Ədəbiyyat İnstitutu Avrasiya Türk Araşdırmaları İnstitutu ilə memorandum imzalayıb

Azərbaycan Milli Elmlər Akademiyası Nizami Gəncəvi adına Ədəbiyyat İnstitutu ilə Avrasiya Türk Araşdırmaları İnstitutu arasında “Akademik və tədqiqat əməkdaşlığı sahəsində” anlaşma memorandumu imzalanıb.

Tədbirdə AMEA-nın vitse-prezidenti, Ədəbiyyat İnstitutunun direktoru, akademik İsa Həbibbəyli Koreya ilə Azərbaycan arasındakı münasibətin uğurla inkişaf etdiyini bildirib. Bu cür əməkdaşlıq müqavilələrinin qarşılıqlı münasibətlərin daha yaxşı inkişafına töhfə verəcəyini vurğulayıb.

Akademik qeyd edib ki, Naxçıvan Dövlət Universitetində işləyərkən Koreyadan tələbələri vardı, koreya dili kursu da açılmışdı: "Sizin tərəfinizdən Bəxtiyar Vahabzadənin “Gülüstan” poemasını tərcümə edib Koreyada yayımlamağınız çox yaxşı haldır. Həmçinin, bildirməliyəm ki, Ədəbiyyat İnstitutunda şərq ədəbiyyatı hərtəfli öyrənilir. Professor Bədirxan Əhmədlinin rəhbərlik etdiyi Azərbaycan-Asiya ədəbi əlaqələri şöbəsi bu işdə xüsusilə fəaldır. İndiyə kimi, Çin, Hindistan, Pakistan kimi ölkələrlə əməkdaşlıq müqavilələri imzalanıb. Koreya üzrə kordinator isə həmin şöbənin əməkdaşı Leyla Həsənzadədir".

Sonra Seuldakı Dongduk Qadınlar Universitetinin professoru, Avrasiya Türk Araşdırmaları İnstitutunun direktoru, YUNESKO-nun Orta Asiya ölkələri üzrə təmsilçisi Eunkyung Oh da Ədəbiyyat İnstitutu ilə əməkdaşlığın uğurlu töhfələr verəcəyinə ümid etdiyini bildirib. Xanım Eunkyung Oh Qarabağ haqqında kitab yazdığını bildirib. Həmçinin, qeyd edib ki, Azərbaycan ədəbiyyatı koreya dilinə kütləvi şəkildə çevrilməyib. Koreyada türkoloji bölümdə 90-a yaxın tələbə oxuyur. O, bu anlaşmadan sonra əməkdaşlığın daha da genişlənəcəyini diqqətə çatdırıb.

İmzalanma mərasimində Ədəbiyyat İnstitutunun elmi katibi Mehman Həsənli və Beynəlxalq Əlaqələr şöbəsinin müdiri Xanım Zairovada iştirak ediblər.

ŞAHANƏ

525-ci qəzet.- 2019.- 27 iyul. S. 7.