Zəlimxansız bir il də keçdi...
ARADAN KEÇƏN MÜDDƏT ONUN
"YAŞATSA, SÖHBƏTİ-SÖZÜ YAŞADAR
ŞAİR ZƏLİMXANI QOCA DÜNYADA"
HƏQİQƏTİNİ TƏSDİQLƏYİR
Şahanə
MÜŞFİQ
Məndən
salam olsun gündə yüz dəfə,
Yurdumun
dili bal şairlərinə.
Ürəyi
dumduru, ruhu tərtəmiz,
Halaldan da halal şairlərinə.
Yadıma gəlir, mənim uşaq ikən adını
eşitdiyim ilk şair Zəlimxan Yaqub olub. Onda hələ
çox kiçik idim, şeir nədir, ədəbiyyat nədir,
şair kimdir bilməzdim. Amma evimizdə Zəlimxan
adlı bir şairi sevirdilər.
Sonralar, yəni hərfləri, ədəbiyyatı,
poeziyanı öyrəndiyim, şairin kimliyini dərk etdiyim
zamanlarda Zəlimxan Yaqub adı daha çox marağıma səbəb
olmuşdu. Bir neçə dəfə televizorda da
görmüşdüm. Ucaboy, enlikürək, şəvə
kimi qara saçlı, qədim kişilərə xas
görünüşlü bu adam elə
yüksək şövqlə danışır, şeir
oxuyurdu ki, diqqət kəsilməmək mümkün deyildi.
Birində "Səni sevmək üçün gəldim
dünyaya" deyirdisə, başqa vaxt "Biz niyə sevməyək
bir-birimizi?!" - deyib sual edirdi. Bəzən
"Həyatı duymaq"dan söz salır, bəzən isə
"Suallar...suallar" deyib "Əbədiyyət" haqda
düşüncələrə dalırdı.
Biz isə məktəbimizdəki vətənpərvərlik
mövzulu tədbirlərimizdə daha çox onun və Məmməd
Arazın şeirlərindən istifadə etdiyimizdən o,
artıq mənim üçün "Vətən
şair" idi. "Vətən deyəndə gərək
adamın dodağı çatlasın, bayraq deyəndə gərək
ürəyin yerindən oynasın" - deyən şairin
şeirləri də məhz adamın dodağını
çatladan, ürəyini yerindən oynadan şeirlərdir.
"Anam
Qarabağ" deməkdən
dilim
oldu dilim-dilim,
Mərd
oğullar şəhid oldu,
sağ
gedənlər sağ gəlmədi.
Bu misraları həyəcansız, ağrısız
oxumaq olarmı?!
Yanvarın 21-i "Vətən şair"in doğum
günü idi. Yaşasaydı, 68 yaşını qeyd edəcəkdi...
Borçalının Bolnisi rayonunun Kəpənəkçi
kəndində anadan olan Zəlimxan Yaqub elə həmin kənddə
də orta məktəbi bitirdikdən sonra Azərbaycan Dövlət
Universitetinin kitabxanaçılıq fakültəsində təhsil
alıb.
1973-cü ildən 1978-ci ilə qədər "Azərkitab"
sistemində, "Kitab pasajı" adlı kitab
dükanında satıcı, baş satıcı, şöbə
müdiri, 1975-ci ildən 1985-ci ilə qədər Azərbaycan
Könüllü Kitabsevərlər Cəmiyyətində təbliğat
şöbəsində redaktor, şöbə müdiri,
1987-ci ildən 1994-cü ilə qədər
"Yazıçı" nəşriyyatında poeziya
şöbəsində redaktor, şöbə müdiri vəzifələrində
çalışıb.
Z.Yaqubun fəaliyyəti bununla da yekunlaşmır. O, həm də uzun müddət
ictimai xadim kimi xalqına, dövlətinə xidmət edib. 1995-2005-ci illərdə Azərbaycan
Respublikasının Milli Məclisinin deputatı olub.
Yaradıcılığa
ilk dəfə 15 yaşında başlayan şairin ilk
şeiri 1966-cı il oktyabrın 4-də,
Gürcüstan SSR Bolnisi rayon qəzeti "Qələbə
bayrağı"nda dərc edilib.
Şair müsahibələrinin birində "Kitab
pasajı"nda işləyərkən əvvəllər
işindən narazı olsa da, oranın həyatında silinməz
izlər buraxdığını, gələcəyində həlledici
rol oynadığını deyib. Belə ki, bütün gün
kitabların arasında olarkən müxtəlif kitabları
oxuyub, dünyagörüşünü zənginləşdirib,
şair və yazıçılarla, cəmiyyətdə
sayılıb-seçilən söz adamları ilə tanış olub. Dediyinə
görə, hər dəfə kitablara baxanda
öz-özünə sual edərmiş ki, görəsən,
nə zamansa, mənim də kitablarım bu kitabların
sırasında olacaqmı? Və tale elə
gətirir ki, onun kitabları həmin rəflərdəki
kitabların çoxusundan da yüksəkdə dayanır.
