Ölkəmizin hərtərəfli inkişafında gənclərin çox böyük rolu var

Bu gün müstəqil Azərbaycan dövləti üçün prioritet istiqamətlərdən birini də gənclər siyasəti təşkil edir. Həm Ümummilli lider Heydər Əliyevin Azərbaycana rəhbərlik etdiyi dövrdə, həm də indi gənclərlə iş, gənclər siyasəti dövlət siyasətində mühüm yer tutub.

Azərbaycan prezidenti İlham Əliyev hər zaman gənclərin inkişafına, onların dövlət idarəçiliyində təmsil olunmasına, yüksək səviyyədə təhsil almalarına böyük diqqət göstərib.

Bu mənada, dünən Bakı Konqres Mərkəzində keçirilən Azərbaycan Gəncləri Gününə həsr olunmuş respublika toplantısında Prezident İlham Əliyev və birinci xanım Mehriban Əliyevanın iştirakı gənc nəslə münasibətin növbəti əyani təzahürü kimi qiymətləndirilməlidir.

Dövlət başçısı ölkəmizin hərtərəfli inkişafında gənclərin çox böyük rolu olduğunu, gənclərin potensialı, fəallığı, onların məsələlərə yeni baxışlarının cəmiyyət üçün çox lazımlı olduğunu vurğulayıb. Prezident deyib ki, bu gün Azərbaycan gəncləri müstəqillik dövründə yaşayırlar. Bu, böyük xoşbəxtlikdir. Bu gün hər bir vətənpərvər Azərbaycan vətəndaşı haqlı olaraq fəxr edir ki, o, müstəqil Azərbaycan Respublikasının vətəndaşıdır. Ölkəmizin hərtərəfli inkişafında gənclərimizin çox böyük rolu vardır. Gənclər müxtəlif sahələrdə çox uğurla fəaliyyət göstərirlər, ölkəmizin ümumi inkişafına böyük töhfə verirlər.

Dövlət başçısı gənclərə təhsilə çox böyük fikir vermələrini də tövsiyə edib: “Mən bütün gənclərə üz tutub deyirəm ki, təhsilə çox böyük fikir versinlər. Çünki bugünkü dünyada bilik, savad ön plandadır”.

Prezident deyib ki, gənclər milli ruhda tərbiyə almalıdırlar ki, gələcəkdə dövlət maraqlarını, xalqımızın milli maraqlarını layiqincə qoruya bilsinlər. Öz nitqində aprel döyüşlərini xatırladan ölkə rəhbəri vurğulayıb ki, bu, bizim şanlı tarixi qələbəmizdir və bu əməliyyatlarda iştirak edənlərin mütləq əksəriyyəti gənclərdir: “Biz müharibə şəraitində yaşayırıq, müharibə hələ bitməyib və biz hər an hazır olmalıyıq ki, öz torpaqlarımızı işğalçılardan azad edək”.

Dövlət başçısının diqqət yetirdiyi məsələlərdən biri də könüllülər hərəkatı olub və bu hərəkatın xüsusi əhəmiyyətini qeyd edib: “Bu, cəmiyyətdə xeyirxahlıq, cəmiyyətdə yeni davranış qaydalarını təbliğ edir və təsadüfi deyil ki, bu sahədə gənclər öz rolunu oynayır”.

Prezidentin daha bir tövsiyəsi isə gəncləri dövlət təşkilatlarının önə çəkməsi ilə bağlı olub: “Çünki gənclərin həm potensialı, həm fəallığı, həm onların məsələlərə yeni baxışları cəmiyyət üçün çox lazımdır. Bizim gənclərimiz həmişə yadda saxlamalıdırlar ki, Azərbaycanın dövlət müstəqilliyi hər şeydən üstündür, Azərbaycan xalqının maraqları hər şeydən üstün olmalıdır”.

Bu gün Azərbaycan sürətli və uğurlu inkişafı yolundadır, ölkə qarşısında duran bütün vəzifələr icra edilir və bu gün Azərbaycan dünyada çox sürətlə inkişaf edən ölkə kimi tanınır. Lakin dövlət başçısınında dediyi kimi, əldə edilmiş uğurlarla kifayətlənməməli, daim irəliyə baxmalı və ilk növbədə, bu gün həll edə bilmədiyimiz məsələləri həll etməliyik, nöqsanları, problemləri aradan qaldırmalıyıq və bu sahədə əlbəttə ki, gənclər bizim üçün ən birinci yardımçılar ola bilərlər və olmalıdırlar.

Dövlət başçısı elə dünən fəal gənclərlə bağlı bir sıra sərəncamlar imzalayıb. Belə ki, İlham Əliyev dövlət gənclər siyasətinin həyata keçirilməsində, gənclər hərəkatının formalaşmasında səmərəli fəaliyyətinə görə bir qrup gənci təltif edib. Prezident həmçinin, mədəniyyət, elm, təhsil və ictimai fəaliyyət sahələrində xüsusi fərqlənən şəxslərə 2019-cu il Gənclər üçün Prezident mükafatlarının verilməsi haqqında müvafiq sərəncam imzalayıb.

Ölkə rəhbərinin təltif etdiyi şəxslər arasında Ukraynada həyatları təhlükəyə məruz qalan insanların xilası zamanı göstərdikləri şəxsi şücaətə görə Sabir və Umud Şirinov qardaşları da var. Prezidentin onlara şəxsən “İgidliyə görə” medalını təqdim etməsi isə gənclərimizə müsbət keyfiyyətlərin aşılanması üçün bir göstəricidir.

