Vətən sevgisilə yaşamaq və yaratmaq

Qanadı qırılmayınca qatarından ayrılmaz, karvanından qalmaz durnalar. Əsrlər boyudur pozulmaq bilmir bu qatarın düzümü! Min illərdir bizə də nəsib edilib füsünkar, ecazkar tarixin keşməkeşli zamanlarını yaşamış, çox nadir millətlərə nəsib olan el-oba yurd həsrətiylə qovrula-qovrula yaşamaq qisməti.

İnsan oğlu sahib olduğunu qeybə çəkildiyini görəndə şam kimi əriyib və torpağa qovuşmaqla sanki sahib olduğuna çatıb. Əsrlər boyu ürək ağrıdan tarixi proseslərin cərəyan etdiyi bir ölkədə yaşayan insan övladı öz tarixini, mədəniyyətini, yaşadıb gəlib bu günə üzü ağ çıxıbsa, sirli-sehirli gerçəklikləri düyün düşmüş, unudulmuş həqiqətləri görə-görə gəlib və sonda öz müstəqilliyini qazanıbsa, o millət doğrudan da ölməzdir!

Bu yazımı tədqiqatçı, publisist, filologiya elmləri üzrə elmlər doktoru Abid Tahirli haqqında, necə deyərlər, bir neçə kəlmə demək düşüncəsilə qələmə aldım.

Ən azından yaxın qonşu və kitablarının ilk oxucularından biri olduğum üçün bunu gərəkli bildim. Bütün ömrünü yaradıcılığını xalqının pərən-pərən düşmüş övladlarının həyat yolunun, irsinin araşdırılmasına həsr etmiş bir ziyalı haqdadır bu kiçik yazı.

Noyabrın 30-u Abid müəllimin ad günüdür. On səkkiz kitab, saysız-hesabsız məqalələr, dəyərli monoqrafiyalar Abid Tahirlinin tükənməyən enerjisindən, milli-mənəvi dəyərlərə məhəbbətindən, dərin zəkasından, Vətən, millət, dövlət sevgisindən xəbər verir. Ömrü boyu itmiş-burulğanlarda batmış, tarixin ayrı-ayrı dövrlərində vətənini tərk edib müxtəlif ölkələrdə mühacir həyata yaşayan ziyalılarımızı axtarıb-arayıb üzə çıxarmaq onun nəcib həyat amalıdır. Düyün düşmüş talelərin, unudulmuş və danılmış gerçəklərin dalınca gedib min bir zəhmət hesabına onları oxucuya təqdim etmək səadəti də hər kəsə nəsib olmur ki. Düşünürəm və ürəkdən inanıram ki, Abid müəllim insanlıq və vətəndaşlıq borcunu aydın dərk edən bəndələrdəndir.

Qənaətim budur ki, yaxşı insan olmadan həyatda yaxşı heç nə yaratmaq olmaz. Bir şeyi hiss edib duymasan, daxili aləminə varmasan, ortalığa yaxşı nəsə çıxarmaq müşkül məsələdir. Mən dəfələrlə bu ümdə keyfiyyətləri Abid müəllimin şəxsində duyub hiss etmiş, yaxşı mənada ona qibtə ilə baxmışam.

Hörmətli Abid müəllim! Doğum gününüz, ömrünüzün daha bir ilinin tamamı münasibətilə sizi təbrik edir, hələ çox-çox illər yaradıcılıq uğurları diləyir, bütöv Azərbaycanda ömür sürmək səadəti arzulayıram!

Əzizağa AZƏRİ

525-ci qəzet.- 2019.- 30 noyabr.- S.18.