Mənim

Həsrət dağlarına sinə gərməyə

Sinəmdə dağ boyda ürək var mənim.

Qonağın üzünə hey açıq olan

Süfrəmdə bal dadan çörək var mənim.

İnsanın içinə düşəndə qorxu,

Qaçar ağzın dadı, yox olar yuxu.

Deməsəm bilməz ki, dostların çoxu

Yolumda fitnə var, kələk var mənim.

Fuadam, gözəldi mənimçün həyat!

Sevgi olan yerdə nə şöhrət, nə ad?

İlahi, bu yatmış bəxtimi oyat!

Qəlbimdə min arzu, dilək var mənim!

Dözüm

Yenə də həsrətlə qol-boyunam mən,

Dözüm ürəyimin qəminə, dözüm.

Həyat dedikləri elə budursa,

Dözüm dünyanın bu gününə, dözüm.

Salıb sinəm üstə ağır daşını,

Mənə yaşadırlar ömrün qışını,

İblislər alıbdı böyür-başımı,

Gərək şeytanına, cininə dözüm.

İblisə, xainə, xəsis, paxıla,

Özünü çox sevən, səfeh ağıla.

Dözəcəm lap belə dünya dağıla,

Yüzünə dözmüşəm, mininə dözüm.

Qədəhim boş olur, neynim, dolu yox,

Eşqimin qanadı, nə də qolu yox.

İynə ucu boyda çıxış yolu yox,

Ömrün dumanına, çəninə dözüm.

Mənimlə aylarla danışmayanın,

Səbəbsiz inciyib barışmayanın,

Yanımda olmağa çalışmayanın -

Fuadam, bir qızın kininə dözüm!

Dayanma, ürəyim!

Qayğıdan, cəfadan uzaqlaş bir az,

Bir az ərköyün ol, uşaqlaş bir az,

Həvəslə döyünüb qoçaqlaş bir az,

Dayanma, ürəyim, dayanma, nolar!

Şam kimi ərimə, zamanın deyil,

Ağrıma, bir kimsə yananın deyil.

Bilirəm, bu yerlər məkanın deyil,

Deyinmə, ürəyim, deyinmə, nolar.

Üzülmə - budaqdan yarpaqlar kimi,

Qırılma incəcik qovaqlar kimi.

Çatlama həsrətli torpaqlar kimi,

Bölünmə, ürəyim, bölünmə, nolar!

Mənsiz

Hardasa bir gözəl məndən nigaran

Yaşayır ömrünü, yaşayır mənsiz.

Fikri qarmaqarış, ümidi viran,

Daşıyır bir həsrət, daşıyır mənsiz.

Hicranı yolundan daşlasa da o,

Yeni bir sevdaya başlasa da o,

Başqa bir ürəkdə qışlasa da o,

Danışır şəklimlə, danışır mənsiz.

Qızının ətridir - ən əziz qoxu,

Neyləsin ki, odur tək varı-yoxu.

Xeyirə yozulmur gördüyü yuxu,

Qarışır yuxusu, qarışır mənsiz.

Fikirlər edibdi halını xarab,

Yaralı qəlbində qalmayıbdı tab.

Yükü qucaq-qucaq, dərdi bir kitab,

Barışır dərdlərlə, barışır mənsiz.

Gözünə qor dolur, qaranlıq çökür,

Qisməti yoluna çınqıllar tökür.

Fələk inamını tarıma çəkir,

Vuruşur həyatla, vuruşur mənsiz.

Bir salamım var!

Ay qərib qardaşlar, qərib bacılar,

Vətəndən sizlərə bir salamım var!

Üç gün yol gəlmişəm, şahiddi yollar,