Bəstəkar Tofiq Bakıxanovla bağlı kitab sərgisi

Noyabrın 28-də M.F.Axundzadə adına Azərbaycan Milli Kitabxanasında görkəmli bəstəkar, Xalq artisti Tofiq Bakıxanovun yaradıcılığının 65 illiyinə həsr olunmuş kitab sərgisi açılıb.

Sərgi Mədəniyyət Nazirliyi, Azərbaycan Bəstəkarlar İttifaqı və Milli Kitabxananın birgə təşkilatçılıği ilə reallaşıb.

Tədbirdə Milli Kitabxananın direktoru, professor Kərim Tahirov çıxış edərək bəstəkarın zəngin yaradıcılığı haqqında məlumat verib. Bildirib ki, Tofiq Bakıxanov xalqımızın çox sevilən, seçilən bəstəkarlarından biridir. Onun əsərləri təkcə Azərbaycanda deyil, bir çox ölkələrdə səslənir. Tofiq Bakıxanovun çox ziyalı bir nəslin nümayəndəsi olduğunu vurğulayan natiq deyib ki, onun ulu babası Abbasqulu Ağa Bakıxanov Azərbaycanın görkəmli tarixçisi, filosofu, atası Əhmədağa Bakıxanov isə Xalq artistidir.

Nəzərə çatdırılıb ki, Tofiq Bakıxanovun formalaşmasında dahi bəstəkar Üzeyir Hacıbəylinin çox böyük rolu olub. Çünki Üzeyir Hacıbəyli ilə Əhmədağa Bakıxanov dost idilər. Üzeyir bəyin məsləhəti ilə Tofiq Bakıxanov musiqi məktəbinin skripka sinfinə daxil olur. Həmin məktəbdə oxuyaraq o, artıq bəstəkarlığa da böyük meyl göstərir. O, 1953-cü ildə Azərbaycan Dövlət Konservatoriyasını A.N.Amitonun dərs dediyi skripka sinfini, 1957-ci ildə isə dahi bəstəkar Qara Qarayevin bəstəkarlıq sinfini bitirib. Qeyd edilib ki, bəstəkar yaradıcılığı boyu çoxsaylı musiqiçi nəslinin yetişməsində böyük xidmətlər göstərib.

Azərbaycan Bəstəkarlar İttifaqının katibi, Əməkdar incəsənət xadimi Zemfira Qafarova vurğulayıb ki, musiqi ictimaiyyəti Tofiq Bakıxanovu ilk növbədə skripkaçı kimi tanıyıb. O, hələ 12 yaşında - musiqi məktəbində oxuyanda bir çox konsert salonlarında, radioda skripkaçı kimi çıxış edib. Daha sonra dövlət triosunda çıxış edib və bir çox Azərbaycan bəstəkarlarının skripka üçün əsərlərinin ilk ifaçısı olub.

Bəstəkarın çoxşaxəli yaradıcılığı barədə danışan Z.Qafarova qeyd edib ki, o, bir çox janrlarda musiqilərin - 3 musiqili komediya, 3 balet, 8 simfoniya, müxtəlif alətlər üçün 25 konsert, 26 sonata, simfonik muğamlar, çoxlu sayda kamera-instrumental və kamera-vokal əsərlər, süitalar, uvertüralar, mahnılar və romansların müəllifidir.

Tofiq Bakıxanovun pedaqoji fəaliyyətindən söhbət açılaraq qeyd olunub ki, o, Asəf Zeynallı adına musiqi kollecində skripka dərsi deyib. Bakı Musiqi Akademiyasında uzun müddət kamera instrumental kafedrasında çalışaraq bir çox alətlər üçün əsərlər yazıb ki, bu əsərlər həm görkəmli ifaçılarımız tərəfindən səsləndirilib, həm də tədris sistemində yer alıb.

Qeyd edilib ki, Azərbaycanda ilk birpərdəli balet olan "Xəzər balladası" Tofiq Bakıxanovun yaradıcılığının vizit kartıdır. Xəzər neftçilərinə həsr olunmuş bu əsər 1968-ci ildə Azərbaycan Dövlət Akademik Opera və Balet Teatrının səhnəsində tamaşaya qoyulub. 1969-cu ildə Parisdə keçirilən VII Beynəlxalq musiqi festivalında nümayiş olunub və böyük uğur qazanıb. Balet Fransanın bir çox şəhərlərində, keçmiş sovet ölkələrində səhnəyə qoyulub və bəstəkara çox böyük şöhrət gətirib.

Ü.Hacıbəyli adına Bakı Musiqi Akademiyasının professoru, Əməkdar incəsənət xadimi Telman Hacıyev, Əməkdar jurnalist İttifaq Mirzəbəyli və digərləri çıxış edərək bəstəkarın yaradıcılığından, onun insani keyfiyyətlərindən söz açıb, ona yaradıcılıq uğurları arzulayıblar.

Sonda çıxış edən bəstəkar tədbirin iştirakçılarına və təşkilatçılarına təşəkkürünü bildirib.

Sonra qonaqlara kitab sərgisi ilə tanış olublar.

Şahanə MÜŞFİQ

525-ci qəzet.- 2019.- 29 noyabr.- S.8.