Bakı Kitab Mərkəzində Nərgiz Cəlilova ovqatı

Rəvan CAVİD

Elə səslər var ki, illər sonra eşidəndə arxasınca gətirdiyi böyük bir xatirə selini qolundakı saatın əqrəbləri bənd olub saxlaya bilmir. Olursan on bir-on iki yaşında. Televiziya qarşısında oturub "Pəncərə" verilişinə baxırsan.

Səsini, nitqini sevdiyimiz məşhur teleaparıcı Nərgiz Cəlilova ötən həftəsonu Bakı Kitab Mərkəzinin (Baku Book Center) qonağı oldu. Elə bil, ənənəvi tərzdə öz verilişindən tamaşaçıları salamlayırdı. Gülərüz, sərbəst, enerjili, həmişəki kimi sadə geyimdə və bənzərsiz səs tonu, təkrarsız nitqi ilə. Bir sözlə, Bakı Kitab Mərkəzində əsl Nərgiz Cəlilova ovqatı yaranmışdı.

Görüş Günel Anarqızının giriş sözüylə başlandı. Dilimizin saflığından və təmizliyindən danışmaq üçün auditoriyanı və Nərgiz Cəlilovanı salamladı.

Söhbətə kitab mərkəzinin işlərindən, faydasından, kitabdan, mütaliədən danışmaqla başlayan Nərgiz Cəlilova müasir dövrdə daha çox ədəbiyyata ehtiyacımızın olduğunu, vaxtımızı mütləq kitabla keçirməyimizin vacibliyini qeyd etdi.

Sual-cavab formatında keçən tədbirə kitablar da qulaq asırdı - sakit, əl çalmadan...

Gələn gənclərdən birinin televiziya proqramlarındakı neqativ görüntülərdən və qeyri-ciddi jurnalistlər haqqında sualına otuz beş illik televiziya təcrübəsi olan Nərgiz Cəlilova kanallarda ciddi bədii-publisistik verilişlərin, icmalların olduğunu və bu verilişlərin izləmə alışqanlığı tələb etdiyini, bu alışqanlığı indi bir qədər unutduğumuzu vurğuladı. Öz həmkarları haqqında ehtiyatla danışan aparıcı hərdən özü də bunu etiraf edirdi. Mənsə nitqindən, səsindən sonra indi onun təvazökarlığına da sevinirdim.

Bundan başqa, mərkəzin qonağı ekranda müzakirə proqramlarının azlığı, gündəmi əks etdirən informasiya buraxılışlarının kifayət qədər olmadığı, tamaşaçıların bu proqramlara marağının səthiliyi haqqında təəssüflə danışdı.

"Televiziya verilişinin uğursuz olmasında çox vaxt aparıcıları qınayırlar. Ancaq bilmək lazımdır ki, televiziya verilişi komanda işidir. Burada təkcə aparıcı yox, kamera arxasında layihə rəhbəri, redaktor və digərləri də olur".

Nərgiz Cəlilova gənc teleaparıcıların ulduz xəstəliyindən də söz açdı.

"Hər kəs star olmaq istəyir. Əlbəttə, ola bilərlər. Lakin bunun üçün əziyyət çəkməli, televiziyanın normalarına riayət etməlisiniz. Mən bu gün də efirə məsuliyyətlə yanaşıram. Hələ də o ilk həyəcanı keçirirəm..."

Tanınmış teleaparıcı Ceyhun Əli də görüşə qoşulmuşdu. Hərdən arxaya çevrilir və insanların Nərgiz Cəlilovaya necə maraqla qulaq asdığını izləyirdim. Kitab alan oxucular bu gözəl nitqə ram olub, Mərkəzdə bir az da qalmağa qərarı verirdilər.

Daha bir maraqlı sual "c" və "ç" səsləri ilə bağlı idi. Bu dəfə Ceyhun Əliylə bərabər gözəl bir izah verən Nərgiz xanım, xüsusən də, diktorların bu yanlışının üzücü olduğunu dedi. "Dialekt ifadələrlə, ləhcəylə danışanlar efir üçün uğurlu deyil!"

Mətnin əzbər öyrənilməsinə qarşı olduğunu söyləyən aparıcı öz səsindən zövq almağı bacaran diktorların daha uğurlu fəaliyyətinin olduğunu dedi.

Reytinqli verilişlərin bəzən qeyri-ciddi atmosfer yaradan proqramlar olduğunu, bununla da ciddi proqramların kölgədə qaldığını dəfələrlə vurğulayan Nərgiz Cəlilova özəl telekanallarda bu barədə iş aparılmasının vacibliyini önə çəkdi.

Qısa və konkret bir sual səsləndi:

- Yaradıcı nitqi necə inkişaf etdirmək olar?

Və eyni konkretlikdə cavab:

- Kitab oxumaqla. Gündəlik mütaliə ilə.

Teleaparıcının kitab sevgisi onu mənə bir az da doğmalaşdırırdı. Hər fürsətdə Bakı Kitab Mərkəzinin yaradılmasına sevindiyini, gənclər üçün vacibliyini dilə gətirirdi.

Ceyhun Əli öz həmkarından televiziyada geyim məsələsini soruşdu. Nərgiz Cəlilova bu problemin onu narahat etdiyini söylədi.

"Bədii-publisistik verilişlə səhnəni qarışdırmaq olmaz. Ən adi geyim də belə, bu, özünü göstərməlidir. Dünyada bununla məşğul olan stilistlər var. Ciddi informasiya proqramına tamaşaçı kilidlənməlidir. Mən həmkarlarımın xətrinə dəymək istəmirəm. Özüm də hələ öyrənirəm, amma təcrübəmdən istifadə edib demək istəyirəm ki, telekanallarda bu barədə işlər bir qədər zəifdir. Sadəlik bəsitliyə çevrilməməlidir!"

Dil və yazının inteqrasiyası haqqında biliklərini bölüşən Nərgiz xanım yazılı düşünməyin faydalarından da danışdı.

Görüşün sonuna yaxın Günel Anarqızı və Nərgiz Cəlilova məktəblərdə Azərbaycan dilinin tədrisindən, valideynlərin bu dilə xüsusi maraq göstərməyinin zəruriliyindən söz açdılar. Hər bir azərbaycanlının ana dilimizə sevgiylə, hörmətlə yanaşmasının mütləq şərt olması qeyd edildi.

Doxsan dəqiqəlik görüşdə Nərgiz Cəlilova öz izləyiciləri ilə səmimi, isti bir ortam yaratmışdı. Hər kəs çəkinmədən, həyəcanlanmadan suallarını verirdi, hərdən Nərgiz xanımın incə yumoruna tuş gəlirdilər, bu isə söhbətin səmimiliyini daha da artırırdı.

525-ci qəzet 2018.-16 oktyabr.- S.7.