməsi haqda kitabları həm də ali məktəblərdə dərslik kimi geniş istifadə olunur.

Bu görkəmli alimin elmi kadrların yetişməsində çox böyük əməyi var. Onun rəhbərliyi altında bir doktorluq, üç namizədlik dissertasiyaları müdafiə olunub. O, yüzdən artıq elmi məqalənin, üç monoqrafiyanın, altı ixtiranın müəllifidir. Məhz bu geniş elmi fəaliyyətinə görə 2008-ci ildə Azərbaycan Respublikası Prezidentinin sərəncamı ilə "Tərəqqi" medalı ilə təltif olunmuşdu.

Elçin Qənbərov həm də gözəl ailə başçısı, tələbkar bir ata idi. Qızı Günel Azərbaycan Pedaqoji Universitetinin ingilis dili fakultəsini, Jalə Bakı Dövlət Universitetinin hüquq fakultəsini, Sitarə isə Bakı Dövlət Universitetinin beynəlxalq iqtisadi münasibətlər fakultəsini bitirib.

Elçin Qənbərovun yoxluğu Azərbaycan elmi, xalqımız üçün böyük itkidir. O, olduqca təmkinli, daxilən azad, bütöv bir şəxsiyyət idi. Onun əziz xatirəsi yaddaşlarda əbədi yaşayacaq.

İslam KƏBİRLİ

525-ci qəzet.- 2018.- 10 oktyabr.- S.8.