Vətən sevdalı, yurd həsrətli poeziyanın yeni təntənəsi

ŞAİR NƏSİB NƏBİOĞLUNUN "SEÇİLMİŞ ƏSƏRLƏRİ"NİN BİRİNCİ CİLDİ AZƏRBAYCAN YAZIÇILAR BİRLİYİNDƏ TƏQDİM EDİLDİ

Dünən Azərbaycan Yazıçılar Birliyinin "Natəvan" klubunda Moskvada yaşayan tanınmış şair Nəsib Nəbioğlunun "Seçilmiş əsərləri"nin I cildinin təqdimat mərasimi keçirilib.

Mərasimdə AYB rəhbərliyi, tanınmış yazıçılar, şairlər, ziyalılar, ictimaiyyət nümayəndələri və jurnalistlər iştirak ediblər.

Tədbiri giriş sözü ilə açan AYB-nin katibi Rəşad Məcid Nəsib Nəbioğlunun həyat və yaradıcılığı haqqında qısa məlumat verib, onunla tanışlığından bəhs edib. N.Nəbioğlunun çox uzun illərdir qürbətdə - Moskva şəhərində Azərbaycan mədəniyyətini, ədəbiyyatını layiqincə təmsil etdiyini deyən R.Məcid onu təvazökar, həlim xasiyyətli dost, insan kimi xarakterizə edib. Təqdim olunan "Seçilmiş əsərlər"in birinci cildinə şairin ömrünün müxtəlif dövrlərində qələmə aldığı şeirlərin toplandığını nəzərə çatdırıb.

Professor Qəzənfər Paşayev çıxışına N.Nəbioğlunun kəlbəcərli olmasını xatırlatmaqla başlayıb. O, Kəlbəcər torpağının Azərbaycan ədəbiyyatına bir-birindən gözəl şair və yazıçılar bəxş etdiyini vurğulayıb: "Azərbaycanın gözəl guşələrindən olan Kəlbəcərdən çox gözəl şairlər var. Onların arasında mənim tələbələrim də var, dostlarım da. Nəsib də mənim tələbəm olub. Sonra isə onunla bizim çox gözəl dostluğumuz yarandı və bu günə kimi də davam etməkdədir. Nəsib Nəbioğlunun yaradıcılığı özünəməxsusluğu, özünəxas ifadə tərzi ilə seçilir. Onun yaradıcılığında el ədəbiyyatının nəfəsi var. Yaradıcılığının böyük hissəsini vətən həsrəti, el sevgisi, vətəpərvərlik duyğuları təşkil edir. Bu hisslər onda səmimidir, təbiidir. Bu da bəlkə də onun uzun illərdir vətəndən uzaq olması ilə əlaqədardır. O, bu həsrəti ürəyində daşıyır və şeirdə çox gözəl şəkildə qələmə alır".

Q.Paşayev qeyd edib ki, Nəsib Nəbioğlunun şeirləri istedadın, həssas qəlbin və gərgin zəhmətin nəticəsidir: "Onun bütün yaradıcılığında Kəlbəcər nisgilini, ağrı-acısını görürük. Şeirləri rəssamlar üçün də çox gözəl materialdır. Çünki hər bir şeir özü-özlüyündə canlı tablodur. Nəsib Nəbioğlu həmçinin, qayğıkeş, həssas, ürəyi insan sevgisi, həyat eşqi ilə dolu olan insan və şairdir".

