Qələmsiz yazılanlar
Orxan Pamukdan feysbuk statusları barədə soruşanda tərəddüdlə
belə cavab vermişdi: “Bəlkə bu da bir
ədəbiyyat növüdü,
hələ ki bir söz deyə
bilmərəm”.
Dövrün, innovasiyaların yaratdığı
bu janrın mahiyyəti yəqin ki, gələcəkdə
xüsusi araşdırılacaq!
Bəlkə bu da jurnalistikanın, yaxud ədəbiyyatın bir növü kimi qəbul ediləcək! Bəzən
sosial şəbəkə
statuslarını “fastfood”
yeməklərə bənzədirəm!
Sanki bir qaçaraq, ayaqüstü janrdı! Hər halda mövcudluğuyla hesablaşmalı
və razılaşmalıyıq!
10 ildir ki, feysbukdayam!
Sosial şəbəkələrin
meydan suladığını
gördüyüm üçün
kitabın və klassik kağız qəzetlərin gələcəyinə
skeptik yanaşmağa
başlamışam!
Statuslar yazmağım isə ovqatımdan asılıdı
- bəzən hansısa
ictimai-siyasi hadisələrə
münasibətimi operativ
olsun deyə sosial şəbəkələrdə
bildirirəm. Hərdən də qaçhaqaç həyatımızda əlçatmaz
olan bədii yaradıcılıq arzusu
yeni status - esselərin
yazılmasına səbəb
olur! Ona görə zaman
keçdikcə geriyə
çevrilib baxanda bu statuslar həm
qəlbin, həm ovqatın, həm də sürətlə bir-birini əvəz edən gündəmlərin
xronologiyası təsiri
bağışlayır.
Günün birində ağlıma gəldi ki, bəlkə bu onillik statusları toplayıb ayrıca bir kitab halında
dərc etdirim?! Bizdə
belə bir təcrübəni xatırlamıram,
xaricdə isə belə cəhdlər olmamış olmaz! Bizdə də bəlkə ilki mən edim!? - deyə düşündüm.
Beləcə, “Qələmsiz yazılanlar”
kitabından daha bir hissəni “525”in oxucuları üçün
hazırladım.
2019
Prezidentin iqtisadi məsələlər
üzrə köməkçisi
Natiq Əmirov AzTV-də problemli kreditlər barədə Prezident fərmanını
çox aydın, rəvan nitqlə, hamının anlayacağı
dildə, səlist şəkildə şərh
etdi. Prezidentin məsələyə həssas münasibətini
və vətəndaşların
mənafeyi naminə verdiyi tapşırıqları
konkret faktlarla vurğulamaqla dövlət
başçısının imicinə əhəmiyyətli
dividentlər qazandırdı.
Belə aydın və hərtərəfli
izahatdan sonra düşünmürəm ki,
bu məsələylə
bağlı kiminsə
hansısa sualı cavabsız qalsın!
Natiq Əmirov
problemin həlli məqsədilə ayrılan
630 milyon manat vəsaitin müqabilində
dövlətin banklardan
və vətəndaşlardan
gözləntilərinin olduğunu
da gizlətmədi. Banklardan orta
və kiçik sahibkarlığın inkişafı
üçün əlverişli
kredit şərtlərinin
yaradılması və
məsuliyyətli kreditlərin
verilməsi, vətəndaşlardan
isə məsuliyyətli
borclanma gözləntisinin
olduğunu bildirdi.
Bir çox hallarda əhalinin çətin güzərana görə
borclandığını qeyd
etməklə yanaşı,
bəzən telefon, maşın almaq, istirahət etmək üçün kredit götürənlərin də
olduğunu vurğuladı.
Bu yerdə “Ayağı
yorğanına görə
uzadarlar” misalını
da çox nəzakətlə işlətdi.
Kreditlərlə bağlı məhkəmələrdə
300 mindən çox işin yığıldığını
bildirdi və bankları sabahdan etibarən öz iddialarını geri götürməyə çağırdı.
Bir sözlə, Natiq Əmirov özünün ətraflı
izahatı və aydın şərhiylə
Prezident fərmanına
sayğı və ehtiram nümayiş etdirdi...
