Sabir Yusifoğlunun oxucularla yeni görüşü

Tanınmış şair Sabir Yusifoğlunun "Dünya ilə heç-heçəyəm" şeirlər kitabı onun oxucularla dördüncü görüşüdü. Ondan əvvəl şairin "Dünyanı özümlə aparmıram ki...", "Yaşamağa bəhanə çox", "Mənə bir məktub göndər" şeir kitabları işıq üzü görüb.

"İnanıram ki, o gün mütləq olacaq" adlı Ön söz əvəzi məqaləsində tanınmış şair İbrahim İlyaslı S.Yusifoğlu poeziyasından, söz dünyasından bəhs edir: "Sabir Yusifoğlu şairliyi həyat tərzi kimi yaşayan, hər addımı şairanə olan, yetərincə cəsarətli bir söz sahibidir. O, millət, Vətən adına qələmə aldığı şeirlərə canının cövhərini sıxan, türk kimliyi ilə qürur duyan və bu qüruru hər misrasında boy verən ünlü bir türk şairidir. Mahiyyət etibarilə, Sabirin şeirləri, əslində, canım Azərbaycanın sərhədlərini çıxadan aşmış və bütün Turan coğrafiyasını çuğlamış bir poeziya örnəkləridir".

Kitabda yer alan şeirlərin ilki elə kitabın özünə həsr olunub. "Kitab söhbəti" adlanan şeirdə şair özünün kitablarının kiçik həcmdə olmasından danışır. Amma bu kiçiklik onu narahat etmir, çünki mahiyyəti çox böyükdür. Burada şair özünün xüsusiyyətini, həyat amalını poetik şəkildə kitablarının fonunda dilləndirir:

Boy-buxun sarıdan sən deyəndi...

Hə, kitablar içində boyu görünməz.

Nə təhər istəsən vərəqlə, çevir,

heç bir tərəfindən "dayı" görünməz.

Şişib böyüdükcə balacaların

hər yerda haqqını yeyən kitablar,

ürək tərəfdəki yerləri tutur,

gözünə balaca dəyən kitablar!

"Nə uzun yol imiş, Allah, Qələmdən vərəqəcən" - deyən şairin sözügedən kitabındakı şeirləri ən müxtəlif mövzulara həsr olunub. Vətənini sevən, onun şəhid dərdinə ağlayan qəhrəman, bəzən sevgi həsrəti çəkir, ayrıldığı sevgilisinin intizarını ağ vərəqlərə pıçıldayır. Sonra ürək ağrısıyla əldəki su təki süzülüb gedən ömrünə baxıb "Mən bu ömrün döngəsin də düz keçdim" deyir.

Sabir Yusifoğlu "Üzə çıxarmayın şeirlərimi" desə də, "Dünya ilə heç-heçəyəm" kitabında yetəri qədər maraqlı və müxtəlif məzmunlu şeirləri ilə oxucuların görüşünə gəlib.

"Vətənin xatirə şəkli", "Soyuq", "Vətənə soyuq dəyməsin", "Qarlı nağıl", "Gəl", "Qan çəkir", "Tutulan Xəzər", "Büküldüm bu qadına", "Yollar", "Ölmək qadağan deyil", "Payızdan bir yarpaq", "Arxamca baxan lalə", "Ürəyimin ağrısı", "Son ümid", "Mənə bir məktub göndər", "Bitməyən dava", "Çıxış yolu", "Dostlara" və sair kimi şeirlər belə şeirlərdəndir.

Kitabın Son söz əvəzində isə Əli Bağış yazıb: "Mənə bir məktub göndər, - Bilim ki, ölməmişəm", "Türkün bayrağını küləkdən öncə, Başların üstündə yellədən qandı", "Ya qalx boynun qılınc görsün, Ya da otur dizinə döy. Oğulsuz qalan VƏTƏNim, VƏTƏNsiz oğullarım, hey", "Xınalı əllərin, xanım əllərin, Gündüzlər qızının qara telini, Gecələr yuxumu qarışdıracaq", "Məni neynirsən, ay ANA, Doğulub-itən balanam" kimi şeirləri ANAmızın dili yaşadıqca yaşayacağına inamım şübhəsizdir..."

Şahanə MÜŞFİQ

525-ci qəzet.- 2019.- 19 mart.- S.8.