N.Nəbioğlu ilə tanışlığından bəhs edən AYB sədri, Xalq yazıçısı Anar da çıxışında şairin poeziyasındakı vətən nisgilindən söz açıb. Qeyd edib ki, onun yaradıcılığında iki motiv var: vətənin, Azərbaycanın təbliği və həsrəti: "Nəsib Nəbioğlu üç həsrət çəkir. Bunlardan ikisi tezliklə həll oluna biləndir, üçüncüsünün isə həlli üçün zaman lazımdır. Birincisi, Bakının həsrətidir ki, o, Moskvada ikən Bakının həsrətini çəkir. Bu, tez həll olur. Çünki istədiyi zaman durub Bakıya gəlir. İkincisi, Moskvanın həsrətidir ki, Bakıda ikən ora üçün darıxır və bu da ora qayıtmağı ilə həll olunur. Üçüncü, ən vacib həsrət isə Kəlbəcərin həsrətidir. Təəssüf ki, bu həsrətin öhdəsindən hazırkı durumda gəlmək mümkün deyil. Amma biz inanırıq. İnanırıq ki, tezliklə bu həsrət də bitəcək. Mən onun "Seçilmiş əsərləri"nin ikinci cildinin təqdimatının Kəlbəcərdə keçirilməsini arzu edirəm".

Şair üçün, yazıçı üçün ən vacib şeylərdən birinin məhz kitab olduğunu deyən AYB-nin katibi, Xalq şairi Fikrət Qoca N.Nəbioğlunu yeni kitabı münasibətilə təbrik edib. O, çıxışında qeyd edib ki, N.Nəbioğlu şəxsiyyəti ilə poeziyası səsləşən şairdir, onu hər kəsə sevdirən də məhz bu uyğunluqdur.

Şair Ramiz Rövşən də çıxışında Kəlbəcər ədəbi mühitinin özünəməxsusluğundan söz açıb, N.Nəbioğlunun bu ədəbi mühitin seçilən imzalarından olduğunu vurğulayıb: "Nəsib Nəbioğlunun şeirlərində Kəlbəcərin havası, suyu, ətri var. O dağların əzəməti çöküb sanki bu şeirlərə. Şairin özünün xasiyyətindəki vüqar, əzəmət poeziyasına da xasdır. Ona görə də onun şeirləri tez əzbərlənir, ayrı-ayrı misralar insanın yaddaşına hopub qalır".

Şairi yeni kitabı münasibətilə təbrik edən AYB katibi, Xalq yazıçısı Çingiz Abdullayev də N.Nəbioğlu yaradıcılığının fərdiliyindən söz açıb, ona olan sevgidən, hörmətdən bəhs edib.

Professor Şirindil Alışanlı N.Nəbioğlunu milli şair adlandırıb, qeyd edib ki, o, ölkəmizdən kənarda Azərbaycanı həmişə layiqincə təmsil edir.

Yazıçı Seyran Səxavət müəllifin əsəri ilə şəxsiyyətinin uzlaşmasından danışıb. O deyib ki, gözəl xasiyyətə, əxlaqa, yüksək intellektə malik insanın əsəri də özü kimi olur: "Buna ən bariz nümunələrdən biri Nəsib Nəbioğlunun şeirləridir. O, hər misrasında səmimidir, özüdür. Heç bir pafosa, şişirtməyə yol vermir, saxta hissləri poeziyasına daşımır. Ona görə də oxucu onun şeirlərində özünü, öz hisslərini tapır. Sanki bu poeziya ona doğmalaşır".

Professor Şahlar Əsgərov N.Nəbioğlunun Moskvadakı şərəfli fəaliyyətindən söz açıb. O, AYB-nin Moskva filialının rəhbərlərindən biri kimi yad torpaqlarda Azərbaycanın adını təmsil edən, ona layiq fəaliyyəti ilə seçilən şairin Moskvada Kəlbəcər izləri qoymağı bacardığını da deyib: "Nəsib müəllimin Moskvada çap olunan kitabının oradakı təqdimatı zamanı bir rus qiraətçi onun şeirlərindən birini rus dilindən çox gözəl bəlağətlə ifa edir. Bu şeirdən təsirlənən rus şairlərindən biri çox həyəcanlanır və ayağa qalxaraq: "Mən ermənilərdən tələb edirəm ki, Nəsib Nəbioğlunun Kəlbəcərini onun özünə qaytarsınlar" - deyir. Bu hadisə özü də o deməkdir ki, Nəsib müəllim yaradıcılığı, fəaliyyəti ilə Azərbaycan gerçəklərini, Qarabağ həqiqətlərini yad ellərdə diqqətə çatdıra bilib".

