Nazir: "Dövlətimiz yaradıcı insanların fədakar əməyini yüksək qiymətləndirir"

Mədəniyyət naziri bildirib ki, yeni mövsüm Azərbaycanın mədəni həyatında önəmli hadisələrlə zəngin olacaq

Prezident İlham Əliyevin müvafiq sərəncamları ilə Azərbaycan mədəniyyətinin inkişafındakı xidmətlərinə görə orden, medal və fəxri adlara layiq görülmüş mədəniyyət və incəsənət xadimlərinə mükafatların təqdimat mərasimi olub.

Sentyabrın 12-də Muzey Mərkəzində keçirilən tədbirdə çıxış edən Mədəniyyət naziri Əbülfəs Qarayev bildirib ki, bu, əlamətdar bir gündür: "Bu gün Azərbaycan Respublikasının Prezidenti cənab İlham Əliyevin bir sıra sərəncamlarının icrasını həyata keçirəcəyik. Təltif olunan şəxslər arasında həm ədəbiyyat, həm kino, həm də digər mədəniyyət nümayəndələri var. Bir neçə gün öncə də belə mükafatlar təqdim olunub. Bu insanlar Azərbaycan tarixinə, mənəvi rifahına öz töhfələrini veriblər və bu gün də fəaliyyətlərini davam etdirirlər. Hər bir yaradıcı insanın arxasında fitri istedadla yanaşı, gərgin əmək, fədakarlıq, öz üzərində işləyərək axtarışlar prosesi durur".

Nazir ölkəmizdə mədəniyyət və incəsənət sahələrində xidmətləri olan şəxslərə böyük dövlət qayğısından danışıb. Bildirib ki, əsası Ulu öndər Heydər Əliyev tərəfindən qoyulmuş bu siyasət Prezident İlham Əliyev tərəfindən uğurla davam etdirilir. Ə.Qarayevin fikrincə, hər bir yaradıcı insanın nailiyyətlərinin arxasında fitri istedadla yanaşı, gərgin əmək dayanır və sevindirici haldır ki, dövlətimiz yaradıcı insanların fədakar əməyini yüksək qiymətləndirir.

Mədəniyyət naziri deyib ki, bu sahədə çalışanlara ayrılan diqqət bütövlükdə Azərbaycan mədəniyyətinə göstərilən qayğıdır: "Mədəniyyətimiz bu gün dünya səviyyəsində tanınır, təbliğ edilir, beynəlxalq qurumlar səviyyəsində qəbul olunur. Bütün bunlar cənab Prezidentin və Birinci vitse-prezident Mehriban xanım Əliyevanın bu sahədə gördükləri misilsiz işlər sayəsində mümkün olub".

Əbülfəs Qarayev qeyd edib ki, başlanmaqda olan yeni mövsüm Azərbaycanın mədəni həyatında önəmli hadisələrlə zəngin olacaq: "Sentyabrın 14-dən etibarən teatr və konsert teatr və konsert müəssisələri mövsümü açır. İnanıram ki, bu mövsüm də uğurlarla seçiləcək və yadda qalacaq. Yeni mədəniyyət mövsümünün startı dahi bəstəkar Üzeyir Hacıbəyliyə həsr olunan XI Beynəlxalq Musiqi Festivalı ilə veriləcək. Növbəti beynəlxalq tədbir VI Bakı Beynəlxalq Kitab Sərgi-Yarmarkası olacaq. Daha sonra Heydər Əliyev Fondunun vitse-prezidenti Leyla Əliyevanın təşəbbüsü ilə İkinci "Nəsimi-şeir, incəsənət və mənəviyyat Festivalı" başlayacaq və digər böyük tədbirlər keçiriləcək".

Daha sonra mükafatlar nazir tərəfindən sahiblərinə təqdim olunub.

Mərahim Fərzəlibəyov "Şöhrət" ordeni, Vahid Əziz "Xalq şairi", İlqar Muradov, Cavan Zeynallı, Vidadi Əliyev, Vidadi Həsənov "Xalq artisti", Vaqif Bayatlı Odər (şairin səhhətiylə əlaqədar olaraq mükafatı həyat yoldaşı Tamam xanım qəbul etdi), Elçin Hüseynbəyli, Firuz Mustafa "Əməkdar incəsənət xadimi", Nadir Xasiyev, Cəmilə Kərimova, Qurban Məsimov, Qasım Nağı, Elmira Süleymanova, Qorxmaz Əlili, Zilli Namazov "Əməkdar artist", Vaqif Əlixanlı, Abbas Güləliyev, Rauf Məmmədov, Nəsir Ağayev, Nelli Dadaşova, Babək Quliyev, Əli Məmmədov, Tamilla Muxtarova "Əməkdar mədəniyyət işçisi", Oksana Bulanova, Ənvər Əhməd, İltifat Salayev (mükafatı bacısı oğlu Hafiz Rəcəbli qəbul etdi), Alina Talıbzadə, Xanlar Ağayev, Mahir Həsənov, Maarif Soltan, Əlisəfdər Hüseynov "Tərəqqi" medalı, Zülfüqar Abbasov (mükafatı kürəkəni Cavadov Kamran qəbul etdi), Oktay Əlizadə isə "Azərbaycan Respublikası Prezidentinin fəxri diplomu " ilə təltif ediliblər.

