"Yeni
kəşflər: Azərbaycan
xalçaçılığında yeni motivlər"
Kannda açılan sərgi azərbaycan mədəniyyətinin
təbliği naminə mühüm addım kimi dəyərləndirilir
"Azərbaycan mədəniyyətinin
Kannda yenidən təşviq edilməsindən çox
şadıq. "Yeni kəşflər: Azərbaycan
xalçaçılığında yeni motivlər"
adlı xalça sərgisi bizdə çox böyük maraq
doğurdu. Ənənə və innovasiyanın vəhdəti
olan bu sərgi yüksək səviyyədə təşkil
olunub".
Bu fikirləri Heydər
Əliyev Fondu tərəfindən Kann şəhərində
təşkil edilmiş "Yeni kəşflər: Azərbaycan
xalçaçılığında yeni motivlər"
adlı xalça sərgisinin açılışında
iştirak edən Kann merinin müavini Frank Şıkli
AZƏRTAC-a müsahibəsində bildirib.
Frank Şıkli
qeyd edib ki, bu sərgini dünya sərgisi də adlandırmaq
olar, çünki Kann dünya şəhəri kimi
tanınır. Bu sərgi Azərbaycan mədəniyyətinin
təbliği baxımından çox əhəmiyyətlidir.
"Şərqin və
Qərbin qovuşuğunda yerləşən Azərbaycanda
olmuşam və yenə də getmək istərdim. Ənənə
və innovasiya sözlərini yenidən xatırlatmaq istəyirəm,
çünki ölkəniz qədimliyin və müasirliyin vəhdətidir.
Bakıda ənənə və innovasiyanın vəhdətini
aydın görmək olur. Keçmiş, indi və gələcək
arasında görünməyən tellərlə vəhdəti
təmin edən ənənəni qoruyub saxlamaq və onu
innovasiyalarla yenidən canlandıraraq yaşatmaq önəmlidir.
Azərbaycanı həqiqətən də çox sevdim",
- deyə F.Şıkli qeyd edib.
"Kann şəhərinin
sakinləri və meriyası burada Azərbaycan mədəniyyəti
günlərinin yenidən təşkilindən çox razıdır.
Bir neçə ildir ki, Heydər Əliyev Fondunun sayəsində
sakinlərimiz və turistlərimiz Azərbaycan mədəniyyəti
ilə tanış olurlar. Fürsətdən istifadə edib
Fondun rəhbərliyinə təşəkkür edirəm.
Heydər Əliyev Fondu ilə əməkdaşlığımız
getdikcə daha da möhkəmlənir və onun sayəsində
Kann ilə Azərbaycan arasında sıx əlaqələr
mövcuddur. Fond Azərbaycanın mədəniyyətini,
tarixini yüksək səviyyədə təbliğ edir".
Bu sözləri isə
Heydər Əliyev Fondu tərəfindən Kann şəhərində
"Yeni kəşflər: Azərbaycan
xalçaçılığında yeni motivlər"
adlı xalça sərgisinin açılışında
iştirak edən Kann meriyasının beynəlxalq əlaqələr
departamentinin rəhbəri Maqali Tabui dilə gətirib.
Maqali Tabui bildirib
ki, bu il təşkil olunan sərgi Azərbaycan
xalçaçılığı ilə daha ətraflı
tanışlığa imkan yaradır. Ümumiyyətlə,
belə tədbirlər tərəfdaşlığımıza,
eləcə də dünya şəhəri adlandırılan
Kannda Azərbaycan mədəniyyətinin təşviqinə
yeni təkan verir.
"Azərbaycan
haqqında çox oxumuşam, ancaq ölkənizə getmək
istəyirəm. Əminəm ki, biz gələcəkdə mədəniyyət
və təhsil sahələrində yeni layihələr həyata
keçirəcək və bir-birimizi qarşılıqlı
olaraq daha yaxından tanıyacağıq", - deyə Kann
meriyasının rəsmisi vurğulayıb.
525-ci qəzet.- 2019.- 17 iyul. S. 13.