Zülmət gecələrdə yazılanların işığı

Sanballı söz və qələm adamı, yazıçı, publisist Novruz Nəcəfoğlu - Novruz Novruzov ömrünün 65 ilini çiyinlərində yüksək dövlət qulluğunun şərəfli məsuliyyətilə bərabər, yaradıcılıq fərəhi, yeni əsərlərin sevinci ilə qarşılayıb yola saldı.

Ədəbi yaradıcılığa əvvəl şeirlə, publisistik yazılarla başlayan qələm dostumuz sonralar çiynini daha ağır yükə verdi. Nəsrə keçib, bir-birinin ardınca "Çarəsiz yolçu", "Yollar uzanan gün", "Keçən cavan çağım ola...", "Atüstü bir nağıl", "Nağıl adam", "Yuxuya gedib gecə" kimi oxunaqlı, oxucular tərəfindən maraqla, rəğbətlə qarşılanan povestlərini və romanını çap etdirdi. Povest və hekayələri rus dilinə tərcümə olundu, qardaş Türkiyədə kitabları işıq üzü gördü. Tanınmış qələm adamları, tənqidçilər onun yaradıcılığı haqqında dəyərli fikirlər söylədilər.

"Arılar gecələr uça bilmirlər. İşıq işartısına, şöləsinin çevrəsinə toplaşırlar. Ancaq zülmətdə yaşayır, min bir dərdin dərmanı olan məhsullarını da qaranlıqda hasilə gətirirlər..." Novruz Nəcəfoğlunun esselərinin birindən sətirlərdir... Və dediklərindən bilirəm ki, gündüzlər iş-gücdən macalı olmayan Novruz Nəcəfoğlunun özü də yuxusuna haram qatıb gecələr yazı-pozu ilə məşğul olur. Dostumuzun o zülmət gecələrdə qəlbinin, zehninin işığında hasilə gələn yaradıcılıq nümunələrinin özləri də bəlkə elə buna görə də belə nurludurlar.

Ədəbi cameədə Novruz Nəcəfoğlu imzası ilə tanınan dostumuz həm də Vətəninə, xalqına ləyaqətlə xidmət edən, Prezident İlham Əliyevin etimadını doğrultmaq üçün əzmlə çalışan bir dövlət məmurudur.

AMEA-nın vitse-prezidenti, akademik, millət vəkili İsa Həbibbəyli "525-ci qəzet"də çap etdirdiyi "Şabranda ədəbi həyat" adlı məqaləsində yazır ki, "Novruz Novruzov bu vaxta qədər çalışdığı rayonlarda sosial-iqtisadi göstəricilərlə yanaşı, maarif, mədəniyyət və mətbuatın da inkişaf etdirilməsi sahəsində nəzərəçarpacaq nailiyyətlər qazanmışdır. Onun İcra başçısı olduğu rayonlarda yaddaqalan ziyalı mühiti formalaşmışdır. Fikrimcə, bu fərqli bir üslubda çalışan Novruz Novruzovun təkcə işlədiyi rayonda deyil, ölkə miqyasında ədəbiyyat və mədəniyyətin inkişafına xidmətidir.

Azərbaycan Yazıçılar Birliyinin üzvü olan Novruz Novruzov müstəqillik dövrü Azərbaycan bədii nəsrinin və bədii publisistikasının tanınmış, qəbul olunan nümayəndələrindən biridir. Yaradıcılığındakı həyata və insana yaxınlıq, əsərlərindəki həyat nəfəsi və torpağa bağlılıq, təbiilik və sadəlik onun fərdi ədəbi simasını səciyyələndirir. Novruz Nəcəfoğlunun publisistikası da bədiilik xüsusiyyətinə görə fərqlənir və qəzetçilikdən uzaq olan, nəsr əsərlərinə yaxın bir tərzdə yaranan orijinal sənət örnəkləridir. Hazırkı mərhələdə o, ardıcıl yaradıcı fəaliyyəti ilə yeni Azərbaycan nəsrini və müasir bədii publisistikanı layiqincə təmsil edir.

Novruz müəllim yaxşı rayon rəhbəri olub, əhatə etdiyi bölgənin inkişafı yollarında məsuliyyətlə çalışdığı kimi, ölkəmizdə yeni ədəbiyyatın da inkişaf etdirilməsinə ürəklə və şərəflə xidmət edir. Onun bədii əsərlərindən müasir insanın nəfəsi və ana torpağın ətri gəlir. O, rayon rəhbəri olaraq mühüm təsərrüfat-quruculuq işləri ilə məşğul olub, həm də müasir səviyyəli bədii əsərlər yaratmağın mümkünlüyünü isbat etmişdir".

Burasını da qeyd etmək istərdim ki, qələm dostumuzun qəhrəmanlarının bir qismi çalışdığı rayonlardan ona yaxşı tanış olan insanlardır. Bir vaxt cəbhə bölgəsinə yaxın Goranboyda İcra başçısı işlərkən şahidi olduğu hadisələr "Ağ qayadan atılan güllə" povestində qələmə alınıb. Yeri gəlmişkən, onun Qarabağ mövzusunda olan bu povesti və "Yollar uzanan gün" hekayəsinin əsasında film də çəkilib.

