Tanınmış gəncəli rəssam vəfat etdi

 

QALİB BAĞIROV MÜASİR AZƏRBAYCANDA ÇİNİ İNCƏSƏNƏTİNİN BANİLƏRİNDƏN İDİ

 

 

Rəssamlar İttifaqının Gəncə Bölməsinin rəhbəri, Əməkdar rəssam, Azərbaycanda çini üzərində miniatür sənətinin yaradıcılarından olan Qalib Bağırov ürək tutmasından 74 yaşında vəfat edib.

Qalib İsgəndər oğlu Bağırov 1945-ci il may ayının 9-da Gəncə şəhərində anadan olub, buradakı 1 nömrəli məktəbdə orta təhsilini başa vurduqdan sonra, Əzim Əzimzadə adına Azərbaycan Dövlət Rəssamlıq Məktəbində oxuyub, 1971-ci ildə isə S.Q.Stroqanov adına Moskva Dövlət Sənaye-İncəsənət Akademiyasını bitirib. Elə həmin illərdən Gəncədə fəaliyyətə başlayan Çini Qablar Zavodunda baş rəssam kimi çalışaraq, Azərbaycan müasir çini incəsənətinin yaranmasına böyük töhfə verib. 1996-cı ildə zavodun fəaliyyəti dayandırıldıdan sonra Qalib Bağırov Gəncədəki "Çökək hamam" Kompleksində Tətbiqi Sənət Mərkəzi yaradaraq, burada Azərbaycan çini sənətinin ən nəfis nümunələrini qoruyub saxlaya bilib. Həmin nümunələrin əksəriyyətinin müəllifi elə Q.Bağırovdur.

Əməkdar rəssam, həmçinin, Gəncədə yerləşən Azərbaycan Texnologiya Universitetində rəssamlıq dizayn üzrə pedaqoji fəaliyyət göstərirdi. Qalib Bağırov uzun illər idi ki, Azərbaycan Rəssamlar İttifağının Gəncə Bölməsinə rəhbərlik edirdi.

Bugünlərdə rəssamın yeni kitabının təqdimatı keçirilməli idi.

 

Zakir MURADOV

Gəncə

 

525-ci qəzet.- 2019.- 8 iyun.- S.12.