Professor Qulu Məhərrəmli deyib ki, N.Nəbioğluda şəxsiyyətlə yaradıcılıq vəhdət halındadır və bu, sənətkar üçün çox vacib cəhətdir.

Şairin yaradıcılığına dərin sevgisini dilə gətirən aktyor-qiraətçi Şirzad Pirallahi onun "Ayrılmasın könül candan" şeirini səsləndirib.

Aşıq Ədalət Dəlidağlı şairin şeirlərini saz havalarıyla oxuyub, onun müşayiətilə müəllif özü "Nənəmin cəhrəsi" şeirini ifa edib.

Kitabin nəşriyyat redaktoru Əlövsət Ağalarov Nəsib Nəbioğlunun təqdim edilən "Seçilmiş əsərləri"nin birinci cildinin onun yaradıcılığının çox kiçik bir hissəsi olduğunu deyib və tezliklə əsərlərin yeni nəşrinin təqdim olunacağına ümid etdiyini deyib.

Şairin tələbə yoldaşları Sabir Mahmudov və İslam Sadıq onunla uzun illərdir dostluq etdiklərini, şairliyindən əlavə, bir insan, şəxsiyyət, dost kimi çox gözəl tanıdıqlarını qeyd ediblər. N.Nəbioğlunun hələ gənclik illərindən ədəbiyyata, şeirə, sözə vurğunluğunu deyərək, bu sevginin, fitri istedadın və yüksək şəxsi keyfiyyətlərin nəticəsində Azərbaycan ədəbiyyatına Nəsib Nəbioğlu imzasının uğurla yazıldığını deyiblər.

Daha sonra qonaqlardan Ramiz Qusarçaylı, Ayaz Arabaçı, Sahib Əkbərov, Maşallah Məftun, Əhməd Əsfun, Hacı İlham, Fazil Hacıyev, Mirsəyyaf Zamanlı, Ələmdar Keştəkli və başqaları söz alaraq Nəsib Nəbioğlun yaradıcılığı və şəxsiyyəti haqqında fikirlərini bölüşüb, onu yeni kitabı münasibətilə təbrik ediblər.

Qeyd edilib ki, onun əsərləri qürbətdə göynəyə-göynəyə qalan, yuxusu ərşə çəkilən, ürəyində Qarabağ boyda dərd gəzdirən, torpaq, yurd sevgisi aşılayan şairin ürək çırpıntılarıdır. Onun yaradıcılığının başlıca mövzuları insan və zaman, Vətən sevgisi, xeyir və şər, milli-mənəvi dəyərlərimizə sadiqlik, ülvi məhəbbət, yurd təəssübkeşliyi, doğma vətənimiz Azərbaycana əsl oğul məhəbbətidir. Bu şeirlərin mündəricəsində Qarabağımızın işğalı, qaçqın və köçkünlərimizin acı taleyi, vətəndaşlıq mövqeyi, torpaq, yurd sevgisi dayanır.

Aşıq Şəmşir Ocağının nümayəndəsi Həbib Misirov ədəbiyyatdakı fəaliyyətinə, vətənpərvərlik hisslərinin uğurlu təbliğinə görə Nəsib Nəbioğlunu diplomla təltif edib.

Sonda çıxış edən şair yaradıcılığına göstərilən diqqət və qayğıya görə, başda AYB-nin sədri Anar və Birliyin rəhbərliyi olmaqla, tədbirdə iştirak edən, haqqında fikir söyləyən hər kəsə təşəkkürünü bildirib və qonaqlar üçün kitablarını imzalayıb.

Şahanə MÜŞFİQ

525-ci qəzet 2018.- 28 sentyabr.- S.7.