Zərifə Əliyeva adına Liseydə “Anarla üz-üzə”

Yanvarın 9-da Akademik Zərifə Əliyeva adına Liseydə Xalq yazıçısı Anarın 80 illik yubileyinə həsr olunmuş “Anarla üz-üzə” adlı görüş keçirilib. Tədbirdə liseyin müəllim-şagird heyəti, Təhsil nazirliyinin nümayəndəli, media mənsubları iştirak ediblər.

Tədbiri giriş sözü ilə açan liseyin direktoru Mehriban Vəliyeva öncə şagirdlərin uğurlarından, burda keçirilən tədbirlərdən, görüşlərdən danışıb: “Biz şagirdlərimizin hərtərəfli inkişaf etməsini, biliklərə dərindən yiyələnməsini istəyirik. Çağdaş zamanda savadlanmağın, dünyagörüşünü artırmağın yolları çoxdur. Amma bizə belə gəlir ki, Xalq yazıçısı Anar kimi görkəmli şəxsiyyətlərimizi təkcə onların kitablarından yox, həm də onlarla üz-üzə, bax belə görüşlərdə öyrənməliyik. Həmçinin xoşbəxtik ki, bu il Anar müəllimin ilidir, 80 yaşı tamam olur və elə yubiley tədbirlərinə də bizim lisey start verir”.

Mehriban Vəliyeva sonra Xalq yazıçısı Anarın yaradıcılığına aid fikirlərini tədbir iştirakçıları ilə bölüşüb: “Anar müəllimin əsərlərini hər yaşda bir cür qavrayır, hiss edirik. Bir neçə sənətkar var ki, onların yaradıcılığına təkrar-təkrar qayıtmaq, yenidən oxuyub, ayrı yöndən dərk etmək lazım olur. Anar müəllim belə sənətkarlarımızdandır. Təxminən iki aydır ki, biz şagirdli, müəllimli, hamımız Anar yaradıcılığı ilə yaşayırıq. Hamımız sevə-sevə oxuyuruq bu böyük yazıçını, həmçinin şagirdlərimizə də oxudub, müzakirələr edirik. Əlbəttə, Anar müəllim bir çox suallara elə əsərlərindəcə cavab verir. Amma biz istədik ki, bu gün onunla üz-üzə olub bəzi məsələləri özündən soruşaq... Lakin daha öncə sizləri Anarın şəhərinin sakinləri ilə görüşdürmək istədik...”

Əməkdar artist, liseyin dram dərnəyinin rəhbəri Bəhruz Vaqifoğlunun Anarın müxtəlif hekayələri əsasında hazırladığı kiçik tamaşa böyük maraqla qarşılanıb. “Asılqanda işləyən qadının söhbəti”, “Mən, Sən, O və telefon”, “Taksi və vaxt” və digər hekayələrin personajları bu səhnədə çox doğmalaşıb, yaxınlaşıblar. Tamaşada əsas rollarıliseyin şagirdləri Atakişiyeva Leyla, Əliyev Məcid, Əhmədova Həqiqət, Əliyeva Xəyalə, Qənbərli Rəsul, Hüseynov Əbülhəsən, Mehdixanlı Emil, Əlizadə Elvin, Həziyev Teymur, Yusifli Fidan, Seyidli Zöhrə, Əzizov Aqşin canlandırıblar.

Liseyin Azərbaycan dili və ədəbiyyat müəllimi Günel Bağırovanın Anarın yaradıcılığından bəhrələnərək qələmə aldığı “Mən kiməm?” adlı mətn və liseyin şagirdinin hazırladığı video-çarx tədbir iştirakçılarına təqdim olunub.

Liseyin direktoru həm mətnin yazılma, həm də video-çarxın hazırlanma tarixçəsindən danışıb: “Anar müəllim, biz sizin dilinizdən, daha doğrusu qəhrəmanlarınızın vasitəsiylə “Mən kiməm?” sualına cavab tapmağa çalışdıq. Amma istərdik öz dilinizdən müəyyən suallara cavab tapaq...”