2005-ci ildə
Xalq şairi fəxri adına layiq
görülən, 2008-ci ildə Aşıqlar Birliyinə sədr
seçilən şairin səsi yalnız vətənində
deyil, vətənindən kənarda, sərhədlərin,
dağların, yolların o tayında da tanınır və
sevilir.
Zəlimxan
Yaqubla bağlı heç unutmadığım iki xatirəm
var. Onlardan biri budur ki, Zəlimxan müəllim mənim
adını ilk eşitdiyim şair olmaqdan əlavə, məndəki
ilk imzalı hədiyyə kitabın da müəllifidir:
2009-cu ildə 10-cu sinifdə oxuyarkən "Azərbaycan dili
və ədəbiyyatı" fənnindən olimpiadanın
rayon və şəhər turlarını birinciliklə
bitirib sonuncu - respublika mərhələsinə imtahan verməyə
getmişdim. Həmin gün seçki komitəsində
işləyən anam bir müəllim yoldaşı ilə
birgə onların seçki dairəsinə daxil olan Zəlimxan
müəllim və ailəsi haqqında məlumatları
yazmaq üçün onların evinə getmişdi. Qonaqları böyük hörmət və
mehribanlıqla qarşılayan, özünəməxsus
şux zarafatlarından qalmayan şair sonda "şairin
sovqatı kitabı olar" deyibən onlara özünün
imzalı kitabını hədiyyə etmək istəyir.
Onda anam şairə məndən söz
açır və hazırda imtahanda olduğumu, ədəbiyyatı
və onun yaradıcılığını çox sevdiyimi
danışır. Xahiş edir ki, ona
çatacaq kitabı qızının, yəni mənim
adıma imzalasın. Şair də
2006-cı ildə işıq üzü görmüş
"Mən bir dağ çayıyam" adlı şeirlər
kitabını "Şahanə qızıma gələcəkdə
uğurlar diləyi ilə müəllifdən hədiyyə"
imzası ilə anama təqdim edir. Bu kitaba
həyatımın ən böyük sürprizi deyə bilərəm.
Ədəbiyyatı sevən, amma ədəbi aləmdən
çox böyük məsafələrlə uzaq olan bir
yeniyetmə üçün bundan gözəl hədiyyə
düşünə bilmirəm. Həmin
günlərdə Zəlimxan Yaqubu gördüyü
üçün anamı elə hey onun haqqında
danışdırırdım. Ağlıma gəlməzdi
mənim də çox yox, cəmi bir neçə il sonra onunla qarşılaşa, hətta
söhbət edə biləcəyim.
2012-ci ilin payızında böyük şair Xəlil
Rza Ulutürkün Akademik Milli Dram teatrında yubileyi qeyd
olunurdu. Onda Bakı Dövlət Universitetinin tələbəsi
idim. Fakültədən bizə cəmi 3
bilet göndərmişdilər.
Həmin
gecədə kimlər yox idi ki... Kitablardan
tanıyıb əsərlərilə sevdiyim, hörmət bəslədiyim,
əlçatmaz hesab etdiyim şairlərin,
yazıçıların çoxusu orada idi. Eləcə də Xalq şairimiz Zəlimxan Yaqub.
Artıq xəstəliyinin ağır dövrlərini
yaşadığından arıqlamışdı,
üzündən halsızlıq, yorğunluq oxunurdu. Çıxışda qorxa-qorxa
yaxınlaşdım, salamlaşdım. Güclə
gülümsəməyə çalışdı, ehtiramla
salamımı aldı. Ayaqüstü onun səhhəti,
mənim təhsilim haqqında söhbət etdik və getdi...
Ondan sonra bir dəfə də hansısa tədbirdə
gördüm.
Sonra isə vəziyyəti daha da
ağırlaşdı və 2016-cı ilin 9 yanvarında
gözlərini əbədiyyən həyata yumdu.
Bir ədibin şəxsiyyətimi, yoxsa
yaradıcılığımı önəmlidir deyə
çox müzakirələr gedir. Kimi şəxsiyyəti,
kimi də yaradıcılığı önəmli hesab edir.
Mən isə şəxsiyyət
yaradıcılığı, yaradıcılıq şəxsiyyəti
tamamlamalıdır deyənlərdənəm. Zəlimxan Yaqub şəxsiyyəti
poeziyasını, poeziyası isə şəxsiyyətini
tamamlayan şair idi. Ən əsası o, kim
olduğunu və nə istədiyini, hansı amala qulluq etdiyini
çox gözəl bilirdi. Ona görə də
bütün həyatı boyunca tutduğu mövqedən,
dediyi sözdən bir kəlmə də kənara addım
qoymadı. Bəlkə də bu, onun
"ürəyindəki Tanrı işığından"
irəli gəlirdi. Nə təsadüf ki, onun
haqqında eyni sözləri şair Rüstəm Behrudi də
deyib: "Bir adam var-sözü sazın pərdələrindən
söküb mirvari kimi sapa düzən bir adam. O adam da özündən xəbərsiz
içində işıq gəzdirir. O, Zəlimxan
Yaqubdur".
