Cavanşir Quliyevin iki cildlik "Divan"ı Mərkəzi Elmi Kitabxanada

 

Professor Zümrüd Dadaşzadəyə kitabxanaya bir sıra sanballı nəşrlər təqdim edib

 

 

Azərbaycan Milli Elmlər Akademiyasının Mərkəzi Elmi Kitabxanasına  Əməkdar incəsənət xadimi, bəstəkar Cavanşir Quliyevin iki cilddən ibarət "Divan" adlı əsərlər toplusu daxil olub.

"Divan"ın I cildində C.Quliyevin ötən əsrin 70-ci illərinin sonu - 80-ci illərinin I yarısında gənc ikən bəstələdiyi əsərlər yer alıb. "Divan"ın II cildinə daxil edilən opuslar - bəstəkarın yaradıcılığının əsasən 2000-ci  ildən sonrakı dövrünü əhatə edir. Əsərin ön sözünün şərhlərin müəllifi - Əməkdar incəsənət xadimi, musiqişünas, Bakı Musiqi Akademiyasının professoru Zümrüd Dadaşzadə bəstəkarın yaradıcılığının I dövrünə münasibət bildirərək qeyd edir ki, "yaradıcılıq məqsədinin təəccüb doğuracaq aydınlığı, həmin məqsədin janr, bədii qayə baxımından fərqli əsərlərdə heyrətamiz ixtiraçılıqla gerçəkləşdirilməsi, buradan irəli gələn nadir üslub vəhdəti gənc azərbaycanlı müəllifə güzəşt deyilən münasibəti büsbütün ləğv edir". Z.Dadaşzadə vurğulayır ki, "Divan"ın hər iki cildinə daxil olan əsərlər konkret bədii qayə, həmin qayənin təcəssümü, instrumental heyət baxımından qədər fərqli olsa da, müəllifin fərdi üslubunun səciyyəvi cəhətlərini əyani sərgiləyirlər. Qeyd olunur ki, bəstəkarın erkən əsərləri ilə yaradıcılığının sonrakı dövrü arasında kəskin fərq yoxdur.

Eyni zamanda, MEK-ə Əməkdar incəsənət xadimi, Bakı Musiqi Akademiyasının professoru Zümrüd Dadaşzadənin müəllifi olduğu "Ədilə Hüseynzadə", "Azərbaycan simfoniyası" "Elnarə Dadaşova" adlı kitablar da təqdim edilib.

"Ədilə Hüseynzadə" adlı kitabda peşəkar bəstəkar görkəmli pedaqoq, Azərbaycanın ilk qadın bəstəkarlarından biri, Əməkdar incəsənət xadimi Ədilə Hüseynzadənin zəngin həyat yaradıcılıq yolu işıqlandırılıb sənətkarın Azərbaycan musiqisi tarixində tutduğu şərəfli yerə, musiqi üslubunun özünəməxsus cəhətlərinin tədqiqinə xüsusi diqqət yetirilib.

"Azərbaycan simfoniyası" adlı kitabda 1960-80-ci illər Azərbaycan simfoniyasının başlıca inkişaf istiqamətlərindən bəhs olunur. Kitabda ilk növbədə silsilə, janr formaca orjinal əsərlər təhlil olunur, muğam simfonizmin qarşılıqlı münasibətlərinin yeni mərhələsi üçün səciyyəvi cəhətlər aşkarlanır, simfoniyaya müasir teatr, kino dramaturgiyası leksikasının təsirindən söz açılır.

"Elnarə Dadaşova" adlı kitabında isə müəllif bəstəkar Elnarə Dadaşovanın bəstələdiyi əsərlərini şərh edir.

Bu kitablarla yanaşı, Z.Dadaşzadənin atası, görkəmli ədəbiyyatşünas alim Araz Dadaşzadənin kitabı da MEK-ə təqdim olunub. Kitabda Araz Dadaşzadənin "XVIII əsr Azərbaycan lirikası" monoqrafiyası verilib. Monoqrafiyada poetik ədəbi irsimizin mühüm hissəsini təşkil edən lirikanın inkişaf qanunauyğunluqları, məzmununun rəngarəngliyi, forma xüsusiyyətləri, ədəbi metod məsələsi araşdırılıb, həmin dövr poeziyamızın orta əsrlər ədəbi prosesində yeri əhəmiyyəti müəyyənləşdirilib. Kitabda həmçinin A.Dadaşzadənin müxtəlif illərdə dövri mətbuatda nəşr edilən məqalələri yer alır.

 

Şahanə MÜŞFİQ

 

525-ci qəzet.- 2019.-  28 sentyabr.- S.13.