Qələmsiz yazılanlar
status-esseləri
İstanbulda azan səsinə oyanmaq
və xatırlamaq...
***
... Ötən əsrin 90-cı illərində
İstanbulun Fateh səmtində səhər
pəncərəni açarkən
daş kömürün
tini vurardı adamı. Bu qoxu
həm də qədimlik və təbiilik oyadır, keçmişə nostalji
yaradırdı. Çoxdandır yoxa çıxıb o qoxu. İndi rus qazının
həniri daha çox duyulur ətrafda.
***
"Qaz"ı "qız" oxuyanlar... :)
***
Yaxşı ki, bu nəhəng
hava limanında bir-iki dənə Terras da quraşdırıblar. Azca hava, azca tüstü
arzulayanlar üçün...
***
Hər şeyi
həzm etmək olmur.
***
Pul həm də unutdurur - məğlubluğu,
qüsurları, zəiflikləri,
səhvləri...
***
"A"
hərfi başlanğıcda
da ola
bilər, sonda da. Baxır sən hardan
gəlirsən.
***
İnformasiyasız qalmaq əzabı...
İnformasiyasız yaşamaq xoşbəxtliyi...
***
Bəzən hamını və
hər şeyi unutmaq, daldaya və gizlinə çəkilmək istəyirsən...
***
Hər şeydə
dərin səbəb axtarmazlar ki. Sadə izahı
varmış hamısının.
***
Şuşaya Nazim Sabiroğlu
kimi Şuşanı bilən, sevən, Şuşa dərdindən
əriyən jurnalistlərin
getməsinə pis baxmıram (Amma Nazim, deyəsən, səfərə getməmiş,
xəyalən yazıb).
Yenə, heç olmasa, ağrılı yazılarla
yaralarımızı tərpədirlər. 30 il sonraya nə yara qalacaq,
nə də belə yazılar yazanlar... :(
...Nazimin yazısı üsyandı, etirazdı.
Şuşasızlığa, turist kimi, layihə
kimi Şuşaya səfərə gedənlərə
etiraz! Adam təxəyyül
gücünə belə
dəhşətli yazı
yazıb, hamını
çaşdırıb və
bütün cəmiyyəti
sarsıdıb...
8 il əvvəl,
40 yaşında "525"ə müsahibəsində belə
demişdi: "Allah mənə
Şuşaya jurnalist kimi getməyi nəsib eləməsin".
İndi
də xəyali Şuşa səfərindən
təsirli reportaj yazdı və Şuşaya gedən jurnalistlərə, həm
də cəmiyyətə
sərt mesaj ötürdü.
***
Hərə öz tərəfinə çəkir.
***
Sən artıq mifsən! Haqqında o qədər əfsanə var ki...
***
Qadınların küsməyinə yenə
bəraət tapmaq olur. Kişilər küsəndə naəlac qalırsan :)
***
Mən münsif
deyiləm.
***
Hərdən ömürdə qısa fasilələr olur.
***
Ombudsmanın son təbriki...
***
Adam kimi də getmək
olardı...
***
İtirdiklərimiz o qədərdi ki...
Xiffət yetməz hamısına...
***
Nüfuzuna xələl dəyməyənlər,
çəkisi azalmayanlar,
sanbalını itirməyənlər
də var.
***
"Qanun" nəşriyyatına
hər gediş Şahbaz Xuduoğlunun kitablar hədiyyə etməsiylə yekunlaşır. Bu dəfə də yeni işıq üzü görmüş
kitablarla geri döndüm. Oxumalı kitablardır.
Siz də yolunuzu "Qanun"dan və "Əli & Nino"dan salın. Məmnun qalacaqsınız!..
***
Kamil Həmzəoğlu, ekstrasenslərin
qəzəbinə gələcəksən...Az öncəgörməlik
et... :)
***
Etinasızlıq yaxşı keyfiyyətdirmi?! Müdriklikdir,
ya naqislik?!.
***
Duza gedənlər...
***
Sadəlövh olmaq, yoxsa özünü sadəlövh
yerinə qoymaq?..
***
Təkmilləşmə elə sürətlə gedir ki, adamlar baxa-baxa
qalır...