Mükafat alanlar çıxış edərək onlara təqdim olunan mükafatın böyük sevinclə bərabər, ciddi məsuliyyət hissi də yaratdığını vurğulayıblar. Ölkəmizdə mədəniyyət işçilərinə göstərilən yüksək diqqət və qayğıdan söz açan mükafatçılar Azərbaycan Prezidentinə və Mədəniyyət Nazirliyinə minnətdarlıqlarını ifadə ediblər.

Mərasimdən sonra nazir Ə.Qarayev jurnalistlərlə görüşüb, onların suallarını cavablandırıb. Mədəniyyətin bir xalqın taleyində, tarixində mühüm rolundan danışan nazir deyib ki, cəmiyyətimizdə mədəni sahəyə yeni münasibət formalaşdırılmalıdır: "Tarixi mirasımıza, mədəni sərvətlərə olduqca diqqətli yanaşmalıyıq. Mədəniyyət elə bir sahədir ki, insanların bütünlüklə yaşayış tərzinə, ictimai mühitə önəmli təsir göstərir. İnformasiya texnologiyaları vasitəsilə bütün mahnılar, rəssamlıq nümunələri, digər əsərlər dünyaya yayılır. Bu məsələyə son dərəcə həssaslıqla yanaşılmalıdır. Çünki bu gün bədnam qonşularla mübarizəmiz daha çox bu səpkidə gedir. Hamımız dərk etməliyik ki, bizim bu yöndəki gündəlik mübarizəmiz əslində, görünməyən bir cəbhədə gedir. Çünki mədəni irsimiz, mətbəximiz, sənət nümunələrimiz maddidən daha çox mənəvi xarakter daşıyır, yəni görünməyən incilərdir. Biz bədnam qonşularımızın niyyət və əməllərinə öz yaradıcılığımızla da cavab verməliyik və inanıram ki, belə də olacaq. Odur ki, deyirəm, gün o gün olsun, belə təltifləri Cıdır düzündə həyata keçirək!"

Ə.Qarayev bu ayın teatr və konsert müəssisələrinin açılışı ilə də əlamətdar olduğunu deyib: "Aydın məsələdir, mədəniyyət elə bir sahədir ki, burada istirahət yoxdur. Bütün yay mövsümü boyunca siz jurnalistlər də bizimlə birlikdə işlədiniz, mədəniyyətimizin müxtəlif sahələrindəki yenilikləri geniş oxucu kütləsinə, ictimaiyyətə təqdim etdiniz. Amma ənənəvi olaraq, deməliyik ki, teatr mövsümü sentyabrın ortalarında başlayır. Yay mövsümündə isə bizim teatrların bir qismi beynəlxalq festivallarda iştirak edir. Demək olar, bütün teatr müəssisələrinə dövlət sifarişi veririk. Teatrlara Prezident tərəfindən maddi vəsait də ayrılıb. Bu il bir çox festivallar keçiriləcək".

Son vaxtlar bir neçə teatra "Xalq teatrı" adı verildiyini deyən Ə.Qarayev bildirib ki, bu, həmin teatrların beynəlxalq səviyyədə tanıdılması üçündür. Nazirin sözlərinə görə, teatrların imkanlarının genişləndirilməsi üçün ictimai maraq olmalıdır: "İnsanlar teatrlara daha çox gəlməlidirlər. Teatrların potensialı elədir ki, mövsüm ərzində 10-15 tamaşa olur, ondan artığı alınmır".

Ə.Qarayev bildirib ki, bu il teatr mövsümünün açılışı yeni bərpa olunan Şuşa Teatrında keçiriləcək: "Sentyabrın 17-də orada mövsümün açılışını edəcəyik".

Ə.Qarayev Xalq artisti Fəxrəddin Manafovla bağlı məsələyə də münasibət bildirib. Onun sözlərinə görə, F.Manafovun tamaşası hələ də repertuardadır: "Onun hansısa şərtlərini yerinə yetirmək üçün teatr hazırdır. Xalq artisti Fəxrəddin Manafovu yeni teatr mövsümündə səhnədə görə biləcəyimizə əminəm".

