"Bu dünyadan sən də keçdin, Tofiq Abdin"

 

UNUDULMAZ ŞAİRİMİZ HAQQINDA KİTAB İŞIQ ÜZÜ GÖRÜB

 

 

Yazıçı Orxan Aras Azərbaycanın dəyərli söz adamı, unudulmaz şair publisist Tofiq Abdin haqqında kitab hazırlayıb. "Pem" nəşriyyatında çıxan kitabda Tofiq Abdinin həyatı, yaradıcılığı barədə bilgilər, onun haqqında yazılar yer alıb.

Orxan Aras kitab haqqında məlumat verərkən deyib: "Türkiyə türkləri Tofiq abiyə çox şey borcludurlar. Onun sevgisi vəfasına qarşı bu kiçik kitabda az da olsa qarşılıq vermək istədim. O, azərbaycanlı bir jurnalist şairdi, amma ürəyi Türkiyə üçün atardı. İnsan olaraq da saf, səmimi, vəfalı, sevimli, zarafatcıl bir insan idi. Azərbaycan jurnalistikasında bir idol idi. Özünəməxsus üslubu tərzi vardı. Gənc jurnalistlər onu özünə ustad bilərdilər. Hər kəs ona "abi" deyər, onunla  dost olmaqdan qürur duyardılar. Cəsur, açıq sözlü, mübahisə etməkdən, öz həqiqətini söyləməkdən əsla çəkinməyən bir xarakteri vardı. Bu xüsusiyyətlərinə görə ona yuxarıdan aşağı baxanlar belə yeri gələndə Abidən çəkinər, uzaq durardılar. Bəlkə elə buna görə çox mütəvazi sadə bir həyat yaşadı. Türkiyəyə xüsusi maraq sevgisi vardı. Altı il İstanbulda qalmış, içindəki küskünlükləri, üsyanları Türkiyə eşqi ilə "Ah, İstanbul, İstanbul" adlı kitabda ölümsüzləşdirmişdi. Mən onu ustam, ustadım bilirdim. Qəzet jurnalistikası sahəsində ondan çox şey öyrəndim. Hər Azərbaycana getdiyimdə məni axtarar, soruşar, yanımdan ayrılmazdı.

Bu kitab ölümünə sevdiyi Türkiyə türkləri üçün onunla bir tanışlıq vəsiləsi olsun istədim. Ondan bəhs edən dostlarının xatirələrini oxuduğunuzda Azərbaycan Türkiyənin necə bir yazıçı, şair, jurnalist itirdiyini yaxından görəcəksiniz".

Kitabda Tofiq Abdin haqqında Anar, Sabir Rüstəmxanlı, Aqil Abbas, Rəşad Məcid, Yusif Rzayev, Akif Qəhrəmanlı, Azər Abdulla, Şakir Yaqubov, Abdülhamit Avşar, Fəxri Uğurlu, Fəthi Gədikli, Elçin İskəndərzadə, Məzahir Əhmədoğlu, Nemət Veysəlli, Saday Budaqlı, Sevinc Mürvətqızı, Cavid Zeynallı və başqa müəlliflərin yazıları dərc olunub.

 

525-ci qəzet.- 2019.- 19 iyun.- S.12.