***
İctimai televiziyanın səhər
proqramının qonağı
Fuad Axundov idi! Əvvəla, qonaq seçiminə
görə İTV-yə
minnətdarlığımı bildirirəm. Səhər-səhər çox xoş oldu Fuad Axundovu
dinləmək. Vaxtilə o, elə
bu televiziyada şəhərimizin tarixindən
bəhs edən unudulmaz “Bakinskiy taynı” müəllif proqramını aparırdı.
Fuad Axundov Bakının tarixini dərindən bilir, onun hər
bir tikilisi, hər bir binası
haqqında ən qədim tarixi abidənin sirli-sehirli keçmişindən danışırmış
kimi böyük sevgi ilə, şövqlə söz açır!
12 ildir, Kanadada yaşayır! Vaxtilə onun haqqında
“İkiqat mühacir” adlı yazı yazmışdım. Təəssüfümü
bildirmişdim mühacirətinə...
Nə yaxşı ki Bakıya tez-tez gəlib gedir. Dediyinə görə, ilin 9 ayını Bakıda olur! Bakısız bir aydan artıq dözə bilmir! Sən demə, Bakıda maraqlı ekskursiyalar, tədbirlər təşkil
edir. Bakını,
onun tarixi binalarını, insanlarını
Fuad Axundovun dediklərindən tanımaq
bir başqa aləmdir! Nağıldır!
Kanada həyatından
da danışdı. Kanadalıların mühacirlərə münasibətindən,
yaşayış tərzlərindən
maraqlı fikirlər söylədi. Ən
çox da Torontoda velosiped sürmək üçün
darıxdığını bildirdi! Hətta dilimizə yatmayan
“velosiped” sözünü
“qoşaçarx” adlandırmağı
təklif etdi. Dedi ki: “Dilimizdə
“qoşanağara”, “qoşalülə”
var, “qoşaçarx”
niyə olmasın?! Dilə də yatımlıdır”.
Bakıya
aşiq bu insan Abbas Mirzə
Şərifzadənin “Azdrama”nın arxasındakı
evinin sökülməsindən
təəssüflə danışdı.
Həmin
ərazidə onu xatırladacaq hansısa bir abidənin inşasını təklif
etdi. C.Cabbarlının
ev muzeyini
də belə bir aqibət gözlədiyini dilə gətirib, həyəcan təbili çaldı.
Qısa
zamanda efirdən beynimizi və ruhumuzu tərpədən nə qədər informasiya çatdırdı!
Sağ olsun!
***
Dağı yerindən dağdan
olanlar deyil, arandan olanlar tərpədə bilər!
Təkcə rus ədəbiyyatında
yox, bütün dünya ədəbiyyatında
pauzadır!
Xalq yazıçısı Elçinin
AYB-də, “Natəvan”
klubunda “Müasir tənqid və ədəbi proses” mövzusunda məruzəsində
rus tənqidçilərindən
gətirdiyi bu misallar diqqətimi çəkdi...
***
Dəniz
qırağında yeni
gəzinti mövsümünü
qəzetlərlə açdıq!
Yenə hər nə var, qəzetdə
var! Qəzet və dəniz daimidir! Bir də
incəbelli cam bardaqda
çay!
2018
Bu ağıllı telefonlar
olmayanda insanlar necə yaşayırmış?!
***
Pul maqnit kimidir - meylli olanları ardınca hara gəldi çəkib aparır!
***
Deyir, daha qohum-əqrəba əlini məndən üzüb! İndi qulağı dinc özümçün yaşayıram!
***
Unutmaq yaxşıdır - rahat yaşamağa kömək
edir!
***
Ətrafdan təcrid olmaq, təkliyə çəkilmək,
özünə qapanmaq
tək yaradıcı
insanlara xasdımı?! Sizdə də
olurmu?!
***
Birdən
sənə elə gəlir ki, Şuşada, Cıdır
düzündəsən! Heç
bu müharibə də olmayıb, itkilər də...