Nazir brifinqdə bu günlərdə dünya şöhrətli azərbaycanlı müğənni Sami Yusifin ictimaiyyətin marağına səbəb olan "Nəsimi" kompozisiyası və onun ifa edildiyi konsert haqqında da danışıb: "Bu çıxış hamınızın yaxşı bildiyi və Azərbaycanın sonuncu ən möhtəşəm beynəlxalq mədəniyyət tədbiri olan UNESCO-nun Ümumdünya İrs Komitəsinin 43-cü sessiyasının 2019-cu ilin 30 iyun tarixində Heydər Əliyev Mərkəzində keçirilmiş açılış mərasimindəki konsertdən idi. Mədəniyyət Nazirliyi tərəfindən hazırlanıb təqdim olunan həmin layihə Heydər Əliyev Fondunun dəstəyi ilə həyata keçirilmişdi. Layihəyə beynəlxalq mütəxəssisləri də cəlb etmişdik. Bu iş alqışa layiqdi. Biz onu o vaxt qəsdən yaymadıq. Çünki razılıq əldə olunmuşdu. Bu günlərdə isə Sami Yusif özü o görüntüləri yaydı və həmin konsertə marağın yüksək olduğunu gördük. Yazılan rəyləri, fikirləri oxudum və çox xoş oldu. Bu yaxınlarda konsertin tam versiyasını yayacağıq. Sami Yusifin yaradıcılığını illərdir izləyirəm və təqdir edirəm. O, bütün dünyada, xüsusən Qərbdə Azərbaycan mədəniyyətini ən yüksək şəkildə təbliğ edən sənətçilərdəndir. Biz gələcək konsertlərimizdə, elə "Nəsimi" festivalında da çıxış üçün onu dəvət edəcəyik".

Brifinqdə Ə.Qarayev deyib ki, Nəsiminin məzarının bərpası ilə bağlı dövlət tərəfindən danışıqlar aparılır. Onun sözlərinə görə, Prezident İlham Əliyev məzarın bərpası, bu istiqamətdə danışıqlar aparılması ilə bağlı tapşırıq verib: "Bu gün Suriyadakı vəziyyət buna böyük əngəldir. Hesab edirəm ki, "Nəsimi ili", Nəsimi festivalı bu məsələnin daha çevik həll olunmasına dəstək olacaq. Vəziyyət imkan verən kimi Xarici İşlər Nazirliyi, Mədəniyyət Nazirliyi, digər qurumlar tərəfindən məzarın bərpası ilə bağlı işlər görüləcək".

Brifinqin əsas hissəsində nazir jurnalistləri daha obyektiv olmağa, insanların mədəniyyət müəssisələrindəki etik davranışlarıyla bağlı nümunə sərgiləməyə səsləyib: "Son zamanlar aparılan təhlillər onu deməyə əsas verir ki, vaxtı ilə bizim konsertlərdə, tədbirlərdə telefon zənglərinin sayı çox idi. Ancaq indi bu zəng səslərinin sayı azalıb, insanlar öyrəşiblər ki, zalda telefonu söndürmək və ya səsini azaltmaq lazımdır. Bu sahədə inkişafa belə xırda nüanslardan başlamaq lazımdır".

Nazir bildirib ki, hər mədəni tədbirə gəliş insanlar üçün mənəvi bayrama çevrilməlidir: "Səhnədə çıxış edən insan həssaslıqla auditoriyadan müsbət aura almaq istəyir. Telefon zəngləri və ya başqa nüanslar xoş duyğuları almağa mane olur. Ona görə də çalışmaq lazımdır ki, tədbirin gözəlliyini hiss edəsən".

Ə.Qarayev bəzi media nümayəndələrinə də çağırış edib. O qeyd edib ki, sensasiya xatirinə kimisə alçaltmaqla, haqqında pis fikir səsləndirməklə təcavüzkar ölkəyə mövzu verilmiş olur: "Sənət insanları xalqımızın mənəviyyatı üçün çalışırlar. Misal olaraq, məgər rəssamlar eyni cür əsər çəkirlər? Axı kiməsə "pisdir" deməklə nə əldə olunur? Hər musiqiçi məgər eyni tərzdə ifa edir? Hər kəsin yaradıcılığı da, zövqü də fərqlidir. Tənqid də peşəkarlığa əsaslanmalıdır. Daxili, mənəvi etik senzuranı dinləmək lazımdır. Kiminsə dediyini olduğu kimi yazmaqla iş bitdi demək olmaz. Bizi istəməyən qüvvələr bizi öz silahımızla vurmağa çalışırlar. Heykəllər, sərgilərdə nümayiş olunan böyük rəsmlər, Azərbaycan musiqisi-hamısı bizim sərvətimizdir. Biz onları qorumalyıq, əks təqdirdə əcdadlarımıza, milli varlığımıza hörmətsizlik etmiş olarıq".

Şahanə MÜŞFİQ

525-ci qəzet.- 2019.- 13 sentyabr.- S.6.