Gülsadə İbrahimli "Femme"ni təqdim etdi

Dekabrın 15-də AZƏRKİTAB kitab evində gənc şair Gülsadə İbrahimlinin "Femme" kitabının təqdimat mərasimi keçirilib.

Mərasimdə tanınmış yazıçılar, ictimaiyyət nümayəndələri və jurnalistlər iştirak ediblər.

Tədbirdə çıxış edən şairlər Əkbər Qoşalı, Qulu Ağsəs, İntiqam Yaşar və başqaları qeyd ediblər ki, son iki il ərzində yazılan şeirlərdə Gülsadə İbrahimli qadın duyğularını öz tərzinə xas şəkildə daha ciddi, daha sarsıdıcı ifadə edə bilib. "Son Tanqo" kitabıyla ciddi maraq qazanan müəllif "Femme" kitabıyla da şeir sevənləri heyrətləndirməyi bacarıb.

Sonda çıxış edən müəllif kitabın ərsəyə gəlməsində və təqdimatın keçirilməsində zəhməti olan hər kəsə öz təşəkkürünü bildirib, qonaqlar üçün yeni kitabını imzalayıb.

Qeyd edək ki, kitabın satışından əldə olunacaq gəlir xeyriyyə məqsədilə xərclənəcək.

525-ci qəzet.- 2019.- 18 dekabr.- S.13.