Mövzu ilə bağlı danışan “İrəli” İctimai Birliyinin sədri Mirhəsən Seyidov görüşdən xoş təəssüratlarla ayrıldıqlarını deyib: “Dövlət başçısı gənclərin görüşünə gəlmişdi. Bizlərə öz gəncliyindən danışdı. Azərbaycanın ən çətin vaxtlarında ulu öndər Heydər Əliyevin Azərbaycan üçün etdiklərinin canlı şahidi olduğunu dedi. Görüşdə prezident Azərbaycan gəncliyini necə yüksək qiymətləndirdiyini bir daha sübut etdi. Ali Baş Komandan gənclər haqqında necə yüksək fikirdə olduğunu və bu gün Azərbaycan gəncinin hansı mövqedə dayanmalı olduğu mesajını çatdırdı. Çətin qazanılan müstəqilliyin hər bir gəncimiz, əsgərimiz tərəfindən hansı formada qorunmalı olduğundan, vəzifə məsuliyyətinin biz gənclər üçün ən vacib olduğundan danışdı. Hər bir gəncə şəxsi maraqların heç bir zaman dövlət maraqlarından üstün tutmamağın nə olduğunu izah etdi. Bir çox gənclərimiz ölkə rəhbərliyi qarşısında çıxış etməyin necə böyük bir məsuliyyət olduğunu hiss etdiyi üçün seçilən sözlərində böyük bir səmimiyyət ifadə edirdi. Bir çox duyğusal anlar yaşandı, şəxsən mənim üçün. Müharibə şəraitində yetişən gənclik qazilərinə hörmətini göstərdi. Ölkə başçısı hər il olduğunu kimi, bu il də gənclərə Prezident mükafatı təqdim etdi. Bir fiziki qüsurlu gəncə mükafatı təqdim etmək üçün səhnədən auditoriyaya enən dövlət başçımız bütün auditoriya tərəfindən ayaq üstündə alqışlandı. Budur bizim Prezidentimiz. Budur bizim Ali Baş Komandan!”

Azərbaycan-Slavyan Gəncləri Assosiasiyasının sədri Səbuhi Abbasov isə deyib ki, Azərbaycanda gənclərə qayğı dövlətin diqqətindədir. Onun sözlərinə görə, Azərbaycan müstəqillik əldə etdikdən sonra ulu öndərin diqqət ayırdığı sahə gənclərlə bağlı idi: “Gənclər Nazirliyinin yaradılması, Gəncləri Gününün təsis edilməsi, Gənclər Forumunun keçirilməsi buna bariz nümunədir. Sevindirici haldır ki, bu gün də bu siyasət daha innovativ formada Prezident İlham Əliyev tərəfindən davam etdirilməkdədir. Gənclər Fondunun yaradılması buna ən bariz nümunədir. Prezident Administrasiyasında Gənclər şöbəsinin yaradılması isə bu siyasətin yeni bir mərhələyə daxil olduğunu göstərir. Yusuf Məmmədəliyevin rəhbərlik etdiyi şöbə prezidentin tapşırıq və tövsiyələrinə uyğun olaraq dünya standartlarına uyğun şəkildə ölkəmizdə gənclər siyasətini davam etdirməkdədir. Gənclər Fondu son 1 ildə yüzlərlə imkansız gəncin illik təhsil haqqısını ödəyib, onlarla QHT-yə, yüzlərlə fiziki şəxsə layihə verib. Bütün bunlar gənclərin hərtərəfli inkişafına hesablanmış yol xəritəsidir”.

Yeni Azərbaycan Partiyası Gənclər Birliyi Ofisinin rəhbəri Fərid Nəsibov deyib ki, gənclərimiz ölkəmizin ictimai-siyasi həyatda fəallığı ilə xüsusi seçilirlər. Həqiqətən gənclər hər bir cəmiyyətin avanqard qüvvəsidir. O bildirib ki, Azərbaycan gənclərinin mütləq əksəriyyəti Heydər Əliyev ideyalarına sadiqdirlər, cənab Prezident İlham Əliyevin həyata keçirdiyi siyasəti birmənalı olaraq dəstəkləyirlər:

“Dövlətimizin siyasəti nəticəsində Azərbaycanda sağlam ruhlu, intellektual gənc nəsl yetişib. Təbii ki, bu gənclik hər bir sahədə fəal şəkildə təmsil olunurr. O cümlədən, gənclərimiz ictimai-siyasi proseslərdə də fəal iştirak edirlər. Bu gün gənclərimiz dövlət idarəçiliyində, seçkili orqanlarda, eləcə də vətəndaş cəmiyyətində aktiv şəkildə təmsil olunurlar. Və ölkəmizin inkişafına, milli maraqlarımızın qorunmasına, Prezident İlham Əliyevin uğurlu siyasətinin təbliğ olunmasına öz töhfələrini verirlər.

Yeni Azərbaycan Partiyasının gəncləri bu baxımdan Azərbaycan gəncliyinin önündə gedir. Partiyamızın gəncləri daim ictimai-siyasi proseslərdə fəaldır. Onlar dövlətimizin və partiyamızın qarşıya qoyduğu vəzifələrin layiqincə yerinə yetirilməsi üçün məsuliyyətlərini dərindən dərk edir və bu yolda fəaliyyətlərini davam etdirilər”.

PƏRVANƏ

525-ci qəzet.- 2019.- 2 fevral.- S.4.