***
İnsan
beyni bu sürətə tap gətirməyəcək...
***
Tut qurusu, ət qaxacı, kəklikotu arağı...
***
Hələ ki Ezop dilində danışırıq...
***
"Müsəlman alimlərinin
elm və texnologiyanın
inkişafına töhfələri"
mövzusunda beynəlxalq
konfransda Akademiyanın
müxbir üzvü,
dəyərli filosof-alim,
Könül xanım Bünyadzadə ilə yanaşı oturduq. Könül xanımın
fəlsəfi yazıları
"525"də tez-tez çap
olunur, həmişə
maraqla qarşılanır.
Mənə hədiyyə etdiyi,
Şərqin yaradıcı
və filosof qadınlarından bəhs
edən "Eşqin hikməti" kitabını
da şövqlə oxuyuram.
***
"Qadına şiddətə
son". Belə bir lazımlı tədbirə gəldim.
***
Qadının uzun çıxışı
kişiyə şiddətdir,
yoxsa yox?! :)
***
Naxçıvan qonaqpərvərliyi...
***
Naxçıvan Dövlət Universitetinin
tələbələri üçün
kitab imzaladım...
Maraqlı və fəal gənclər idi. Xoş oldu.
***
Şahbuzda, qarın bir addımlığında və
Batabatda, qarın tən ortasında :)
***
"Buna da şükür"
və "inşallah". Mentalitet
və xarakterimizin ən qabarıq təcəssümləri...
***
Baxırsan hər şey yerindədir, amma soyuqdur. Ruh yoxdur, sevgi yoxdur!..
***
Xarici TV-lərdə
ən çox maaşı canlı efir aparacıları alır. Ta nə qədər
alırlar, onu deməzlər...
***
Utanıb
yerə girəcəklər
ki?!.
***
Şəkilləri çevirib vərəqləməklə
sona yaxınlaşır
ömür...
***
Gecənin yarısı ayılıb
"Badamlı"nı
başına çəkmək
və Ənvər Məmmədxanlının sözlərini
xatırlamaq...
***
Birinci, telefon nömrəsini dəyişməli...
***
Markın xasiyyəti və kriteriyaları sərtdir; bir profili "blok" etdinsə, yenidən onunla dostlaşmaq imkanına maneələr yaradır. Deyir, bir
də düşün.
***
Nə
33, nə 45...
- heç biri 40 dərəcənin yerini verməz! Yaşasın kəşf edən Mendeleyev!..
***
Palanı
döyəcləmək...
***
Rəhman
Badalov İçərişəhərlə
bağlı kədərli
status yazmışdı... Vaqif
Səmədoğlunun şeirini
xatırladım...
Əyrin-üyrün,
dar küçələrin,
gündüzlər
otaqlarındakı bəyaz
gecələrin,
damlarının yastısı,
içinin astası
küçələrini
dolanan addımların
həmişə tənha
səsi.
Gecələrinin
dünyada itən
tarix tikəsi.
İçindən
Bayır
şəhərə,
Böyür şəhərə,
Böyük şəhərə çıxan təəccübüm,
oğrularından qorxan cibim,
ölüm ayağındadır
indi
Biçarə şəhər,
İçəri şəhər...
***
Məşədi İbad - 50-55 yaşlarında
qoca bir kişi :)
***
Dilxoşluq eləmək nədir?!
***
Sidneyi tüstü
bürüyüb.
***
Dilqəm Əhməd, təbrik edirəm. Sənə çoxlu pul, kolleksiyana yeni-yeni eksponatlar, Binəqədiyə
metro, ev və lənmək arzulayıram!.. :)
***
Biz deyib yorulmuşuq. İndi
də siz deyin.
***
Hərə bir səbəbdən izləyir.
***
Göyərçinlər çoxalıb.
***
YUĞ Teatrının 30, Vaqif İbrahimoğlunun 70 illiyinə
həsr olunmuş tədbirə gedirdik. Zeynal Məmmədli ilə rastlaşdıq. Çoxdan görüşmürdük.
Vaxtilə Zeynal müəllim
Mətbuat Şurası
İdarə Heyətinin
üzvü, BDU-nun jurnalistika
fakültəsinin müəllimi
idi. Tez-tez görüşərdik. Belə bir tədbirdən öncə bu görüşü təsadüf
saymaq olmazdı, məncə, burada mistik bir qanunayğunluq
var idi.