Novruz Novruzovun Şabranda İcra başçısı işlədiyi dövrdə rayon mərkəzində onun təşəbbüsü ilə tikilib istifadəyə verilən "Ağsaqqalar evi"nə bir təqaüdçü baba kimi elə özüm də tez-tez üz tuturam. Dövlət başçısı cənab İlham Əliyevin Sərəncamı ilə Siyəzən rayon İcra Hakimiyyətinin başçısı təyin edilməsindən sonra ağsaqqallar öz aralarında son vaxtlar ən çox məhz Novruz müəllimdən söz açır, onun vaxtında görülmüş dəyərli işləri xatırlayır, razılıqla sadalayırlar:

- Rayonumuzun tarixi Şabran adı Novruz müəllimin vaxtında qaytarıldı.

- Klasssik şairimiz, bir vaxt Şabrandakı şah zindanında dustaq olmuş Xaqanini bu dəfə heykəl kimi Şabrana gətirdi... Hələ bir adına şeir, sənət ocağı kimi Xaqani poeziya evi də inşa etdirdi.

- Təzə parklar, xiyabanlar, bulaq kompleksləri, su fəvvarələri, Saat qülləsi, abadlaşan küçələr...

- Hələ neçə-neçə yeni ənənələr: Ulu öndərin ad günündə Çıraqqalanın zirvəsinə izdihamlı xalq yürüşləri.

- Novruz bayramında cıdır yarışları...

Görülən işləri sadalamaqdan doymayan el ağsaqqalları söhbətlərini həmişə də xeyir-dua ilə yekunlaşdırıb əminliklərini ifadə edirlər ki, əlbəttə, Novruz müəllim qonşu Siyəzən rayonunda da dövlətimizin başçısının etimadını layiqincə doğruldacaq, o rayonda da işqlı əməllərə imza atacaq!

Bir yazı-pozu adamı kimi mənimsə yadıma Novruz müəllimin rayonun ədəbi-mədəni mühitində bağlı gördüyü işlər düşür:

- Prezident sərəncamı ilə görkəmli sənətkarımızın yubileyləri ilə bağlı rayonda keçirilən təntənəli tədbirlər.

- 2012-ci ildən bəri respublikamızın tanınmış söz adamlarının iştirakları ilə rayonda keçirilən ənənəvi Xaqani poeziya günləri.

- 2017-ci ildə Xaqaninin ərəbcə şeirlərinin filoloji tərcümə kitabının çapına dəstək və Akademiyanın Ədəbiyyat İnstitutu ilə birgə Şabranda elmi praktik konfransın keçirilməsi.

- Qədim Şabran şəhəri ilə bağlı rayonda keçirilən Beynəlxalq elmi konfrans və bu konfransdakı məruzə və çıxışların kitab halında çapı.

- Vaxtaşırı keçirilən kitab təqdimatları, tanınmış şair və yazıçıların imza günləri.

- Yerli yazarların kitablarının çapına dəstək.

- Rüblük "Çıraqqala" ədəbi-bədii, publisistik toplunun nəşri.

Sözümün bu yerində bir yubiley tədbirini xatırlayıram.

2011-ci ildə Xalq yazıçısı, görkəmli ədib və ictimai xadim Mirzə İbrahimovun 100 illik yubileyi ilə bağlı Prezident Sərəncamından bir neçə gün sonra sənətkarın ailə üzvlərinin, Bakıdan gəlmiş adlı-sanlı qələm adamlarının iştirakı ilə bizim Şabranda təntənəli yubiley mərasimi keçirildi. Mirzə İbrahimovun qızı, "Literaturnıy Azerbaydjan" jurnalının baş redaktoru Solmaz İbrahimova elə indi də hər görüşümüzdə minnətdarlıqla yada salır ki, atamın 100 illik yubiley tədbiri ilk dəfə məhz Novruz müəllimin təşəbbüsü ilə, Şabranda, özü də yüksək səviyyədə qeyd olundu.

Qədirbilən şabranlılar onu bir də buna görə minnətdarlıqla yada salırlar ki, Tahir Əkbərin bəstələdiyi, Xalq artisti Gülyaz Məmmədovanın ifasında səslənən məşhur "Şabran" mahnısının sözlərinin müəllifi, doğulub boya-başa çatdığı yurd kimi elə Şabranı da özünə doğma bilən Novruz müəllimdir və indi bu nəğmə Şabran üçün az qala bir himn kimi səslənir.

Min illərlə yaşıd, şəhərlər şahı,

Turan torpağıdı, ocaqdı Şabran.

Tarixlər şahidi, mərdlər oylağı,

Vətən qalasıdı, qucaqdı Şabran.

Novruz müəlllimi 65 illik yubileyi münasibətilə səmimi qəlbdən təbrik edir, bu müxtəsərcə ürək sözlərimi yubilyar haqqında tanınmış ədəbiyyatşünas və yazıçı Pərvinin fikirlərinə qoşularaq tamamlayıram: "Gəncliyindən bu yana müxtəlif vəzifələrdə çalışmış, hazırda Siyəzən rayon İcra Hakimiyyətinin başçısı olan yazıçı sənətdən, ədəbiyyatdan bircə addım da uzaqlaşmayıb. Əksinə, uzun illər Şabran rayonunda İcra başçısı işlədiyi müddətdə Şabranı ədəbiyyat mərkəzinə, sənət məbədinə çevirib. Əminəm ki, ən yaxın günlərdə sözlə, ədəbiyyatla bağlı tədbirlərin sədasını Siyəzəndən də eşidəcəyik".

Aydın TAĞIYEV

AYB Şabran bölməsinin rəhbəri

525-ci qəzet.- 2019.- 18 may.- S.19.