Qadın bir çiçəkdir

 

Esse

 

 

 

Dünya bir çəmən,

Fələk bir külək,

Qadın bir çiçəkdir.

Hər qadın bir çiçəkdir. Rəngarəng, bəzən yabanı, bəzən zərif, şəfalı, ətirli, ətirsiz ya çox pis qoxulu, faydalı ya təhlükəli, əsrarəngiz sirli bir aləmdir. Külək əsdikcə bu çiçəklərin hərəsini bir tərəfə sovurur.

Bəzən hədər olur bu çiçəklər, bəzən zəhər. Bəzən şəfa verir, bəzən bəla. Bəzən çox hiyləgərdir, bəzənsə çox saf. Özünü çox ağıllı zənn edər. Əslində, çox ağıllıdır. Çox zərifdir gövdəsi, ləçəkləri. Lakin bir ağacla bərabər küləyə qarşı dayanacaq qədər dəyanətlidir. Bəzən münaqişələrə səbəb olur, bəzən münaqişələrin qarşısını alır. Bəzən bir qala qurur, bəzən bir qalanı darmadağın edib, daşı daş üstə qoymur.

Yaradan hər qadını ayrı-ayrılıqda özünəməxsus yaratmışdır. Lakin əsrlər boyu, bu günümüzədək bu zərif məxluqlar özlərini gözəllik fədaisi etməkdən yorulmurlar.

Qədim dövrlərdə kübar cəmiyyətin qadınlarının "gözəl görünmələri" üçün bəzi ağlasığmaz metodlardan istifadə etməsi məcburiyyət halı almışdısa, bu günümüzdə qadınlar heç bir məcburiyyət olmadan bir çox üsullardan istifadə edirlər. 

Qədim Maya qəbiləsinin qadınlarının kəllə sümüyü xüsusi forma alması üçün başa kiçik yaşlardan hər iki tərəfdən xüsusi taxta lövhələr bağlanır baş kəllə sümüyü tədricən deformasiyaya uğrayaraq, qəbiləyə uyğun olan baş forması şəklini alırdı.

Qədim Çində isə X əsrdən başlayaraq yüzilliklər boyunca beş yaşından etibarən qızların ayaq ölçüsünün böyüməsinin qarşısını almaq üçün baş barmaqdan başqa bütün barmaqlar pəncə hissəsinə xüsusi ipək sarğılar vasitəsilə bağlanır nəticədə bu gün Çində məşhur olan "lotus ayaqlar" əmələ gəlirdi. Çin imperatoru Li Yunun çox sevdiyi bir kölə qızın kiçik ayaqları ilə lotus şəklində platformanın üzərində etdiyi rəqs Çində dəb halını almış uzun mübarizələrdən sonra kübarlıq əlaməti sayılan bu "gözəllik işgəncəsi" XX əsrə qədər davam etmişdir.

Orta əsrlərdə Avropada qadınlarda "böyük alın" dəb halını aldığı üçün onlar başın ön hissəsindəki saçlarını hətta qaş kipriklərini təmizləyirdilər. İfrat dərəcədə bənizlik arıqlıq XIX əsrdə İngiltərə qadınları üçün kübarlıq əlaməti sayılırdı. Hətta bunun üçün xüsusi kimyəvi vasitələrdən istifadə edilirdi ki, bu da çox ağır fəsadlara səbəb olurdu.

Təxminən 150 il əvvəl orta əsr Yaponiyasında qadınlar dişlərini qara rəngə boyayırdılar. Meydzi dövrünə qədər Yaponiyada, Çinin cənub-şərq əyalətlərində "oxaquro" - dişləri qaraltmaq kimi məşhur adət mövcud idi. Yaponiya imperatorluğunun bütün dövrlərində bu proseduru zadəgan ailələrinin qadınları əsasən gözəllik məqsədilə edirdilər. Eyni zamanda, yeniyetmə qızları tez ərə vermək üçün artıq böyüdüklərini cəmiyyət bildirmənin bir yolu idi. Oxaquro adətinə 1873-cü ildə imperatorun xanımının camaat qarşısına dişlərlə çıxması ilə demək olar ki, son qoyuldu. Rusiyada da çar Aleksey Mixayloviç Romanov dövründə qara dişlər zadəganlıq əlaməti sayılırdı. Bunun üçün bahalı qəndlərdən istifadə olunurdu ki, bu da tədricən dişlərdə kariyesin əmələ gəlməsinə dişlərin qaralmasına səbəb olurdu.