Tədbirin başlamasına hələ
vardı deyə, oturub çay içdik, Vaqif İbrahimoğlunu yada saldıq. Zeynal müəllim Vaqif
İbrahimoğlunun "Press-fakt", "Üç nöqtə" qəzetlərindəki
yazılarından danışdı,
xatirələrini bölüşdü,
iti zarafatlarını
xatırladı.
Mətbuatla bağlı tədbirlərdə,
indi nostalji ilə xatırlanan
"Media açarı" mərasimlərində Vaqif
müəllim başda
olardı. Tədbirləri o ssenariləşdirirdi, fərqli ovqat yaradırdı.
Vaqif İbrahimoğlu
çox istedadlı, özü olan, koloritli insan idi. Dərin yumoru, incə
ironiyası, sərt sarkazmı vardı. "YUĞ" isə fərqli estetikası olan qeyri-adi bir teatr idi.
Yazıçı Kamal Abdullanın
pyeslərini tez-tez səhnələşdirərdi. Bir dəfə Kamal müəllim deyir ki, Vaqif, axı,
tamaşadan heç nə başa düşmədim. Yəqin bu
sözü sinirə bilmədiyinə görə,
Vaqif İbrahimoğlu
növbəti dəfə
həmin pyesi sözsüz səhnələşdirir.
Tamaşaçılar mat qalır.
Aktyorlar səhnədə oynayırlar,
amma söz, danışıq yoxdur.
Pantomim də deyil. Bu, Vaqif İbrahimoğlunun
qeyri-adiliyi, hoqqası,
indi dəbdə olan ifadə ilə desək, kreativliyi idi. Vaqif İbrahimoğlunun qısa
həyatı yüzlərlə
belə qeyri-adiliklərlə,
kreativliklərlə doluydu.
Bir hadisəni
isə Anar müəllimdən eşitmişəm
- hərdən Vaqif İbrahimoğlunun çoxqatlı
yumoruna nümunə kimi danışır.
Ötən əsrin 80-ci illərində
Vaqif İbrahimoğlu
Musiqili Teatrda baş rejissor işləyirmiş. Aktyorlardan biri dünyasını
dəyişib, vida mərasimidir. Mədəniyyət naziri gəlir, baxır, tapşırıqların
verir. Mərhumun
şəkilinə baxanda
irad tutur:
- Böyük şəkil yox idimi?! - soruşur.
- Böyük şəkil var, amma başqa
adamın şəkilidir
- deyə Vaqif İbrahimoğlu cavab verir.
Nazir donub qalır, heç nə başa düşmür. Başqa adamın böyük
şəkili nə deməkdir?! Bu nə cavabdır?! Nazir labirintə düşür,
cavab tapa bilmir.
Bəli, Vaqif İbrahimoğlunun dərin ironiya və sarkazmını başa düşmək bəzən bir anın, bir günün işi deyildi. Tam qavraya bilmək üçün mütləq gərək müəyyən zaman keçəydi.
Beləcə zaman keçir və biz Vaqif İbrahimoğlunu daha çox dərk etməyə, daha çox anlamağa çalışırıq.
Ruhu şad olsun!..
***
Qafqaz Müsəlmanları İdarəsi "Nəsimi-650: Haqqın carçısı" mövzusunda beynəlxalq elmi-praktik konfrans keçirir. Din xadimlərinin Nəsimiyə yeni gözlə baxması təqdirəlayiqdir, mənalı və düşündürücüdür.
***
Millət vəkilləri tədbirdən yarımçıq getmək istəyirlər. Deyirəm, darıxmayın, hara tələsirsiz, bekar adamlarsız. :)
***
Deyir, seçki
barədə düşüncələr ilk
dəfə ələyin kəşfindən sonra
yaranmağa başladı...
Rəşad
MƏCİD
Azərbaycan
Yazıçılar Birliyinin gənclərlə iş üzrə
katibi, "525-ci qəzet"in baş redaktoru
525-ci qəzet.- 2019.- 7 dekabr.- S.11.