Tokioda "Azərbaycan musiqisi və rəqsləri axşamı"

Tokionun Yotsuya rayonunda yerləşən "Sun and Moon" (Günəş və Ay) studiyasında keçirilən "Azərbaycan musiqisi və rəqsləri axşamı" adlı konsert proqramı tamaşaçılar tərəfindən böyük maraqla qarşılanıb.

AZƏRTAC xəbər verir ki, yapon sənətçilər tərəfindən təşkil edilən konsertdə şəhərin musiqisevərləri, Azərbaycan-Yaponiya Dostluq Mərkəzinin fəalları iştirak ediblər.

Şərq simli musiqi alətlərində peşəkar ifası ilə Yaponiyada yaxşı tanınan musiqiçi Kiyoşi Ohiranın tarda və tamburda səsləndirdiyi milli musiqi nömrələri və bəstəkar mahnıları, rəqqasə Nəşənin ifa etdiyi rəqslər tamaşaçıların böyük marağına səbəb olub.

Əvvəlcə tədbir iştirakçılarına Azərbaycan, onun qədim və zəngin musiqi mədəniyyəti haqqında məlumat verilib. Qeyd edilib ki, özünəməxsus ənənələrə və səs çalarlarına malik olan Azərbaycan musiqisi çoxəsrlik inkişaf yolu keçib. Bütün dünyada yaxşı tanınan Azərbaycan muğamının və aşıq sənətinin UNESCO-nun Qeyri-Maddi Mədəni İrs Siyahısına daxil edildiyi xüsusi vurğulanıb.

Konsertdə Azərbaycan milli musiqisi nümunələri, bəstəkar mahnıları, eyni zamanda türk və özbək musiqisi səslənib. "Sarı gəlin", "Qız, gül bədən", "Girdim yarın bağçasına", həmçinin "Ağ çiçək" və "Uzun dərə" rəqsləri tamaşaçıların alqışlarına səbəb olub. Kiyoşi Ohiranın tarda və tamburda ifa etdiyi musiqi nömrələri də tamaşaçılar tərəfindən böyük maraqla qarşılanıb. Türkiyədə milli rəqslərimizi öyrənmiş Nəşə xanımın (Kyouka Minaşita) bacarıqlı ifası da tamaşaçıların zövqünü oxşayıb.

Kiyoşi Ohira AZƏRTAC-ın Yaponiyadakı xüsusi müxbirinə bildirib ki, uzun illərdir Yaponiyada türk xalqlarına məxsus musiqi alətlərini ifa etsə də ilk dəfədir ki, rəqqasə ilə birlikdə çıxış edir. "Tamaşaçıların alqışlarından göründüyü kimi ilk dəfə belə proqramla çıxış etməyimizə baxmayaraq, maraqlı alınıb. Xüsusən Nəşə xanımın ifa etdiyi rəqslər yapon qadınların çox xoşuna gəlib. Düşünürəm ki, proqramı genişləndirərək gələcəkdə bu konsertləri davam etdirmək olar".

Azərbaycan və digər türk xalqlarının milli rəqslərini İstanbulda olarkən öyrəndiyini bildirən Nəşə xanım da son dörd ildə əsasən bizim milli rəqslər üzərində işlədiyini bildirib. Qeyd edib ki, onun fikrincə məhz Azərbaycan rəqsləri qadınların gözəlliyini tam göstərməyə imkan yaradır. "Azərbaycan rəqslərindəki hərəkətlər, musiqinin gözəlliyi sanki bir vəhdət yaradaraq insanın ruhunu oxşayır. Milli geyiminizin gözəlliyinin isə heç yerdə bərabəri yoxdur. Düşünürəm ki, bu istiqamətdə fəaliyyətimi genişləndirərək yapon qadınlarına Azərbaycan rəqslərini daha geniş şəkildə öyrətməliyəm. Bunu məndən rəfiqələrim də xahiş edirlər".

Konsert barədə təəssüratlarını bölüşən Tokio sakini Leo Kələntər isə deyib ki, çox gözəl konsert idi. "İlk dəfə idi ki, Azərbaycan musiqisi ilə canlı tanış olurdum. Həm Kiyoşi Ohira, həm də rəqqasə Nəşə xanım Azərbaycan musiqisini Yaponiyada çox gözəl təqdim etdilər. Atam azərbaycanlı olsa da ilk dəfə idi Azərbaycan musiqisinə canlı qulaq asdım. Mənə böyük zövq verdi. Maraqlı konsertə görə minnətdarlığımı bildirir, ifaçılara uğurlar arzulayıram".

525-ci qəzet.- 2019.- 4 dekabr.- S.12.