Məni bağışla

Bir vərəq sevgin qaldı,

bir kitabsa ayrılıq.

Onsuz da bir əsrdi sənin ilə ayrıyıq.

Yollarına sadağa,

adına qurban mənəm,

Sarıl mənə son dəfə,

gəl qovuşaq birdənəm.

Dünyanın o başından səslə məni

harayla

Gəlləm yağan yağışla,

gəlləm günəşlə, ayla.

Mənə qoy vətən olsun,

o müqəddəs qucağın

Ayağın dəyən yerlər ziyarətim,

ocağım.

Danış ay ömrüm-günüm,

səsin olsun nəfəsim,

Sən gedirsən, söylə bəs,

kim olacaq hər kəsim...

Getsən də çarə nədir,

uğurlaram alqışla

Sənsiz dözə bilməyib ölsəm,

məni bağışla...

Yağış yağar

Yağış yağar urəyimin küncünə,

Yağar, yağar, dərd-sərimi təmizlər.

Yağış yağar ürəyimin küncünə,

Susuz qalar təşnə torpaq, gen düzlər.

Yağış yağar gözlərimin içinə,

Gözüm dolar, boşalmağa tələsər.

Qoşularam bəxtsizlərin köçünə,

İzlər itər, arxamızca yel əsər.

Yağış yağar hisslərimin üstünə,

Hissim donar, sevdamızı isitməz.

Tənhalığım yaman durar qəsdimə,

İslanaram, yağan yağışsa kəsməz.

Yağış yağar, dayanmadan hey yağar,

Göyün yerə sevgisini bildirər.

Yağış yağar ürəyimə hey yağar,

Dərd-sərimi damla-damla öldürər.

Bu payız da tənhayam

Bu payız da tənhayam,

Saralan yarpaqların,

Üşüyən budaqlarda,

Lap son qonağı kimi.

Bu payız da tənhayam,

Xəzan ümidlərimin,

Məzarı üzərində,

Söylənən ağı kimi...

Alıb xatirələri,

Yer tapmıram daşıyam,

Öldürəcəm hamısın,

Dəli sayağı kimi...

Bu payız da tənhayam,

Ətraf qırmızı, sarı,

Hər yan xına rəngində,

Gəlin ayağı kimi...

Bu payız da tənhayam...

Bu payız da soyuqdu...

Yuxuma gəl

Yuxuma girsin yağış,

Yağsın hey dayanmadan.

Sonra sən...

Gəl qovuşaq,

Yuxudan oyanmadan...

Bizə yaxın gəlməsin,

Nə ayrılıq, nə həsrət,

Yuxuma gəlməsin qoy,

Köksümü cızan möhnət.

Yuxuma gəl...

Qovuşaq...

Dəysin mənə əllərin...

Yağan yağışın altda,

Xəyal quraq,

nələrin...

Toxunsun dodaqların,

Öncə islaq telimə,

Sonra nəfəslərimiz,

Qarışsın bir-birinə...

Yuxuma gəlsin yağış,

Dönüm dumana, çənə.

Sonra səni gətirsin,

Səni gətirsin mənə...

Bu gecə

Bu gecənin rəngi

daha qaradı məncə.

Küçələrdə ara-sıra

sahibsiz itlər hürür

bir də yemək axtarır

balasına pişiklər...

Açdım pəncərəmi qaranlığa

ağaclar adam kimi

boylanırlar içəri

təngə gəldim

elə bil ki, gecə-gündüz

dayanıblar keşikdə...

Bu gecənin ayı yoxdur

dağılıblar ulduzlar.

Sanki bu gün göy üzündə

yollarını azıblar...

Bircə qədəh şərab süzüm

bir musiqi dinləyim...

necə idi o mahnı?

həə

"gecələr pənah yerim"

oxuyan da deyəsən

o qız idi...Azərin...

Kimlər yatıb bu gecə

kimlər oyaqdı görən...

bu gecə tənhaların

gecəsidi deyəsən...

Mövsümü olmaz ayrılıqların

Mövsümü olmaz ayrılıqların

nə istini hiss edər insan, nə soyuğu

gedişin bir burulğan kimi

içimi, çölümü söküb apardı.

İndi bu sevdiyim fəsildə

xəzanlar ürəyimdə saraldı.

Anladım...

Bu sevdanın nə əvvəli olacaqmış,

nə də ardı.

Olsun.

Gedişini faciə etməyim mən də,

zarafat etmişdin bəlkə,

sevirəm deyəndə.

Mövsümü olmaz ki, ayrılıqların.

Mövsümlər də sən idin.

Güləndə bahar,

ağlayanda payız

susanda isə qış.

Və bir də ayrılıq varmış...

Gözyaşı, hüzün, kədər.

Bundan belə ayrılıq qoxar

bütün mövsümlər...

Payız

Xoş gəlmisən payızım,

Sevimli fəslim mənim.

Ruhum ilə bərabər

Bax, sevinir bədənim.

Xoş gəlmisən payızım,

Bu xəzan ürəyimə.

Bilmirəm neçə dəfə

Gələcəksən ömrümə.

Neçə dəfə islanar,

Yağışında tellərim,

Neçə dəfə toxunar

Xəzanına əllərim?

Xoş gəlmisən payızım,

Sarışın fəslim mənim.

Tanrı yağışla yerə

Qoy göndərsin kərəmin.

Bir leysan yağış yağsın

Döyəcləsin üzümü.

Gizləsin bu minvalla

Yağmur dolu gözümü.

Əssin payız yelləri,

Dərdlərimi qoparsın,

Fırtınaya dönərək

Uzaqlara aparsın...

Xoş gəlmisən payızım

Xoş gəlmisən evimə.

Neçə dəfə gələssən

Bundan sonra ömrümə?..

Məktub

Məndən nigaran qalma,

Hər şey qaydasındadı

Yuxum qaçıb sadəcə

Heç bilmirəm hardadı.

Evin divarlarından

yuxusuzluq tökülür,

bayırda dan yeri də

sən olmadan sökülür.

Yuxu cəhənnəmə e,

Dörd tərəfim işgəncə,

Yenə iştahım qaçıb,

Yaşayıram beləcə.

Hara baxsan dərmandı

yenə xəstə olmuşam.

sevginə bürünürdüm

üstüaçıq qalmışam.

Quruyub dodaqlarım,

indi uçuq-uçuqdu.

Sulugözlü olmuşam,

Ehh, biabırçılıqdı...

Bunlar dərdin yarısı,

Hava da heç açılmır.

Günlər bozarıb yaman

bir birindən seçilmir.

Adını unutmağa

bəhanələr tükənib

dünyanın şor suları

kipriyimə yüklənib.

Hə, bayaq nə deyirdim?

heç vecinə də alma.

hər şey qaydasındadı,

məndən nigaran qalma.

Fərqanə YUSİFQIZI

525-ci qəzet.- 2019.- 30 oktyabr.- S.23.