Xalq yazıçısı Anar liseyin rəhbərliyinə, müəllim və şagird heyətinə minnətdarlığını bildirib: “Bilirsiz, əslində çox yerlərə dəvət edirlər, görüşlərdə oluruq. Amma səmimi deyim, uzun illərdir ki, bu qədər təsirləndiyim, təəccübləndiyim olmamışdı. Liseyin şagirdləri hekayələrimin qəhrəmanlarını professionallara xas şəkildə təqdim etdilər. Həmçinin mənim dilimdən yazılmış mətn, hazırlanan video da çox təsirlidir. Eyni zamanda tədbirdən əvvəl direktor Mehriban xanım liseyin uğrularından, keçirilən tədbirlərdən, şagirdlərin imtahanlarda göstərdiyi nəticələrdən danışdı. Bütün bunlar bizi çox qürurlandırır. Əslində elə arzuladığımız da budur. Yeni gələn nəslin milli-mənəvi dəyərlərimizə, sənətə, sözə, ədəbiyyata bağlı böyüməsini istəyirik. Əlbəttə tədbirimiz davam edir. Amma mən elə indidən bu tədbirin təşkilatçılarına öz təşəkkürlərimi çatdırıram”.

Sonra yazıçı şagirdlərin və müəllimlərin suallarını cavablandırıb. Anarın müxtəlif əsərləri ətrafında müzakirələrlə tədbir davam edib.

Müzakirələrdən sonra şagirdlər 3 komandaya ayrılaraq Breyn-rinq yarışmasına qatılıblar. Komandalardan birinin kapitanı yazıçı Anar, digərinin kapitanı AYB-nin katibi, “525-ci qəzet”in baş redaktoru Rəşad Məcid, üçüncünün isə kapitanı yazıçı-publisist Pərvin olub. 3 mərhələdən ibarət olan yarışma böyük coşqu ilə keçib. Birinci mərhələdə yarış iştirakçıları 8 sözdən ibarət qısa hekayə yazıblar, ikinci mərhələdə tapşırıq Anarın “Macal” əsərinin sonluğunu ayrı cür yazmaq olub, üçüncü mərhələdə isə Anarın əsərlərinə aid 15 sualdan ibarət yarış keçirilib. Yazıçı Anarın komandasında Mirzəyeva Şəbnəm, Alışanlı Tərlan, İsmayılova Gülqayıt, Rəşad Məcidin komandasında Əhmədova Fəridə, Eynullayeva Zəhra, Hüseynli Gülnar, Pərvinin komandasında Əliyeva Dilbər, Əhmədzadə Aslan, Abbasova Mehriban yarışıblar. Münsiflər heyətinin qərarına görə Xalq yazıçısı Anarın komandası birinci yerə layiq görülüb. Qaliblər və yarış iştirakçıları diplomlarla təltif ediliblər. Sonda yazıçı çıxış edərək təəssüratlarını bölüşüb: “Əziz şagirdlər, yubileyimin bu cür sizlərin aranızda, həm də bu səviyyədə qeyd olunmasından məmnunam. Çox istərdim ki, başqa yazıçılarımızla da bu cür görüşlər keçirilsin. Mənim üçün unudulmaz görüş oldu. Ədəbiyyata sizdə bu cür maraq oyadan müəllimlərinizə də dərin təşəkkürlərimi bildirirəm. Həmçinin bu görüşü təşkil edən liseyin direktoru Mehriban Vəliyevaya minnətdaram”.

Sonra Azərbaycan Yazıçılar Birliyi ilə Zərifə Əliyeva adına Lisey arasında əməkdaşlıq müqaviləsi imzalanıb. Müqaviləyə əsasən, birlikdə seminarların, təlimlərin və bədii tədbirlərin keçirilməsi, şagirdlərin ümumrespublika və beynəlxalq yarışlara hazırlıqlarına köməklik göstərilməsi, birlikdə müsabiqə, sərgilərin təşkil edilməsi, muzeylərə ekskursiyalarıntəşkili nəzərdə tutulub.

Sonda Anar liseyin müəllim və şagird kollektivi ilə xatirə şəkili çəkdirib, kitablarını imzalayıb.

NƏZRİN

525-ci qəzet 2018.- 11 yanvar.- S.4.