Yenə
uşaqlığının, gəncliyinin qayğısız
günlərindəsən! Qayaların üstündə
oturub Daşaltını,
göyün ənginliklərini
seyr edirsən! Birdən nəsə səni xəyaldan ayırır, reallığa
qaytarır! Və an içində özünü
çox gücsüz,
məğlub və zəif hiss edirsən...
***
Hamının sadəlövh vaxtları
olub...
2017
Birdən
elə müəlliflər
haqda elə təriflər yazırlar...
Və elə müəlliflər də
elə tərifləri
elə sidq-ürəknən
paylaşırlar... Az qala, ağzını açıb
deyəsən, birdən
inanarsız ha?! :)
***
Sevgi, təəssüf ki, müvəqqəti hissdir!
Qorxu daha uzunömürlüdür! Və
etibarlıdır!
***
Bu alışqanlıq da yaxşı şey deyil! Asılılığa
çevrilir! Can qurtarmaq
olmur - nə feysbukdan, nə siqaretdən, nə yazmaqdan, nə də ..!
***
Kimə lazımdı e, sənin bu yekəlikdə yazın?! :)
2016
Adam gündə nə
qədər təzadlı,
fərqli hallara düşər?! Həm ətrafdan axışan fərqli emosiyalar, həm daxildə qaynayan təlatümlər...
***
Deyir, xalqın
enerjisi təbiətə
də sirayət edir. Görmürsən, Xəzər geri
çəkilir?!
2015
Eyni rəngli, eyni beyinli gəncləri görəndə məşhur
“Cücələrim” mahnısı
yada düşür!
***
Qorxma!
Robot indi dəbdədir!
***
Havalanmaq,
göynən getmək
müxtəlif səbəblərdən
olur! Mənəvi duyğulardan, ruhi ovqatdan, sənətdən
və sevgidən havalananlar xeyir təmsilçilərinə çevrilir,
ətrafa işıq yayır, nur paylayır!
Maddiyatdan,
puldan, yer nemətlərindən havalananlar
isə adətən şərin xidmətçisi
olur! Ətrafı aşağılayır, insanları
əzməyə çalışırlar!
***
Qadınlar dostluqda sədaqətli
olurlar! Sevgidə deyə bilmərəm...
2014
Sabahı
düşünən qəhrəman
olmaz! Biznesmen olar! :)
***
90-cı illərdə tərcüməçi
Natiq Səfərovla birgə Bədii Tərcümə və Ədəbi Əlaqələr
Mərkəzində işləyirdik!
Natiq müəllim tərcümə
şöbəsinin müdiriydi.
Otağının qapısı
çox vaxt bağlı olardı! Hərdən qapını
açardı, gözü
tutan gənclərdən
birini otağına çağırıb ona
böyük ədəbiyyatdan,
tərcümə işinin
incəliklərindən ustad
dərsi keçərdi!
Sonra stolunun gözündəki bir şüşə konyakdan
50 qram süzüb, bir qırıq qəndlə içirdib yola salardı! Müdrik nəsihətləri də
vardı. Biri indi yadıma düşdü: çalış
zəif olanda adam içinə
çıxma, ortada görünmə!
***
Gərək qadınların davasına
qarışmayasan! Uzaq
durasan! Yoxsa günahkar səni
çıxaracaqlar.
2013
Ruhu materiyaya çevirib ovcuna yerləşdirmək,
səcdə etmək!
Hər bəni-adəm
bacarmaz bunu!
***
Qızıl külçəsisən sən - hərdən xalis, hərdən saxta!..
***
Qadın hikkəsi qədər enerji mənbəyi, güc verən qüvvə yoxdur! Nələrə qadirdir! :)
2012
Pulu çox olan çox da yaşamaq istəyir! Pulu qoyub getməyə heyifi gəlir! :)
***
Nə qədər xoş şeylər düşünmək, xəyalına gətirmək istəyirsən, yenə ən ağrılı məqam, əzab verən hadisə beynindən əl çəkmir, eyni nöqtəni döyəcləyir!
2011
Deyir, 50 kilo
qızılın üstündə oturmaq
üçün gərək öz çəkin də 50 kilodan
çox ola...
Rəşad MƏCİD
525-ci qəzet.- 2019.-
8 mart.- S.9.