Uşağınıza kitab bağışlayın!

Məktəblə hər gün ünsiyyətdə olan bir valideyn kimi də deyə bilərəm ki, uşaqlar onlara hədiyyə olunacaq kitabın necə həsrətindədirlər.

Ən gözəl, maraqlı nağılı belə ona adi kağızda versən, oxumağa həvəsi olmayacaq. Amma ondan da zəif yazıları bir kitab halında uşağa versən, sevinəcək. O sevinclə də oxumağa başlayacaq və getdikcə bəlkə oxucuya da çevriləcək. Ona görə də gəlin uşaqlara kitab bağışlayaq. Bir haqlı sual verərsiniz ki, axı hansı pulla kitabı çıxaraq və özümüz bu işdən nə qazanaq? Axı yazıçı da insan kimi yaşamalıdır. Onun da öz həyat şərtləri var... Bax bunu düşünmək lazımdır... Bəzən də görürsən ki, biri kitabını verməyə adam axtarır. Dəyərli kitab olsa yəqin belə əldə qalmaz. Amma bu cür kitablarla da uşağı aldatmaq olmaz...

Biz valideynlər uşaqlarımızın nazıyla oynayırıq. Onların hər bir arzusu bizim üçün maraqlıdır. Özümüzü arxa planda görür, uşaqların istəklərini önə çəkirik. Amma çoxumuzun unutduğu bir şey var. Bəlkə uşaq onu bizdən istəməsin. Amma onun sevinəcəyinə əmin olun. Siz heç uşağınıza kitab alırsınızmı?...

Məktəbə gedəndə az qala hər gün bir uşaqdan bu sualı eşidirəm: "Xala, kitab çıxdı və ya nə vaxt kitabı gətirəcəksən?" Bəlkə o uşaq hələ öz valideynindən ona kitab almağı istəməyib. Amma həmin uşağa bir kitab hədiyyə etmişəm deyə hər gün məni sorğu-suala tutur. Sözümün canı odur ki, bahalı oyuncaqlar, qədərindən artıq məktəb ləvazimatı, cürbəcür geyim alırıq onlara. Amma kitabı unuduruq. Uşaq isə böyüyür getdikcə və əlavə kitab oxumaq onun ağlına gəlmir.

Bayramlarda, doğum günlərində görəsən uşağına bir manat verib bircə "Göyərçin" jurnalını alan olurmu? Bu, çox nadir hadisə sayıla bilər... Halbuki biz uşaqlarımıza nələr almırıq ki... Amma uşaqlar, tutaq ki, "Göyərçin"i həmin hədiyyələrdən çox istəyir. Bunu yaxşı bilirəm. Çünki bu payızda hörmətli Rafiq Yusifoğlu xeyli jurnal verdi və mən də payladım uşaqlara... Çox sağ olsun Rafiq müəllim!

1 İyun uşaqların günüdür, bilirsinizmi həm də biz valideynlərin günü, hələ üstəgəl, sülh günü. Bundan da gözəl gün olarmı heç?... Bilirəm, hər kəsin bir proqramı var indi. Uşaqları sevindirməyin əsl məqamıdı... Onlara ən böyük və dəyərli hədiyyəni unutmayın. İnanın ki, bu qiymətli hədiyyə üçün övladınız nəinki indi, böyüyəndə daha çox Sizə "Sağ ol!" deyəcək. Əziz valideynlər, uşağınızı kitablarla sevindirin. Bayramımız mübarək!

Mina RƏŞİD

525-ci qəzet.- 2019.- 31 may.- S.16.