"Ulduz" jurnalının "Nəsimi" xüsusi sayı təqdim olundu

Ötən gün Azərbaycan Yazıçılar Birliyinin (AYB) "Natəvan" klubunda "Ulduz" jurnalının aprel sayının təqdimat mərasimi keçirilib.

Təqdimatda AYB rəhbərliyi, jurnalın əməkdaşları, tanınmış qələm adamları və mətbuat nümayəndələri iştirak ediblər.

Jurnalın baş redaktoru Qulu Ağsəs çıxış edərək deyib ki, 2019-cu ilin "Nəsimi ili" elan edilməsi ilə bağlı olaraq jurnalın xüsusi buraxılışı dahi şair və mütəfəkkirə həsr olunub. Xüsusi buraxılış jurnalın digər saylarından tərtibat baxımından fərqlənir, bütünlüklə rəngli çap edilib. Burada oxuculara Prezidentin Sərəncamı, o cümlədən, son illər böyük Azərbaycan şairi ilə bağlı ölkəmizdə görülən işlərin fotoreportajı da təqdim olunur.

Nəşrdə Azərbaycan Yazıçılar Birliyinin sədri, Xalq yazıçısı Anarın "Şairin hünəri", Azərbaycan Respublikası Nazirlər Kabineti Aparatı Humanitar və sosial məsələlər şöbəsinin müdiri, professor Musa Ələkbərovun "Ədəbi-mədəni irsə, milli sərvətə böyük məhəbbətin parlaq nümunəsi", tədqiqatçı alim, yazıçı-publisist, filologiya elmləri doktoru Abid Tahirlinin "Nəsimi Azərbaycan mühacirət mətbuatında", professor Gülşən Əliyeva-Kəngərlinin "Poetik fəlsəfənin Nəsimi mərhələsi", Azərbaycan Milli Elmlər Akademiyası (AMEA) Folklor İnstitutunun folklor və yazılı ədəbiyyat şöbəsinin müdiri, AMEA-nın müxbir üzvü, Əməkdar elm xadimi Kamran Əliyevin "Nəsimi yaradıcılığında folklorizmlər" və digər elm xadimlərinin, ziyalıların şair haqqında məqalələri dərc olunub.

Daha sonra Xalq yazıçısı Anar, tədqiqatçılar Abid Tahirli, Paşa Əlioğlu, Qüdsiyyə Qəmbərova və başqaları çıxış edərək Nəsiminin Azərbaycan və dünya ədəbiyyatındakı mövqeyindən, dövlət başçısı İlham Əliyevin İmadəddin Nəsiminin 650 illik yubileyi ilə bağlı Azərbaycanda 2019-cu ilin "Nəsimi ili" elan edilməsi haqqında Sərəncamının əhəmiyyətindən danışıblar.

Diqqətə çatdırılıb ki, Ümummilli lider Heydər Əliyevin sovet dövründə Azərbaycana rəhbərlik etdiyi illərdə də şairin irsinin dərindən araşdırılması və təbliği aktual olub. Böyük mütəfəkkirin 600 illiyinin UNESCO-nun qərarı ilə beynəlxalq miqyasda qeyd olunduğu dövrdən etibarən Nəsimi ilə bağlı ciddi tədqiqatlar aparılıb. Qüdrətli şairin yaradıcılığının hərtərəfli öyrənilməsi Azərbaycan ədəbiyyatı tarixinin tədqiqində yeni mərhələ açıb.

Sonda "Ulduz" jurnalı və "Vektor" Beynəlxalq Elmlər Akademiyasının birgə keçirdiyi, Nəsimiyə həsr olunmuş poeziya müsabiqəsinin qalibləri mükafatlandırılıb.

Şahanə MÜŞFİQ

525-ci qəzet.- 2019.- 3 may.- S.8.