Bakıxanovlar şəcərəsinə dair araşdırma təqdim olundu

Dünən AMEA-nın "Azərbaycan Milli Ensiklopediyası" Elmi Mərkəzində tədqiqatçı Xəyalə Əyriçalmalının "Bakıxanovlar şəcərəsi və bu nəslin Bakı kəndlərində və digər şəhərlərdə məskunlaşan qolları" adlı elmi-tədqiqat işinin təqdimat mərasimi oldu.

Tədbir "Abbasqulu ağa Bakıxanov - 225" layihəsi çərçivəsində təşkil edilmişdi.

Tanınmış tarixçilər Şahin Fazil, Hacı Həsənov, "Vahid poeziya məclisi"nin sədri Rafiq Şirvani, Əmircan qəsəbəsinin icra nümayəndəsi Cəlaləddin Əhmədov, Buzovna kənd məscidinin axundu Hacı Soltan Əlizadə, AYB Xəzər rayon şöbəsinin sədri Arif Buzovnalı, eləcə də digər elm və ədəbiyyat adamları, Bakıxanovlar nəslinin nümayəndələri və jurnalistlər tədbirdə iştirak edirdilər.

Xəyalə Əyriçalmalı tədqiqat işinə Maştağa kəndinin nüfuzlu nəsillərindən biri sayılan, Abbasqulu ağa Bakıxanovun şəcərəsinə aid Əyriçalma nəslindən başladığını, özünün də həmin nəslin nümayəndəsi olduğunu bildirdi. Sənədlərə əsasən aparılan bu araşdırmada Azərbaycan tarixinə, sanballı bir şəcərəyə dair yeni faktlar təqdim etdiyini diqqətə çatdırdı. X.Əyriçalma öz tədqiqatında Bakıxanovlar şəcərəsinin Səfəvilər sülaləsinə yaxınlığını sübut etdiyini açıqladı. AYB-nin Xəzər rayon şöbəsinin sədri Arif Buzovnalının fikrincə, tədqiqatın xüsusilə önəmli cəhəti ondan ibarətdir ki, burada görkəmli bir klassikimizin şəcərəsi bütövlükdə öyrənilir və təqdim olunur və belə araşdırmalar bizdə elə də çox deyil: "Bu araşdırmada nəsildən-nəsilə ötürüləcək vacib faktlar var. Tədqiqat işi Azərbaycanda Bakıxanovşünaslığa yeni bir baxışdır. Bakıxanovların həyatı, yaradıcılığı, qohumluq əlaqələri, hansı mühitdə yaşamaları daha da dərindən araşdırılmalıdır. Biz böyük şəxsiyyətlərimizi, o cümlədən, Abbasqulu ağa Bakıxanovu şəcərəsilə birgə tanımalıyıq ki, fəaliyyətindəki, yaradıcılığındakı kodları aça bilək".

Tədbir X.Əyriçalmalının ifasında A.Bakıxanovun qəzəllərinin səsləndirilməsi və bədii hissə ilə davam etdi.

A.Bakıxanovun sözlərinə Xalq artisti, professor Tofiq Bakıxanovun bəstələdiyi mahnılar dinlənildi. Alim və şair Şahin Fazil özünün A.Bakıxanovun qəzəllərilə ruhən səsləşən şeir nümunələrini oxudu.

Beynəlxalq müsabiqələr laureatı Camalə Abdinzadənin fortepianoda müşayiətilə, Dövlət Xor Kapellasının solisti Leyla Dadaşova "Səninlə bağlıdır bəxtiyarlığım" adlı mahnını, Filarmoniyanın solisti Fəxri Kazım Nicat isə "Söz düşəndə" romansını səsləndirdi. Emil Qurbanov tarda "Xatirə", İlqar Bakıxanov isə "Bakı gecələri" adlı əsəri ifa etdi.

Şəhla ASLAN

525-ci qəzet.- 2019.- 12 iyun.- S.12.