Azərbaycanın gənc yazarlarının əsərləri Türkiyədə...

İLESAM-ın AZƏRBAYCAN XALQ CÜMHURİYYƏTİNİN 100 YAŞINA TÖHFƏSİ

Son illərdə Türkiyə-Azərbaycan ədəbi əlaqələri başda olmaqla, bütün Türk dünyasında ədəbiyyatın, sənətin inkişafı və təbliği ilə məşğul olan Türkiyə Elm və Ədəbiyyat Əsəri Sahibləri Sənət Birliyi - İLESAM ölkəmizlə qardaş Türkiyə arasında daha bir ədəbi körpü qurub.

Bu körpünün möhkəmlənməsi və daha da inkişaf etməsi üçün gördükləri əhəmiyyətli işlər heç kimə sirr deyil. Fəaliyyətin bir nəticəsi də dünən Azərbaycan Yazıçılar Birliyinin "Natəvan" klubunda təqdim olundu. Bu, Türkiyədə çap olunan gənclərin əsərlərindən ibarət "Azərbaycan ədəbiyyatı antologiyası"dır.

Nəşr haqqında geniş məlumatı İLESAM-ın rəhbəri, Azərbaycan ədəbiyyatının dostu və təbliğçisi olan şair Mehmet Nuri Parmaksız verdi:

"2018-ci il Azərbaycan Xalq Cümhuriyyətinin 100 illiyi münasibətilə bizim də bu ilə töhfəmiz olsun istədik və belə bir ideya irəli sürdük ki, 100 azərbaycanlı gənc yazarın əsərlərini antologiya şəklində toplayıb Türkiyədə çap edək. Bu kitab önəmli bir ildə İLESAM-ın həmin 100 gəncə və Azərbaycan Yazıçılar Birliyinə hədiyyəsidir. Kitabda təkcə şeirlər deyil, esselər və hekayələr də toplanıb. Nəşri düzənləyən Fərid Hüseyn və Günel Şamilqızı, redaktoru Rəşad Məcid, yazıları Türkiyə türkcəsinə uyğunlaşdıran Məhəmməd Rzadır. Hər bir gəncə kitab hədiyyə ediləcək.

Bəlkə də bu 100 gəncin içərisindən gələcəkdə Azəbaycanda, bütün türk dünyasında tanınmış yazıçılar, şairlər çıxacaq.

Əgər ortada bir bacarıq, istedad varsa, onu gün üzünə çıxartmaq, ona özünü təsdiqləməsi və tanıtması üçün şans vermək lazımdır. Biz də bu kitabla bunu etmək istədik.

Əsərlərin toplanmağına, başda Azərbaycan Yazıçılar Birliyinin Gənclərlə iş üzrə katibi Rəşad Məcid olmaqla, AYB dəstək verdi. Amma antologiyanın Türkiyədəki çapı İLESAM-a məxsusdur. Kitabla ilk mən tanış olmuşam. Burada tanımadığım bir çox yazıçı ilə qarşılaşdım, əsərlərini oxudum".

Müsahibimiz kitabın hazırda Türkiyədə satışda olduğunu dedi: "Qısa zamanda antologiya kitabxanalara da paylanacaq və ölməz bir əsər olaraq qalacaq deyə düşünürəm.

Azərbaycanla bağlı bizim layihələrimiz çoxdur. Bir çoxunu həyata keçirtmişik, amma yenə də fəaliyyətimiz davam edir. Bu gün (16 oktyabr-red) axşam Beynəlxalq Muğam Mərkəzində Türk Dünyası şeir axşamı keçiriləcək. Bu layihələrlə biz qardaşlığımızı, dil, ədəbiyyat, mədəniyyət birliyimizi gücləndirməyə çalışırıq.

Bu, bir fürsətdir. Bu fürsəti yaxşı dəyərləndirmək lazımdır. Yaradıcı işlə, sənətlə məşğul olmaq heç də asan deyil. Bizim bir mərhum yazıçımızın belə bir sözü var: "Sənətçi olacam deyə yola çıxmaq dəri köynəyi geyinməyə bənzəyər". Bu o deməkdir ki, yaxşı şair ola, şeir yaza bilərsiniz. Hazırda az qala hər kəs şeir yazır. Dünyanın hər yerində şeir yazanlar var. Bu, milyonlarla, milyardlarla insan deməkdir. Bu qədər insanın içərisindən fərqlənəcəm, ən üst səviyyəyə çatacam deyə düşünmək az qala dəlilikdir. Amma elə olmadıqda da sənət üzə çıxmır. Buna görə də biz 100 gənc şairin əsərlərini bir yerə toplayaraq onların həm Türkiyədə, həm də dünyada tanınması üçün bir fürsət yaratdıq, adına da "Azərbaycan ədəbiyyatı antologiyası" dedik. Təbii ki, Azərbaycan ədəbiyyatı yüz nəfərdən ibarət deyil. Burada onun bir qismi yer alıb. Amma yüzüncü ilə ithafən bu yüz nəfər seçildi. Sonrakı illərdə də bizim layihələrimiz, işlərimiz davam edəcək. Digər yazarlar da gələcək layihələrimizdə yer alacaqlar".

M.N.Parmaksız İLESAM-ın digər türkdilli ölkələrdəki geniş fəaliyyətindən də söz açdı:

"Bir şeyi də vurğulayım ki, bizim fəaliyyətimiz təkcə Azərbaycanla yekunlaşmır. Özbəkistan, Qırğızıstan, Qazaxıstan, Türkmənistan, Balkanlar - Türk və İslam topluluqlarında bir çox ədəbi tədbirlərin keçirilməsində, dərgilərin çapında İLESAM-ın maddi və mənəvi dəstəyi vardır. Bunu çox da dilləndirmirik, amma hər zaman yanlarındayıq, kitabların, dərgilərin çapında və onun dünyaya yayılmasında əlimizdən gələni edirik. Bunu ona görə edirik ki, Türk dünyasının uzun zaman bir-birindən ayrı düşmüş qolları bir ortaq nöqtədə birləşsin, nəhayət, bir yumruq ola bilsin. Onlar bir yerdə birləşəndə əsl güc ortaya çıxacaqdır.

İnsan günü gəlincə dünyanı tərk edib gedir, heç kim əbədi deyil. Amma əsərlər əbədi olaraq qalır, müəllifini də yaşadır. Bir milləti millət edən ədəbiyyatdır, sənətdir. Biz bunun da fərqindəyik. Buna görə də biz Türk dünyasındakı hər yaradıcı şəxsə faydalı olmağa çalışırıq. Bunda isə heç bir təmənna güdmürük. İstədiyimiz - Türk adının, Türk ədəbiyyatının, sənətinin dünyada layiqincə təmsil olunmasıdır. Xoşbəxtlik nə pulla, nə də uğurla ölçülər, xoşbəxtlik gələcəyə dair iz buraxmaqla, ya da gələcəkdə iz buraxacaq insanları bir yerə toplamaqla olar".

Şahanə MÜŞFİQ

525-ci qəzet 2018.- 16 oktyabr. - S.7.