Ədəbiyyat İnstitutunda "Səfəvi Şeyxi" romanının təqdimatı olub

Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda yazıçı-publisist Yunus Oğuzun "Səfəvi Şeyxi" tarixi romanının təqdimatı keçirilib. Bu barədə İnstitutun İctimaiyyətlə əlaqələr şöbəsi məlumat verib.

Tədbiri giriş sözü ilə AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli açaraq bildirib ki, Yunus Oğuzun burada artıq, üçüncü əsəri müzakirə edilir: "Onun romanlarının sayı ondan çoxdur. Bu gün "Səfəvi Şeyxi" romanı haqqında fikir mübadiləsi aparılacaq. Onun tarixi romanlarında Azərbaycan milli dövlətçilik təfəkkürü ön mövqedə dayanır. Tarixi romanlarında tarixlə bədii düşüncənin balansı doğru tapılıb. O, tarixi reallığı, obyektivliyi qorumaq şərti ilə bədii yanaşmada doğru yol seçir. Yunus Oğuzun romanları özünün dinamikasına görə film üçün daha yaralıdır. Onun əsərlərinin ekran həyatı barədə düşünə bilər".

Sonra Müstəqillik dövrü Azərbaycan ədəbiyyatı şöbəsinin müdiri, AMEA-nın müxbir üzvü Tehran Əlişanoğlu "Yunus Oğuzun romançılığı: tarixdən belletristikaya" mövzusunda məruzə edib. Məruzədə qeyd olunub ki, "Səfəvi Şeyxi" aktual mövzudadır, o, oxucunu tarixlə yükləmək istəmir. Nadir şah, Təhmasib şah, Əmir Teymur, Sultan Alp Arslan, Atabəy Eldəniz kimi obrazlar yaratmış yazıçı bu əsərinin də texnologiyasını da rahat qurub.

Mətbuat Şurasının sədri, millət vəkili Əflatun Amaşov Yunus Oğuzun romanının akademiyada müzakirə olunmasını yüksək dəyərləndirib. Natiq müəllifin jurnalist kimi də sözünü dediyini və hazırda "Olaylar" İnformasiya Agentliyinin baş redaktoru olduğunu xüsusilə qeyd edib.

Millət vəkili İlham Nəsirov da Yunus Oğuzun Azərbaycan tarixi üçün çox böyük işlər gördüyünü bildirib. Onun kitablarının Azərbaycan tarixinin öyrənilməsi üçün bir töhfə olduğunu nəzərə çatdırıb.

Azərbaycan Yazıçılar Birliyinin katibi, "525-ci qəzet"in baş redaktoru Rəşad Məcid də bu cür tədbirləri ilk növbədə akademik İsa Həbibbəylinin təşəbbüs və diqqətinin nəticəsi kimi səciyyələndirərək yüksək qiymətləndirib. Rəşad Məcid qeyd edib ki, Yunus Oğuzun 22 ölkədə 47 kitabı yayımlanıb. Onun əsərlərində tarixə yeni və fərqli baxış var.

Müstəqillik dövrü Azərbaycan ədəbiyyatı şöbəsinin aparıcı elmi işçisi, filologiya üzrə fəlsəfə doktoru Lalə Həsənova müzakirə olunan romanı ətraflı təhlil edib.

Kitabın ön söz müəllifi, akademik Nizami Cəfərova görə, bu romanın əvvəlkilərdən bir üstün cəhəti var ki, tarixi hadisələrin təfsilatına o qədər də yer verilməyib. Akademik əsərdə cərəyan edən Üç kilsə hadisələrinə xüsusilə diqqəti yönəldib. Erməni ideoloqlarının erməni dövləti yarada bilməsələr də, öz ideologiyalarını yaratmaq istəklərinə münasibət bildirib.

Ədəbi cərəyanlar şöbəsinin aparıcı elmi işçisi, filologiya üzrə fəlsəfə doktoru Elnarə Qaragözova da kitab haqqında təhlil xarakterli çıxış edib.

Dilçilik İnstitutunun direktoru, akademik Möhsün Nağısoylu ilk milli təriqət yaratmış Şeyx Cüneyd Ərdəbili haqqında belə bir əsər yazılmasını təqdirəlayiq hal sayıb. Akademik həmçinin, əsəri bir dilçi olaraq da bəyəndiyini vurğulayıb.

Kitabın bədii redaktoru, yazıçı Elçin Hüseynbəyli əsərin ilk oxucularından olduğunu bildirib. Yazıçı qeyd edib ki, müstəqilliyimizin ən böyük nemətlərindən biri tariximizə yenidən nəzər salmaqdır. Yunus Oğuzun da bu işin öhdəsindən məharətlə gəldiyini deyib.

Nehru adına Hindistan Dövlət Universititetinin Türk dili və ədəbiyyatı kafedrasının müdiri Oğuz Xan, hindli olmasına baxmayaraq, tədbirdə türkcə çıxış edib. O, Azərbaycan və Elmlər Akademiyası, xüsusilə Ədəbiyyat İnstitutu haqqında xoş təəssüratarını bölüşüb.

Tədbirdə müəllifin qələm dostlarında

n Faiq Ələkbərov, Kənan Hacı, İlqar İlkin, Vahid Aslan da iştirak ediblər. Sonda müəllif Yunus Oğuz çıxış edərək tədbirin təşkili üçün əziyyəti keçən hər kəsə təşəkkürünü bildirib. Film və serial çəkilməsi ilə bağlı səsləndirilən fikirlərə də münasibət bildirib. Artıq həmin sahədə işlər görüldüyünü qeyd edib.

525-ci qəzet.- 2019.- 5 iyul. S. 9.