Fransa inqilabından sonra isə qadınların çiyin hissələri çox açıq olan paltarlar geyinməsi bir dəb halını almışdı. Hətta soyuq fəsillərdə belə qadınların çiyin hissələrini açıq saxlaması bir çox fəsadlara səbəb olur çox qadınlar cavan yaşlarında soyuqdəymədən dünyasını dəyişirdi.

Ərəb qəbilələrinin bəzilərində bu günə qədər qadınlar körpə yaşlarında ifrat dərəcədə kökəldilir, bununla da ən gözəl gənc qız kimi erkən ərə verilir. Bu cür məcburi kökəlmə isə mədəaltı vəzinin zədələnməsinə səbəb olur.

Öncə dəmir, sonra taxta karsetlər, hündür pariklər, "tsokkoli çopin ayaqqabılar", qadınların gözəllik xatirinə bunlardan istifadə etməsi qədər absurd səslənir. Elə deyilmi?! Lakin təəəsüf ki, elmin, sivilizasiyanın inkişafıyla gözəllik uğruna işgəncəsi azalmayıb, sadəcə başqa standartlarla əvəz olunub.

Qədim dövrlərdə qadınlar toplu halında bu prosedurlardan keçmək məcburiyyətində qalırdılarsa, bu günümüzdə bəzən qadınlar könüllü şəkildə üz bədən nahiyələrində bir çox dəyişikliklər yaratmağa cən atır. Plastik əməliyyatlar, çəki azaltma prosedurları s. Bütün bunlar digər həmcinsindən daha gözəl görünmək ya əks cinsin diqqətini daha çox cəlb etmək üçündür. Əks cins dedikdə bu, hər qadın üçün fərqli ola bilər. Kimisi həyat yoldaşı, kimi məşuqu ya sevgilisi üçün. Kimin üçün üçün etdiklərindən asılı olmayaraq bu prosedurların hər biri sözsüz ki, öz fəsadlarını göstərir. Sözsüz ki, insanda kompleks yaradacaq bəzi fizioloji qüsurları aradan qaldırmaq üçün həkim müdaxiləsi ya sağlam həyat tərzi üçün artıq çəkidən azad olma prosedurları istisna olmaq şərtilə, əksər hallarda xarici görünüşün estetik gözəlliyi naminə edilən qurbanlar heç əks cins tərəfindən birmənalı qarşılanmır.

Hər qədər şablon səslənsə , sadəlik həqiqətən gözəllikdir! Hər qadının surəti ona məxsus cizgilərlə yaradılmışdır. "Gözəllik dünyanı xilas edəcək" anlayışı əslində, heç tibbi prosedurlar sayəsində simasını tam dəyişmək mənasını kəsb etmir. Bir qadının gözəlliyi onun gözəl əxlaqı, gözəl xasiyyəti, gözəl əl qabiliyyəti, gözəl təbəssümlə gülüşü, savadlı, düzgün nitqidir. Bir qadının gözəlliyi onun sevgiylə gülən gözləridir. Çünki bir qadın sevildiyini bildiyi halda gözlərinin içi gülür göz almacıqları daha da böyüyür, bu isə onun baxışlarını daha da mənalı edir. Bir qadın sevildiyini bilərsə, onun yanaqları ənlik, kirşansız da gözəl görünür.

Odur ki, bütün xanımlara sevgi ilə gözəlləşməyi arzu edirəm. Çünki həqiqətən hər qadın bir çiçəkdir. Onun zəhərli ya şəfalısını seçməksə, hər kəsin öz seçimidir.

 

 

Fidan MALİK

 

525-ci qəzet.- 2019.- 20 sentyabr.- S.16.