Zəlimxan
Yaqub şeirlərində ən çox Tanrısına
müraciət edən, onunla söhbətləşən
şairlərdəndir:
Yaratdıqca
ürək, yaratdıqca əl,
Daşında gül açır, torpağında ləl.
Sənin
yaratdığın hər şeydən gözəl,
Əsərin nə gözəl əsərdi, Tanrım.
"Yazıçıya,
şairə hörmət etmək hamının borcudur... Xalqım məni yaxşı tanıyır" - deyən
şairi xalqı ilə yanaşı, sənət dostları,
ziyalılar, qələm yoldaşları da gözəl
tanıyır və yüksək qiymətləndirirdilər.
Nizami Cəfərov
onun haqqında deyirdi ki, "Zəlimxan Yaqub bu dünyaya
xüsusi missiya ilə gəlib: onun vəzifəsi
böyük sənətin mövqeyində dayanaraq,
böyük idealları təqdiq etməkdən, xalqla dövlət
arasında əsrlər boyu ehtiyac duyulan hormoniyanın
yaranmasına sənətkar-mütəfəkkir xidməti
göstərməkdən ibarətdir".
Bəxtiyar
Vahabzadə onu xalqla eyni yaşda şair
adlandırırdı: "Əgər şair xalq ruhundan
doğan sözü deyə bilirsə, o, həqiqətən
xalqın ürəyində əks-səda tapır. Əks-sədaya çevrilmək üçün isə
xalqla eyni yaşda olmağı bacarmalısan. Zəlimxan Yaqub belələrindəndir".
Zəlimxan Yaqubu Hüseyn Arifə
doğmalaşdıran, sevdirən cəhət məhz budur ki,
"O, əsas enerjisini bəziləri kimi özünü təbliğə
yox, təsirli, bəşəri mövzuları xalq ruhuyla milli
zəminlə bağlamağa sərf edir".
Xəlil
Rza Ulutürk onun çoxşaxəli istedadını bu
cür dəyərləndirib: "Zəlimxan yeganə
şairdir ki, Azərbaycanda heç bir təbliğata
ehtiyacı yoxdur. İnciməsin Mikayıl,
aktyora da ehtiyacı yoxdur. Çünki o,
həm aktyordur, həm şairdir, həm aşıqdır, həm
də küll halında, ensiklopedik lüğətdir.
Natiqdir, böyük ictimai xadimdir" .
"Zəlimxan sinəsi dolu şairdir. Vətən və
torpaq sevgisi, bəlkə də, Zəlimxan şeirində
birincidir" - deyib Musa Yaqub.
Zəlimxan Yaqubun "gözünün işığı kimi" sevdiyi əsərlərdən biri Mövlud Süleymanlının "Köç" romanı olub. O, ədibin dilinin təmiz Azərbaycan dili olmasını yüksək qiymətləndirərdi. Görünür, Mövlud müəllim də onun haqqında eyni fikirdədir: "Sadəcə, bir şeyi deyim: onun yaradıcılığı mənim türkcəmin çox doğma sözlərindən, duyğularından götürülüb ki, bu duyğuların, sözlərin minlərcə yaşı var. Minilliklərin də ruhunu ifadə eləyir".
Rüstəm Kamal isə deyir ki, O, türk dilinin şairidir. O, Azərbaycan mənəviyyatının, Azərbaycan kişiliyinin şairidir.
Ədəbiyyatı, sazı, sözü canı qədər sevən şairimiz ömrünün axır zamanlarında "sazdan küsmüşəm, daha əvvəlki kimi çalıb-oxuya bilmirəm" -desə də, qələmi əlindən yerə qoymadı. Bu haqda deyirdi ki, "Yaradıcılıq mənim ruhumdadır, ürəyimdədir, içimdə, daxili dünyamdadır. Onu heç nə mənim əlimdən ala bilməz. Ölümdən başqa..."
Ölümü isə hər anında, hər saniyəsində gözləyir, ondan qorxmurdu. Çünki: "Ölümdən qorxmağa dəyməz. Hamı öləcək. Amma kişi kimi yaşamaq, bütün insanları ürəklə salamlamaq, ürəklə qarşılayıb yola salmaq, gözəl yaradıcılıq qoyub getmək mənim müqəddəs borcumdur".
Zəlimxan Yaqub ömrünü necə həssas, mərd yaşamışdısa, eləcə də başa vurdu. Eynən özünün də dediyi kimi:
Məni ömrün yolunda çox ölümlər haqladı,
Nə əqidəm sarsıldı, nə inamım laxladı.
Çətin gündə qollarım torpağı qucaqladı,
Ayaqda sürünmədim, baş ömrü yaşamışam...
525-ci qəzet 2018.- 23 yanvar.- S.6.